އެސްޓީއޯ މާލޭ ލީގުގައި މިއަހަރު ކުޅުނު ފުރަތަމަ މެޗުން ކްލަބު ވެލެންސިއާ ބަލިވެފައި އޮތް ނަމަވެސް ކުޅުންތެރިންނަށް ފުރިހަމަ އިތުބާރު އެބައޮތް ކަމަށާއި، މިރޭގެ މެޗަކީ ކްލަބު އީގަލްސްއަށްވެސް ފަސޭހަ މެޗަކަށް ނުވާނެ ކަމަށް ވެލެންސިއާ ކޯޗު ސޮބާހު މުހައްމަދު (ސޮބާ) ބުނެފިއެވެ.
މާލޭ ލީގުގައި މިރޭ އީގަލްސްއާ ވެލެންސިއާ ވާދަކުރާ މެޗު އޮންނައިރު، ވެލެންސިއާއިން ފުރަތަމަ މެޗުގައި ޔުނައިޓެޑް ވިކްޓްރީ (ޔޫވީ)އާ ދެކޮޅަށް ކުޅެ ބަލިވީ 3-0 ގެ ނަތީޖާއަކުންނެވެ.
"ފެށުން ވަރަށް ދަށްކޮށް ދިޔައީ. ހިތްހަމަ ޖެހޭ ވަރަށް ޕާފޯމްވެސް ނުކުރި ޓީމެއް. އެއީ އަޅުގަނޑު ގަބޫލުކުރާ ގޮތުގައި ފިޓްނަސް އަދި ދަށްވިނަމަވެސް ފުރަތަމަ 60 ނޫނީ 70 ވަރަކަށް މިނެޓް ޕާފޯމް ކުރެވެން ޖެހޭނެ. އެކަމަކު ފެނުނީ އެޓިޓިއުޑާ މަސައްކަތު ރޭޓްވެސް ވަރަށް ދަށްކޮށް. އަޅުގަނޑަކީ ކޯޗިން ކެރިއަރުގައި މަދު ދުވަސްކޮޅެއް ހޭދަކޮށްފައިވާ ކޯޗެއް ނަމަވެސް އެއީ އަޅުގަނޑާއެކު ޓީމެއް އެންމެ ދަށްކޮށް ޕާފޯމް ކުރި މެޗު. ފުޓުބޯޅަ އެނގޭ ބަޔަކަށް އެނގޭނެ ޔޫވީއާ ދެކޮޅަށް އެއަށްވުރެ ރަނގަޅު މެޗެއް ކުޅެވޭނެ ކަން،" ފުރަތަމަ މެޗާ ގުޅިގެން ސޮބާ ބުންޏެވެ.
އެސްޓީއޯ މާލެ ލީގުގައި ޔުނައިޓެޑް ވިކްޓަރީ އާއި ވެލެންސިޔާ ބައްދަލުކުރި މެޗުގެ ތެރެއިން: 3-0 ގެ ނަތީޖާއަކުން މެޗު ކާމިޔާބް ކުރީ ޔޫވީއިން---ސަން ފައިލް ފޮޓޯ/ މުހައްމަދު އަފްރާހް
ސޮބާ ބުނީ އީގަލްސްގެ ކޯޗު، މުހައްމަދު ޝިޔާޒް (މޯހަން)އަކީ އޭނާ ވަރަށް އިހުތިރާމް ކުރާ ކޯޗެއް ކަމަށާއި ނުކުންނާނީ އީގަލްސްގެ ވަރުގަދަކަން ދަނެގެން ކަމަށެވެ.
"މޯހަން ކޯޗަށް ވަރަށް ބޮޑަށް އިހުތިރާމް ކުރަން. ކުޑައިރުއްސުރެ އަޅުގަނޑަށް ވަރަށް ބައިވަރު އެއްޗެހިތަކެއް ދަސްކޮށްދިން ކޯޗެއް އެއީ. އެގޮތުން އީގަލްސްއާ ކޯޗަށް ފުރިހަމަ އިހުތިރާމެއް ދޭނަން. އީގަލްސްގެ ހުރިހާ ކުޅުންތެރިންގެ ކުޅުންވެސް ބަލައި އެކަމަށް ބަލައިގެން ނުކުންނާނީ. ހާއްސަކޮށް އީގަލްސްގެ ބައެއް އިންޑިވިޖުއަލް ކުޅުންތެރިން. ރިޒޭއާ އެޓީމުގެ ކުރިއަށް ކުޅޭ ފޯވަޑް. ކުރިން މެޗުގައިވެސް ރިޒޭ ނުކުތުމާއެކު މުޅި މެޗު ބަދަލުވެގެން ދިޔައީ. ޒުވާން ވިޔަސް އީގަލްސްގެ ހުރިހާ ކުޅުންތެރިންނަކީވެސް އަވަސް ކުޅެމެއް ކުޅޭ ކުޅުންތެރިން. އެހެން ނަމަވެސް އީގަލްސް ހީކުރާވަރުގެ ފަސޭހަ މެޗަކަށް ވެލެންސިއާ މެޗު ނުވާނެ. ވެލެންސިއާވެސް މިދަނީ ކުރިއަރަމުން،" ސޮބާ ބުންޏެވެ.
ސޮބާ ބުނީ މިރޭގެ މެޗުން ރަނގަޅު ނަތީޖާއެއް ނެރުމަށް ހުރިހާ ކުޅުންތެރިންނަށާއި އަމިއްލަ ނަފްސަށްވެސް އިތުބާރު އެބައޮތް ކަމަށެވެ.
"ޔޫވީ އަތުން 3-0 އިން ބަލިވި ނަމަވެސް ކުޅުންތެރިންނަށް އަޅުގަނޑު އިތުބާރުކުރަން. އަޅުގަނޑަށްވެސް އިތުބާރު އެބައޮތް އަދި ނަތީޖާ ބަދަލުކޮށްލެވޭނެ ކަމަށް. ވަރުގަދަ މެޗަކަށް ވެގެންދާނެ. ފުޓުބޯޅައިގައި ކޮންމެ މެޗަކީވެސް ތަފާތުތަކެއް އަންނާނެ މެޗުތަކެއް. އަޅުގަނޑަކީ ދޫކޮށްލާނެ މީީހެއް ނޫން. އަޅުގަނޑަކީ މިސްޓޭކްތަކުން ރަނގަޅު ކުރާ މީހެއް. އަޅުގަނޑަކީވެސް ޖާދޫ ހަދާމީހެއް ނޫން. ހަމަ އެންމެ ޕްރެކްޓިހަކުން އައިސް ރާއްޖޭގެ ހުރިހާ ޓީމެއް ބައްޔެއްވެސް ނުކުރެވޭނެ،" ސޮބާ ބުންޏެވެ.
ސޮބާ ބުނީ ސަޕޯޓަރުންވެސް އޭނާއަށް އިތުބާރު ކުރުމަށް އެދޭ ކަމަށާއި ވެލެންސިއާގެ މިސްރާބުހުރީ ރަނގަޅަށްކަން އޭނާ ޔަގީންކޮށްދޭ ކަމަށެވެ.
މިދިޔަ އަހަރު މާލޭ ލީގްގައި ވެލެންސިއާ އާއި ގްރީން ސްޓްރީޓް ބައްދަލުކުރި މެޗުގެ ތެރެއިން: ސޮބާވަނީ މިދިޔަ އަހަރު ގްރީން ދިވެހި ޕްރިމިއާ ލީގަށް ކޮލިފައިކޮށްދީފަ -- ސަން ފައިލް ފޮޓޯ/ ފަޔާޒު މޫސާ
މިރޭގެ މެޗަށް ނުކުންނައިރު އީގަލްސްއަށް އޮތް ހިތްހަމަ ޖެހުމަކީ މާލޭ ލީގުގެ ފުރަތަމަ މެޗުގައި ފަހަތުން އަރައި ވިކްޓްރީ ސްޕޯޓްސް ކްލަބު ބަލިކޮށްފައި އޮތުމެވެ. އީގަލްސްއިން ވިކްޓްރީ ބަލިކުރީ 4-1 ގެ ނަތީޖާއަކުންނެވެ.
"ކުޅުންތެރިން މަސައްކަތް ކުރަމުންދަނީ ވަރަށް ރަނގަޅަށް. މެޗަށް ތައްޔާރުވުމާ ދޭތެރޭ ހުރިހާ ކުޅުންތެރިންވެސް ހިތްހަމަ ޖެހޭ. ފުރަތަމަ ދުވަހު ލިބުނު ކާމިޔާބީއަކީ ހުރިހާ ކުޅުންތެރިންނަށްވެސް، ހާއްސަކޮށް އާ ކުޅުންތެރިންނަށް ލިބިގެންދިޔަ ވަރަށް ބޮޑު ހިތްހަމަ ޖެހުމެއް. ފަހަތުން އަރައި މޮޅުވެވުނީމަ ވަރަށް ބޮޑު ހިތްހަމަ ޖެހުމެއް ލިބުނު. ދެން އެންމެ ރަނގަޅަށް ހުރިހާ ކަމެއް ނުދިޔަސް، އެކަންކަން ކުރިއަށް އޮތްތާނގައި ރަނގަޅުވާނެ ކަމަށް މިބަލަނީ،" ވިކްޓްރީ މެޗުން ލިބުނު ހިތްހަމަޖެހުން ކޯޗު މޯހަން ހިއްސާކުރިއެވެ.
މިދިޔަ އަހަރުގެ މިނިވަން ޗެމްޕިއަންޝިޕް ފައިނަލް މެޗުގެ ތެރެއިން: ގދ. ތިނަދޫ 2-0 ގެނަތީޖާއިން ބަލިކޮށް ޗެމްޕިއަންކަން ހޯދީ މޯހަން ކޯޗުކޮށްދިން ދ. ކުޑަހުވަދޫ -- ސަން ފައިލް ފޮޓޯ/ ފަޔާޒު މޫސާ
މިދިޔަ އަހަރުގެ މާލޭ ލީގުގެ ބައެއް މެޗުތަށް އީގަލްސް އަތުން ގެއްލި ދިވެހި ޕްރިމިއާ ލީގުގެ ޖާގަ ގެއްލިފައިވާއިރު، މޯހަން ބުނީ މިއަހަރު މަސައްކަތްކުރަނީ އެކަން ތަކުރާރުވިޔަ ނުދޭން ހުރިހާ ގޮތެއް ވިސްނައިގެން ކަމަށެވެ.
"ހަގީީގަތުގައި މިއަހަރު އެންމެ ފުރަތަމަ ދުވަހުން ފެށިގެން އަޅުގަނޑު ކުޅުންތެރިންނަށް ވިސްނައިދެމުން މިދިޔައީ، މިދިޔަ އަހަރުގެ މާލޭ ލީގުގައި ދިމާވި ކަންތައް އަނބުރާ އިޔާދަ ނުވާކަހަލަ ގޮތަކަށް މަސައްކަތް ކުރުން. މިފަހަރު ޕްރިމިއާ ލީގަށް ކޮލިފައިވާން ވިސްނުން ގެންގުޅެން. މިދިޔަ އަހަރު ހެދިފައިހުރި މިސްޓޭކްތަކަށް ބަލައި އެކަން ރަނގަޅުކުރަން މަސައްކަތް މިކުރަނީ،" ކޯޗު މޯހަން ބުންޏެވެ.
މިދިޔަ އަހަރުގެ މިނިވަންޗެމްޕިއަންޝިޕް ކުޑަހުވަދުއަށް ކާމިޔާބުކޮށްދިން ކޯޗު މޯހަން ބުނީ މެޗުތަކަށް ނުކުންނަނީ އިދިކޮޅު ޓީމަށް ބަލައި ޓާގެޓްތަކެއް ކަނޑައަޅައިގެން ކަމަށެވެ.
"ދިވެހި ލީގަށް ކޮލިފައިވުމަށް ބައެއް ޓީމުތަށް އަތުން ކޮންމެހެންވެސް ޕޮއިންޓް ނަގަން ޖެހޭނެ، އެ ޓީމުތަކާ ދެކޮޅަށް ކުޅުންތެރިން ފޯކަސް ކުރުވައިގެން ނުކުންނާނީ. އެއްވެސް މެޗަކީ ފަސޭހަ ވާނެ މެޗެއް ނޫން. އެކަން އިންނާނެ ކުޅުންތެރުންގެ ވިސްނުމުގައި،" މޯހަން ބުންޏެވެ.
އީގަލްސްއާއި ވެލެންސިއާ ވާދަކުރާ މެޗު އޮންނާނީ މިރޭ 9:00 ގައެވެ.