ފުލުހުންގެ މުއައްސަސާގައި މަސައްކަތް ކުރާ ކޮންމެ ފުލުހެއްގެވެސް އަމާޒަކަށް ވާންވީ ފުލުހުންގެ ހިދުމަތް ބޭނުންވާ ރައްޔިތު މީހާގެ ގޭގެ އޮޅިގަނޑާ ހަމައަށް ފުލުހުންގެ ޚިދުމަތް ފޯރުކޮށްދިނުންކަމަށް އެކްޓިންގް ކަމިޝަނާރ އޮފް ޕޮލިސް، ޑެޕިއުޓީ ކަމިޝަނަރ އަބްދުﷲ ނަވާޒު ވިދާޅުވެއްޖެއެވެ.
ޖޫނިއާ އޮފިސަރސް ކޮމާންޑް ކޯސް އިފްތިތާހު ކުރުމަށް އިއްޔެ އިސްކަންދަރު ކޮށީގައި ބޭއްވި ރަސްމިއްޔާތުގައި ނަވާޒް ވިދާޅުވީ ފުލުހުންގެ މުއައްސަސާގެ ކުރިއެރުމާއި ތަރައްގީއަށްޓަކައި ގިނަ މަސައްކަތްތަކެއް މިހާރުވެސް ކުރައްވަމުން ގެންދަވާކަމަށެވެ. އެ މަސައްކަތުގެ ތެރެއިން އެންމެ އިސްކަމެއް ދެއްވަނީ ފުލުހުންނަށް ދޭ ތަމްރީންތައް ހަރުދަނާ ކުރުމަށް ކަމަށް ނަވާޒު ވިދާޅުވިއެވެ.
"އެކިލެވަލްގެ ފުލުހުންނަށް އަމާޒުކޮށްގެން އެފުލުހުންގެ ރޭންކުތަކަށް ނުވަތަ ކުރިއަށް އޮތް ރޭންކަށް އެކަށޭނެ ތަމްރީނުތަކެއް ދިނުމަށް އިސްކަމެއް ދެން،" ނަވާޒު ވިދާޅުވިއެވެ.
އޭނާ ވިދާޅުވީ މަގުމައްޗަށް ފުލުހުން ނުކުންނައިރު އަދި ރައްޔިތުންގެ މުދަލާއި ފުރާނަ ރައްކާތެރިކޮށްދިނުމަށް ނިކުންނައިރު މިފަދަ ތަމްރީންތައް ލިބިފައި ހުރުމަކީ މުހިއްމު ކަމެއް ކަމަށެވެ.
އޭނާ ވިދާޅުވީ ފުލުހުންނަށް ދެވޭ ކޮންމެ ތަމްރީނެއްގެވެސް ބޭނުން ރަނގަޅު ގޮތުގައި ހިފަން ޖެހޭނެ ކަމަށެވެ.
"ކޮންމެ ފުލުހެއްގެވެސް އަމާޒަކަށް ވާންވީ ފުލުހުންގެ ޚިދުމަތް ބޭނުންވާ ރައްޔިތުމީހާގެ ގޭ އޮޅިގަނޑާ ހަމައަށް ފުލުހުންގެ ހިދުމަތް ފޯރުކޮށްދިނުން،" ނަވާޒު ވިދާޅުވިއެވެ.
ޖޫނިއާ އޮފިސަސް ކޮމާންޑް ކޯހާ ގުޅޭގޮތުން ފުލުހުން ބުނީ އެ ކޯހަކީ މުޅިން އަލަށް ފަށަން ހަމަޖެހިފައިވާ ކޯހެއް ކަމަށާއި އެ ކޯސް ފަށާނީ އަންނަ މަހު ކަމަށެވެ. އަދި އެ ކޯހުގެ ތެރެއިން ކޮމިޝަންޑް އޮފިސަރުންގެ ކިބައިގައި ހުންނަންޖެހޭ އެންމެހާ ސިފަތަކާއި މުހިންމު ތަމްރީންތައް ދަސްކޮށްދޭނެ ކަމަށް އޭނާ ވިދާޅުވިއެވެ.