"އޭއެފްސީ ވުމަންސް ފުޓްބޯލް ޑޭ" މިއަދު ރާއްޖޭގައިވެސް ފާހަގަކޮށްފިއެވެ.
ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން މިއަދު ހެންވޭރު ދަނޑުގައި ކުރިއަށް ގެންދިޔަ ހަރަކާތްތަކުގައި ރާއްޖޭގެ ޖޫނިއާ އަދި ސީނިއާ އަންހެން ފުޓުބޯޅަ ޓީމުތަކުގެ ކުޅުންތެރިންގެ އިތުރުން ފުޓުބޯޅައަށް ޝައުގުވެރިކަން ހުންނަ ގިނަ އަދަދެއްގެ އަންހެން ބޭފުޅުންވަނީ ބައިވެރިވެފައެވެ.
އޭއެފްސީން ފާހަގަކުރާ "ވުމަންސް ފުޓުބޯލް ޑޭ"އަކީ މިމަހުގެ އަށްވަނަ ދުވަސް ނަމަވެސް، މި މަސް ނިމެންދެން އެ ދުވަހުގެ ހަރަކާތްތައް އޭޝިއާގެ އެކި ސަރަހައްދުތަކުގައި ކުރިއަށް ގެންދިއުމަށް އޭއެފްސީން ވަނީ ނިންމައިފައެވެ.
29 މާރޗް 2018: "އޭއެފްސީ ވުމަންސް ފުޓްބޯލް ޑޭ" ރާއްޖޭގައި ފާހަގަކުރުމުގެ ގޮތުން ހެންވޭރު ދަނޑުގައި ބޭއްވި ހަރަކާތްތަކުގެ ތެރެއިން --- ސަން ފޮޓޯ/ މުހައްމަދު އަފްރާހް
މިއަދު ބޭއްވި ހަރާކާތުގައި އެފްއޭއެމްގެ ރައީސް ބައްސާމް އަދީލް ޖަލީލްގެ އިތުރުން އެކްސްކޯގެ ބައެއް މެމްބަރުންވެސް ވަނީ ބައިވެރިވެފައެވެ. މީގެ އިތުރުންވެސް އެފްއޭއެމްގެ ޓެކްނިކަލް ޑައިރެކްޓަރު ޖޭން ވަންލީ އަދި ގައުމީ ފުޓުބޯޅަ ޓީމުގެ ކޯޗު ޕީޓާ ސެގަޓްވެސް މިއަދުގެ ހަރަކާތްތަކުގައި ބައިވެރިވެފައިވެއެވެ.
އެފްއޭއެމްގެ އެސިސްޓެންޓް ޓެކްނިކަލް ޑިރެކްޓަރު އިހުސާން އަބްދުލްޣަނީ (ސާންތި) "ސަން ސްޕޯޓްސް" އަށް ވިދާޅުވީ މިއަދު ކުރިއަށް ގެންދިޔަ ހަރަކާތްތަކުގެ މައިގަނޑު މަގުސަދަކީ އޭއެފްސީން އޭޝިއާގެ އަންހެން ފުޓުބޯޅަ ތަރައްގީކުރުމަށް ކުރާ މަސައްކަތުގައި އެފްއޭއެމްގެ ބައިވެރިވުން އޮތްކަން ދެއްކުން ކަމަށެވެ.
ސާންތި ވިދާޅުވީ މިއަދުގެ ހަރަކާތުގައި ރާއްޖޭގެެ 19 އަހަރުން ދަށުގެ އަންހެން ޓީމާއި ސީނިއާ ގައުމީ ޓީމުގެ ކުޅުންތެރިންވެސް ބައިވެރިކަމަށެވެ. މީގެ އިތުރުންވެސް ކްލަބު މޯލްޑިވްސް ކަޕްގައި ކުޅޭ އަންހެން ޓީމުތަކުގެ ކުޅުންތެރިންވެސް މިއަދުގެ ހަރަކާތުގައި ބައިވެރިވެފައިވާ ކަމަށް ސާންތި ފާހަގަކުރެއްވިއެވެ.
ސާންތި ވިދާޅުވީ އެފްއޭއެމްގެ ފަރާތުން ރާއްޖޭގެ އަންހެން ފުޓުބޯޅަ ތަރައްގީ ކުރުމަށް ހާއްސަ މަސައްކަތްތަކެއް ފަށައިގެން ކުރިއަށް ގެންދާ ކަމަށާއި، މިހާރު ފޯކަސް ހުރީ އަތޮޅު ތެރެއިން ހުނަރު ހުރި ސަރަހައްދުތައް ބަލާ އެ ސަރަހައްދުތަކުގައި ހާއްސަ ޕްރޮގްރާމްތަކެއް ކުރިއަށް ގެންދިއުމަށް ކަމަށެވެ.
29 މާރޗް 2018: "އޭއެފްސީ ވުމަންސް ފުޓްބޯލް ޑޭ" ރާއްޖޭގައި ފާހަގަކުރުމުގެ ގޮތުން ހެންވޭރު ދަނޑުގައި ބޭއްވި ހަރަކާތްތަކުގެ ތެރެއިން --- ސަން ފޮޓޯ/ މުހައްމަދު އަފްރާހް
ވޭތުވެދިޔަ ދެތިން އަހަރެއްގެ ތެރޭގައި ރާއްޖޭގެ ސީނިއާ އަންހެން ޓީމު ސަރަހައްދީ ލެވެލްގައި ބޮޑު ކުރިއެރުމެއް ހޯދައިފައިވާ އިރު، މިހާރު ޓީމު ތައްޔާރުވަމުންދަނީ މިއަހަރު ނޭޕާލްގައި އޮންނަ ސާފް ޗެމްޕިއަންޝިޕަށެވެ. އަދި 19 އަހަރުން ދަށުގެ ޓީމު ތައްޔާރުވަމުން ދަނީ މިއަހަރު އިންޑޮނޭޝިއާގައި އޮންނަ އޭޝިއަން ފުޓުބޯޅަ ފެޑަރޭޝަން އިރުދެކުނު އޭޝިއާ ސަރަހައްދުގެ ޔޫތު ޗެމްޕިއަންޝިޕް މުބާރާތަށެވެ.
29 މާރޗް 2018: "އޭއެފްސީ ވުމަންސް ފުޓްބޯލް ޑޭ" ރާއްޖޭގައި ފާހަގަކުރުމުގެ ގޮތުން ހެންވޭރު ދަނޑުގައި ބޭއްވި ހަރަކާތްތަކުގެ ތެރެއިން --- ސަން ފޮޓޯ/ މުހައްމަދު އަފްރާހް
"އޭއެފްސީ ވުމަންސް ޑޭ" ގެ ހަރަކާތްތަން އޭޝިއާގެ އެކިއެކި ގައުމުތަކުގައި ކުރިއަށް ގެންގޮސްފައިވާ އިރު، މިއަހަރު އޭއެފްސީން ބޭނުންކުރަމުން އަންނަ ޝިއާރަކީ "އިޓްސް މައި ގޭމް" ޝިއާރެވެ. އެ ޝިޔާރު ހާއްސަވަނީ އޭޝިއާގެ އެކި ސަރަަހައްދުތަކުގައި މަސައްކަތްކުރާ ފުޓުބޯޅައަށް ލޯބިކުރާ ހުރިހާ އަންހެނުނަށް ކަމަށް އޭއެފްސީން ބުނެފައިވެއެވެ.