މާލޭ ވޯޓާ އެންޑް ސްވަރޭޖު ކޮމްޕެނީ (އެމްޑަބްލިއުއެސްސީ) އަކީ ރާއްޖޭގެ ރައްޔިތުންނަށް ދެމެހެއްޓެނިވި ގޮތެއްގައި ސާފުބޯފެން ޔަގީންކޮށްދިނުމަށް މީގެ 22 އަހަރު ކުރިން ވުޖޫދަށް ގެނައި ކުންފުންޏެކެވެ. ރާއްޖެއަކީ ފެނުގެ ވަސީލަތްތައް މަދު ގައުމަކަށްވެފައި، ދެމެހެއްޓެނިވި ގޮތެއްގައި ކުންފުނީގެ މަސައްކަތް ފުޅާކޮށް ޚިދުމަތް ތަރައްގީކުރުމުގައި މެދުނުކެނޑުމެއްނެތި އެކުންފުނިން ގެންދަނީ މަސައްކަތް ކުރަމުންނެވެ.
ފެނުގެ ވަސީލަތްތަކަށް ކުރިމަތިވެފައިވާ ނުރައްކަލުގެ ސަބަބުން އެންމެނަށް ހަމަހަމަ އަދި ދެމެހެއްޓެނިވި ގޮތެއްގައި ފެން ފޯރުވައިދިނުމުގެ މުހިންމުކަން ރާއްޖޭގައި ވަނީ އިތުރުވެފަ އެވެ. މިއާއެކު ރާއްޖޭގެ އެކި ކަންކޮޅުތަކުގައި އެމްޑަބްލިއުއެސްސީ އިން ގެންދަނީ ފެނާއި ނަރުދަމާގެ ގިނަ މަޝްރޫއުތަކެއް ކުރިއަށް ގެންދަމުންނެވެ.
ފާއިތުވި 22 އަހަރުގެ މާޒީއަށް ބަލާއިރު އެ ކުންފުނިން ވަނީ ފެނުގެ ދާއިރާގައި ކުރިއެރުންތަކެއް ހޯދައިފަ އެވެ. ބާވީސް އަހަރުގެ އިންޖިނިއަރިން ތަޖުރިބާގެ އަލީގައި މިއަދު އެ ކުންފުންޏަކީ ރާއްޖޭގައި ހިންގާ ފެނުގެ ގިނަ މަޝްރޫޢުތައް ކުރިއަށް ގެންދާ ކުންފުންޏެވެ. ރަށްރަށުގައި ގާއިމްކުރާ ފެނާއި ނަރުދަމާގެ ނިޒާމުގެ ގިނަ މަޝްރޫޢުތަކުގައި އެމްޑަބްލިއުއެސްސީގެ ހިއްސާ ބޮޑެވެ.
ފެނާއި ނަރުދަމާއިން އުއްމީދީ ދިރިއުޅުމެއް ހޯދައިދިނުމަށް ސަރުކާރުން ވެފައިވާ ވައުދު ފުރިހަމަކޮށްދިނުމަށް އެމްޑަބްލިއުއެސްސީ އިން ދަނީ ގިނަ މަސައްކަތްތަކެއް ކުރަމުންނެވެ. މި ސަރުކާރުގެ ފަސް އަހަރު ނިމިގެންދާއިރު ރާއްޖޭގެ އާބާދީގެ 75 ޕަސެންޓަށް ފެނާއި ނަރުދަމާ ޚިދުމަތް ފޯރުކޮށްދިނުމަށް ވެފައިވާ ވައުދުގެ ދަށުން، އެމްޑަބްލިއުއެސްސީ އިން ވަނީ ފެނާއި ނަރުދަމާގެ ތަފާތު 54 މަޝްރޫއެއްގެ މަސައްކަތް ކޮށްފަ އެވެ. މީގެ ބައެއް މަޝްރޫއުތައް ނިމި ރައްޔިތުންނަށް އޭގެ ފައިދާ ދަނީ ކުރަމުންނެވެ.
މާލޭގެ ރައްޔިތުންނަށް ފެނުގެ ހިދުމަތް ޔަގީންކަމާއެކު ފޯރުކޮށްދިނުމަށް އެމްޑަބްލިއުއެސްސީ އިން ވަނީ ސަރުކާރުގެ ލަފަޔާއެކު ވޯޓާ ސެކިއުރިޓީ ޕްލޭން އެއް އެކުލަވާލައިފަ އެވެ. މި ޕްލޭންގެ ދަށުން، މާލޭގެ އޮޕަރޭޝަން ސެންޓަރު ޑިސެންޓްރަލައިޒްކޮށް، ރައްޔިތުންނަށް ދެމެހެއްޓެނިވި ގޮތެއްގައި ފެނުގެ ޚިދުމަތް ފޯރުކޮށްދިނުމަށް، ކުންފުނީގެ ފެން އުފައްދާ މައި ކާރުހާނާގެ އިތުރުން ފެން އުފައްދާ އާ މަރުކަޒެއް ވަނީ ގާޢިމް ކޮށްފަ އެވެ.
މި އާރް.އޯ އެނެކްސް ޕްރޮޑަކްޝަން ސެންޓަރަކީ، ދުވާލަކު 5000 ކޮޑިމީޓަރުގެ ފެން އުފެއްދޭނެ މަރުކަޒެކެވެ. އާރް.އޯ އެ މީގެ އިތުރުން ހަވީރީ ހިނގުމުގައި 2000 ކޮޑިމީޓަރުގެ ފެން ޕްލާންޓެއް ބަހައްޓަައި އެތަނުގައި ފެން އުފައްދާ މަރުކަޒެއް ޤާއިމްކުރުމުގެ މަސައްކަތް ވެސް ނިމި މިހާރު ވަނީ ކޮމިޝަންކޮށްފަ އެވެ. އެސެންޓަރު ރަސްމީކޮށް އިފްތިތާޙް ކުރުމުގެ މަސައްކަތް ވެސް ދަނީ ކުރަމުންނެވެ.
މީގެ އިތުރުން، މާލެއާއި ހުޅުލެއާ ދެމެދު އަޅާ ބްރިޖު މެދުވެރިކޮށް އެޅުމަށް ހަމަޖެހިފައިވާ ޕައިޕްލައިންގެ މަސައްކަތްވެސް ހަލުވިކަމާ އެކު ދަނީ ކުރަމުންނެވެ. މި މަޝްރޫއު ނިމުމުން، ގުރޭޓާ މާލޭގެ ރައްޔިތުންނަށް ފެނުގެ ޚިދުމަތް ޔަޤީންކޮށްދިނުމުގެ އަމާޒު ޙާސިލްކުރެވޭނެ ކަމަށް އެމްޑަބްލިއުއެސްސީ އިން ބުނެއެވެ.
ފެންކުންފުނީގެ މަަސައްކަތްތަކުގެ ވާހަކަ ދައްކާއިރު، މިއަދަކީ ބައިނަލްއަޤުވާމީ ފެނުގެ ދުވަހެވެ. މިއަހަރުގެ ފެނުގެ ދުވަހުގެ ޝިއާރެއްގެ ގޮތުގައި އދ. އިން ކަނޑައާޅާފައިވާ ޝިޔާރަކީ "ނޭޗާ ފޯ ވޯޓާ" ( Nature for Water) މި އެވެ. މި ޝިއާރުގެ މަގުސަދަކީ 21 ވަނަ ގަރުނުގައި ސާފުފެން ލިބުމަށް ތިމާވެށީގެ ސަބަބުން ދިމާވެފައިވާ ގޮންޖެހުންތައް ދެނެގަނެ، އެއިގެން އަރައިގަތުމަށް އިސްނަގައި މަސައްކަތްކުރުމެވެ.
ދުނިޔޭގެ ފެނުގެ ވަސީލަތްތަކުގެ ދުރު މުސްތަޤްބަލުގެ ރައްކާތެރިކަމަށް އެޅިފައިވާ އެންމެ ބޮޑު ހުރަހަކީ، މޫސުމަށް އަންނަ ބަދަލުތަކަށްވާއިރު މިބަދަލުތަކުގެ އެންމެ ނުރައްކާތެރި އަސަރުތައް ގުޅިފައިވަނީ ފެނާއެވެ. މިގޮތުން ދުނިޔޭގެ ބައެއް ސަރަޙައްދުތަކަށް އާދަޔާ ޚިލާފަށް ގިނައިން ވާރޭ ވެހުމުގެ ސަބަބުން ފެންބޮޑުވެ، މީހުންގެ ފުރާނައާއި ދަނޑުވެރިކަމަށް ގެއްލުން ލިބެމުންދާއިރު، އަނެއްބައި ސަރަހައްދު ތަކުގައި ވާރޭ ނުވެހުމުގެ ސަބަބުން ހަނަފަސްކަން ދަނީ އިތުރުވަމުންނެވެ. ގުދުރަތީ ގޮތުން މޫސުމަށް އަންނަ މިބަދަލުތަކުގެ ސަބަބުން ރާއްޖެ ފަދަ ކުދި ޖަޒީރާ ގައުމުތަކަށް ގޮންޖެެހުންތައް ކުރިމަތިވެ އެވެ.
ދިވެހި ފެން ކުންފުނިން އަބަދު ވެސް މަސައްކަތް ކުރަމުން ގެންދަނީރައްކާތެރި ބޯފެނާއި ނަރުދަމާގެ ޚިދުމަތުން ރާއްޖޭގެ ދެމެހެއްޓެނިވި ތަރައްޤީއަށް ޙިއްސާކޮށް ރައްޔިތުންގެ ދިރިއުޅުން އަދަށްވުރެ ފާގަތިކޮށްދިނުމަށްކަމަށް އެކުންފުނިން ބުނެއެވެ.