އަންނަ ސެޕްޓެމްބަރު މަހު ބޭއްވުމަށް ހަމަޖެހިފައިވާ ރިޔާސީ އިންތިހާބަށް ގުޅިފައިވާ ސިޔާސީ ޕާޓީތަކުން އެއް ކެންޑިޑޭޓަކު ނެރުމަށް އެމްޑީޕީން ހުށަހަޅާ މެނިފެސްޓޯ ހެދުމުގެ މަސައްކަތް ވަރަށް އަވަހަށް ފަށާނެ ކަމަށް އެޕާޓީގެ ޗެއާޕާސަން ހަސަން ލަތީފު ވިދާޅުވެއްޖެ އެވެ.
ރިޔާސީ އިންތިހާބަށް ފަސް މަސް ވެފައިވާއިރު، ސަރުކާރު ހިންގާ ޕީޕީއެމްގެ ކެންޑިޑޭޓެއްގެ ގޮތުގައި ނުކުންނަވާނީ އެޕާޓީގެ މުސްތަޝާރު އަދި ރައީސުލްޖުމްހޫރިއްޔާ އަބްދުﷲ ޔާމީން އަބްދުލް ގައްޔޫމެވެ.
ނަމަވެސް އިދިކޮޅު ސިޔާސީ ޕާޓީތަކުން ނެރޭނެ ކެންޑިޑޭޓެއް އަދި ނިންމިފައިނުވާއިރު، އެކަމުގެ މަޝްވަރާތައް ދަނީ ކުރިއަށެވެ.
ރާއްޖެ ޓީވީގެ ފަލަސުރުހީ ޕްރޮގްރާމުގައި ވާހަކަފުޅުދައްކަވަމުން ހަސަން ލަތީފު ވިދާޅުވީ، ރިޔާސީ އިންތިހާބަށް ގުޅިފައިވާ އިދިކޮޅު ސިޔާސީ ޕާޓީތަކުން އެއް ކެންޑިޑޭޓަކު ނެރުމުގެ މަޝްވަރާތައް ހަލުވިކަމާއެކު ކުރިއަށްދިޔަ ކަމަށެވެ.
ނަމަވެސް ފެބްރުއަރީ މަހުގެ އެއްވަނަ ދުވަހު ސުޕްރީމް ކޯޓުން ނެރުނު އަމުރާ ގުޅިގެން ރައީސް ޔާމީން އިއުލާން ކުރެއްވި ކުއްލި ނުރައްކަލުގެ ހާލަތާއި އެކަމުގެ ތެރެއިން ސިޔާސީ ބޭފުޅުންތަކެއް ނުހައްގުން ހައްޔަރުކުރުމުން އެ މަޝްވަރާތައް މެދުކެނޑުނު ކަމަށް ހަސަން ލަތީފް ވިދާޅުވިއެވެ.
އޭނާ ވިދާޅުވީ، ރިޔާސީ އިންތިހާބަށް ނެރޭނީ އިދިކޮޅު ސިޔާސީ ޕާޓީތަކުން މަޝްވަރާކޮށް، އެއްބަސްވާ ކެންޑިޑޭޓެއް ކަމަށެވެ. ނަމަވެސް އެމްޑީޕީގެ އަމިއްލަ މެނިފެސްޓޯއެއް ހެދުމުގެ މަސައްކަތް ވަރަށް އަވަހަށް ފަށާނެ ކަމަށް ވިދާޅުވިއެވެ.
"އައިސްދާނެ ސުވާލެއް އަޅުގަނޑުމެން ވަކިންތޯ އިންތިހާބަށް ކުރިމަތި ލައްވަނީ. ނޫން. ގުޅިފައިވާ ސިޔާސީ ޕާޓީތަކުން ސިންގަލް ކެންޑިޑޭޓެއް ވާދަކުރައްވާނީ. ނަމަވެސް އެމްޑީޕީން ހަދާ މެނިފެސްޓޯއަކީ އެ ސިންގަލް ކެނޑިޑޭޓް އާއެކީ ނުކުންނައިރު އެމްޑީޕީން ދެކޭ ގޮތްތައް ހުށަހަޅާ މެނިފެސްޓޯއެއް،" ހަސަން ލަތީފު ވިދާޅުވި އެވެ.
އޭނާ ވިދާޅުވީ، އިންތިހާބުގައި ވާދަކުރަން އިދިކޮޅު ސިޔާސީ ޕާޓީތަކުން ނެރޭނެ ކެންޑިޑޭޓުގެ މެނިފެސްޓޯގައި ގުޅިފައިވާ ހުރިހާ ސިޔާސީ ޕާޓީއެއްގެ މެނިފެސްޓޯގައިވާ ކަންކަން ހިމެނޭނެ ކަމަށެވެ.
"އަޅުގަނޑުމެން [އެމްޑީޕީ] ގެ އޮރިޖިނަލް ވިސްނުން ހިމަނައި ލިޔުމެއް އޮންނަންޖެހޭ. އެ މެނިފެސްޓޯ ހެދުމުގެ މަސައްކަތް ވަރަށް އަވަހަށް ފެށިގެންދާނެ،" ހަސަން ލަތީފު ވިދާޅުވި އެވެ.
އޭނާ ވިދާޅުވީ، ސިޔާސީ ޕާޓީތަކުން މިހާރު ކުރަމުން ގެންދާ މަސައްކަތްތަކަށް ބަލާއިރު ރައްޔިތުންނަށާއި ގައުމަށް ވެސް އެންމެ ރަގަނޅު ގޮތަކީ އެއް ކެނޑިޑޭޓަކު ނެރުން ކަމަށެވެ.
"އަޅުގަނޑުމެން އެންމެންވެސް ގަބޫލުކުރެވޭ ހަގީގަތަކީ އެއް ކެންޑިޑޭޓެއް ނެރެގެން ނޫނިއްޔަކާ ޔާމީނަކާ އެކީގައި އިންތިހާބަކަށް ދިޔަކަމުގައި ވީނަމަވެސް އެ އިންތިހާބުގައި ޔާމީން ބަލި ކުރުމަކަށް ފަސޭހައެއް ނޫން،" ހަސަން ލަތީފް ވިދާޅުވި އެވެ.
ރިޔާސީ އިންތިހާބަށް އެމްޑީޕީގެ އަމިއްލަ މެނިފެސްޓޯއެއް ހެދުމުގެ މަސައްކަތް ވަރަށް އަވަހަށް ފަށާނެ ކަމަށް އެ ޕާޓީން ހާމަކޮށްފައިވާއިރު، ގުޅިފައިވާ ސިޔާސީ ޕާޓީތަކުގެ ތެރޭގައި ހިމެނޭ ޖުމްހޫރީ ޕާޓީ (ޖޭޕީ) އިން ވެސް ވަނީ އެޕާޓީގެ އަމިއްލަ މެނިފެސްޓޯއެއް ހެދުމުގެ މަސައްކަތް މިދިޔަ މަހުގެ ތެރޭގައި ފަށައިފައެވެ.