އިންޑިއާއަށް ނިސްބަތްވާ މަޝްހޫރު ދީނީ އިމާމު ޑރ. ޒާކިރު ނައިކް އިންޑިއާ ސަރުކާރާ ހަވާލުކުރުމަށް މެލޭޝިއާއަށް ގޮވައިލައިފި އެވެ.
އިންޑިއާގެ ދުވަހު ނޫހެއް ކަމަށްވާ ޓައިމްސް އޮފް އިންޑިއާއިން އިންޑިޢާގެ އެކްސްޓާނަމް އެފެއާޒް މިނިސްޓްރީގެ އޮފިޝަލަކާ ހަވާލީދީ ބުނީ ޑރ. ނައިކް އިންޑިއާއާ ހަވާލުކުރުމަށް އެދި ހުށަހަޅަން ޖެހޭ ރަސްމީ ލިޔުންތައް ތައްޔާރުކޮށް ނިމިފައިވާ ކަމަށެވެ.
މެލޭޝިއާގެ ބޮޑުވަޒީރުގެ ނާއިބް އަހުމަދު ޒާހިދު ހަމީދީ މިދިޔަ ނޮވެމްބަރު މަހު ވިދާޅުވީ އިންޑިއާ އާއި މެލޭޝިއާއާ ދެމެދު ހަދައިފައިވާ ކުށްވެރިން ބަދަލުކުރުމުގެ އެއްބަސްވުމުގެ ދަށުން، އިންޑިއާގެ ސަރުކާރުން އެދެފި ނަމަ ޑރ. ނައިކް އިންޑިއާއާ ހަވާލުކުރެވިދާނެ ކަމަށެވެ.
އިންޑިއާގެ ނެޝެނަލް އިންވެސްޓިގޭން އޭޖެންސީ (އެންއައިއޭ) އިން ބުނީ ޒާކިރުނައިކު ދެއްވާފައިވާ ތަގުރީރުތަކުގެ ސަބަބުން އެގައުމުގެ އެކި ދީންތަކުގެ ދެމެދުގައި އޮންނަ ސުލްހަ މަަސަލަސް ކަަމަށް ނުރައްކާތެރި ވެފައިވާ ކަމަށެވެ. އަދި އެ ތަގުރީރުތަކުގެ ސަބަބުން އިންޑިއާގެ މުސްލިމުން އިސްލާމިކް ސްޓޭޓް (އައިއެސް) ޖަމާއަތާ ގުޅުމަށް ހިތްވަރު ލިބިގެންދާ ކަމަށް ވެސް އެންއައިއޭ އިން ތުހުމަތުކުރެ އެވެ.
ޑރ. ނައިކްގެ މައްސަލަ އެންމެ ފުރަތަމަ ސަމާލުކަމަށް އައީ މިދިޔަ އަހަރު ބަންގްލަދޭޝްގައި ހިނގި ޓެރެރިސްޓް ހަމަލާއަކަށް ފަހު އެވެ. ބަންގްލަދޭޝުން ބުނެފައިވާ ގޮތުގައި އެ ހަމަލާގައި ބައިވެރިވި މީހުން އެއަމަލު ހިންގައިފައި ވަނީ ޑރ. ނައިކް ދެއްވާ ދަރުސުތަކުން ހިތްވަރު ލިބިގެންނެވެ.
އެއަށް ފަހު އިންޑިއާ އިން ވެސް ވަނީ އެ މައްސަލައިގެ ތެރެއަށް ވަދެ ވަގުތުން ހާއްސަ ތަހުގީގެއް ފައްޓައިފަ އެވެ. އޭގެ ފަހުން ޒާކިރު ނައިކް އުޅުއްވަމުން ގެންދަވަނީ އަމިއްލައަށް އަރުވާލެވިގެން މެލޭޝިއާގަ އެވެ.
ޑރ. ނައިކުގެ މައްޗަށްކޮށްފައިވާ ތުހުމަތުތަކުގެ ތެރޭގައި ޓެރެރިޒަމަށް ހިތްވަރުދޭ ވާހަކަތައް ދެއްކުމާއި މަނީ ލޯންޑަރިންގެ މައްސަލަތައް ހިމެނެ އެވެ.
ޑރ. ޒާކިރު ނައިކް ވަނީ އޭނާއާ މެދު ކޮށްފައިވާ ހުރިހާ ތުހުމަތުތައް ދޮގުކުރައްވައިފަ އެވެ. އަދި މިއީ މުސްލިމަކަށް ވީތީ ޒާތީ ގޮތުން ވަކި އަތަކަށް ޖެހިފައިވާ މައްސަލައެއް ކަމަށް ޑރ. ނައިކް ވަނީ ވިދާޅުވެފަ އެވެ.