ޖެހިޖެހިގެން ތިންވަނަ ފަހަރަށް އެސްޓީއޯ މިނިވަން ޗެމްޕިއަންޝިޕްގެ ތ. އަތޮޅު ޗެމްޕިއަންކަން ތިމަރަފުށިން ހޯދައިފިއެވެ.
މިދިޔަ އަހަރު މިނިވަން ޗެމްޕިއަންޝިޕް ތ. އަތޮޅު ބުރުވެސް ކާމިޔާބުކުރި ތިމަރަފުށިން ވަނީ އޭގެ ކުރީ އަހަރު މިނިވަންޗެމްޕިއަންޝިޕް މުބާރާތުގެ ފައިނަލްވެސް ކުޅެފައެވެ. އެ އަހަރު ފައިނަލްގައި ބ. އޭދަފުށްޓާ ވާދަކޮށް ތިމަރަފުށި ބަލިވީ 1-0ގެ ނަތީޖާއަކުންނެވެ.
މިއަހަރުގެ މިނިވަން ޗެމްޕިއަންޝިޕް މުބާރާތުގައި ތ. އަތޮޅުން ވާދަކުރަނީ ވަންދޫއާއި ތިމަރަފުއްޓެވެ. ދެޓީމު ބައިވެރިވެފައިވުމުން ތ. އަތޮޅު ބުރުގައި ކުޅެފައިވަނީ ހޯމް އަދި އަވޭ އުސޫލުން ދެމެޗެވެ.
ވަންދޫ ފުޓުބޯޅަ ދަނޑުގައި ކުޅުނު ފުރަތަމަ ލެގުގައި ތިމަރަފުށިން ވަންދޫ ބަލިކުރީ 4-2ގެ ނަތީޖާއަކުންނެވެ.
މިއަދު ތިމަރަފުށީ ދަނޑުގައި ކުޅުނުު މެޗު 1-1ގެ ނަތީޖާއަކުން އެއްވަރުވެފައިވާ އިރު، ތިމަރަފުށިން ފައިނަލް ކާމިޔާބުކުރީ އެގްރިގޭޓް 5-3ގެ ނަތީޖާއަކުންނެވެ.
މިއަދުގެ މެޗުގެ 10 ވަނަ މިނެޓުގައި ތިމަރަފުށިން ލީޑު ނެގީ އަހުމަދު ތޯހިރު ކާމިޔާބުކޮށްދިން ގޯލުންނެވެ. މެޗުގެ ފުރަތަމަ ހާފް 1-0ގެ ނަތީޖާއަކުން ތިމަރަފުށި ކުރީގައި އޮވެ ނިންމާލި އިރު، ދެވަނަ ހާފްގައި ވަންދޫންވަނީ މެޗަށް އަނބުރާ އައުމަށް ގިނަ މަސައްކަތްތަކެއް ކޮށްފައެވެ.
މެޗުގެ 85 ވަނަ މިނެޓުގައި ވަންދޫއަށް ނަތީޖާ ހަމަހަމަ ކޮށްދިނީ އަހުމަދު ޝަބީނެވެ.
ތ. އަތޮޅުގެ ޗެމްޕިއަންކަން ހޯދައި، ތިމަރަފުށި ވަނީ ޒޯން ހަތެއްގެ ޒޯން ބުރަށް ކޮލިފައިވެފައެވެ. ޒޯން ބުރުގައި ތިމަރަފުށި ވާދަކުރަން ޖެހޭނީ ލ. އަތޮޅުގެ ޗެމްޕިއަނުން މާބައިދުއާއެވެ.