އާއިލީ މައްސަލަތަކާއި ގެވެށި އަނިޔާގެ މައްސަލަތަކުގައި ހިލޭ ގާނޫނީ ލަފާ ފޯރުކޮށްދޭ "ފެމިލީ ލީގަލް ކްލިނިކް" ހިންގުމަށްޓަކައި ބޭނުންވާ ފައިސާ ހޯދުމަށްޓަކައި ފެށި "ކްރައުޑް ފަންޑިންގް ކެމްޕޭން" އަނެއްކާވެސް ފަށައި، އެ ޖަމިއްޔާއަށް އެހީތެރިކަން ފޯރުކޮށްދިނުމުގެ ފުރުސަތު އާންމުންނަށް ހުޅުވާލައިފިއެވެ.
ފެމިލީ ލީގަލް ކްލިނިކުން މި ކެމްޕޭން ފުރަތަމަ ފެށީ ފެބްރުއަރީ އެއްވަނަ ދުވަހުއެވެ. އެހެން ނަމަވެސް މީހުން ހޭލުންތެރިކުރުވުމުގެ ބައެއް ހަރަކާތްތައް ހިންގުމަށްޓަކައި، ކްރައުޑް ފަންޑިންގް މަޑުޖައްސާލިއެވެ.
ފެމިލީ ލީގަލް ކްލިނިކުން ބުނި ގޮތުގައި މިއަދުން ފެށިގެން، އޭޕްރިލް 15 ވަނަ ދުވަހާ ހަމައަށް މި ހަރަކާތް ކުރިއަށް ދާނެއެވެ.
"ގާނޫނީ އެހީ ހިލޭ ބޭނުންވާ ފަރާތްތަކަށް މި ޚިދުމަތް ފޯރުކޮށްދިނުމުގެ ގޮތުން ވިޔަފާރިތަކާއި އާންމު ރައްޔިތުންގެ ފަރާތުން މާލީ އެހީތެރިކަން އަޅުގަނޑުމެން ބޭނުންވޭ. ގެވެށި އަނިޔާއާއި އާއިލީ މައްސަލަތައް ތަހައްމަލުކުރަމުންދާ އަންހެނުން، ފިރިހެނުން އަދި ކުޑަކުދިންނަށް އެހީތެރިވުމަށް ވީ މިންވަރަކުން އެހީވުމަށް އަޅުގަނޑުމެން ބާރުއަޅަން،" ފެމެލީ ލީގަލް ކްލިނިކުން ބުންޏެވެ.
ފެމިލީ ލީގަލް ކްލިނިކުން ބުނީ އެހީގެ ގޮތުގައި ލިބޭ ހުރިހާ ފައިސާއެއް ބޭނުންކުރާނީ އާއިލާތައް ގުޅުވައިދީ، އަނިޔާ ލިބިފައިވާ ފަރާތްތައް ބާރުވެރިކުރުމަށާއި، އަމިއްލަ ވާހަކަތައް ހިއްސާކުރުމަށް ރައްކާތެރި އޮފީސް މާހައުލެއް ހިންގުމަށާއި، ފުލް-ޓައިމް ވަކީލަކާއި ސަޕޯޓް ސްޓާފުންގެ ޚިދުމަތް ފޯރުކޮށްދިނުމުގެ ކަންކަން ހަމަޖެއްސުމަށެވެ.
އެ ކްލިނިކުގައި، 17 ގާނޫނީ ވަކީލެއް ހިލޭ ސާބަހަށް މަސައްކަތް ކުރައްވާ އިރު، އެ ވަކީލުންނަކީ ޖެންޑާ ބޭސްޑް ވަޔަލެންސް ހުއްޓުވުމާ ބެހޭ ޚާއްސަ ތަމްރީނުތަކަކާއި ކޮމިއުނިކޭޝަން ސްކިލް ލިބިފައިވާ ވަކީލުންނެވެ.
ފެމިލީ ލީގަލް ކްލިނިކުން މިހާތަނަށް 178 ފަރާތަކަށް، ޖުމްލަ 100 އަށް ވުރެ ގިނަ ގަޑި އިރު ޚިދުމަތް ކޮށްދީފައެވެ. އެ ކްލިނިކުގައި 119 ކްލަޔަންޓުން ރަޖިސްޓްރީ ކޮށްފައިވެއެވެ.
ފެމިލީ ލީގަލް ކްލިނިކުން ބުނީ، މައްސަލަތަކުގައި އިންސާފު ލިބިގަތުމަށް ހަމަހަމަ ފުރުސަތު ދިނުމުގެ ގޮތުން އެ ކްލިނިކުން ފޯރުކޮށްދޭ ހިލޭ ގާނޫނީ އެހީގެ ޚިދުމަތަށް އެހީހޯދުމަށް ކުރިއަށް ގެންދާ ކެމްޕޭނަކީ، ހޯޕް ފޯރ ވިމެން އެންޖީއޯ، މިނިސްޓްރީ އޮފް ޖެންޑާ އެންޑް ފެމިލީ، މިނިސްޓްރީ އޮފް އެންވަޔަރަންމަންޓް އެންޑް އެނާޖީ އަދި އުރީދޫ މޯލްޑިވްސްއިން އެންޑޯޒްކޮށްފައިވާ ކެމްޕޭނެއް ކަމަށެވެ.