އިންޑިއާގެ މުސްލިމުންނަށް ކުރިން ދެމުންގެންދިޔަ ހައްޖު ސަބްސިޑީ އުވާލުމަށްފަހު، އިންޑިއާ ކްރިސްޓިއަނުންނަށް ހިލޭ ގުދުސަށް ދެވޭނެގޮތް ހަދައިދޭނެ ކަމަށް އެގައުމުގައި ވެރިކަން ކުރާ ބާރްތިޔާ ޖަންތާ ޕާޓީ (ބީޖޭޕީ) އިން ބުނެފިއެވެ.
އިންޑިއާގެ ގާނޫނު ހަދާ މަޖިލީހުގެ މެމްބަރުން އިންތިހާބުކުރުމަށް ފެބްރުއަރީ މަހު 27 ވަނަ ދުވަހު ބާއްވާ އިންތިހާބުގައި، ނާގަ ލޭންޑް ސްޓޭޓްގެ ކެމްޕޭންގައި ބީޖޭޕީއިން ބުނީ ، ބީޖޭޕީއަށް އެ ސްޓޭޓް ކާމިޔާބު ކުރެވިއްޖެނަމަ، ކްރިސްޓިއަނުން ގުދުސަށް ހިލޭ ޒިޔާރަތްކުރުމުގެ ފުރުސަތު ދޭނެ ކަަމަށެވެ.
ނާގަ ލޭންޑްގެ އާބާދީގައި ކްރިސްޓިއަނުން 88 ޕަސެންޓްް ހިއްސާކުރެއެވެ.
އިންޑިއާގެ މުސްލިމުންނަށް ދެމުންގެންދިޔަ ހައްޖު ސަބްސިޑީ އުވާލަައި ކްރިސްޓިއަނުންނަށް ސަބްސިޑީ ދޭނެކަމަށް ބުނުމުން މިއީ އިންސާފުވެރި ނިންމުމެއް ނޫންކަމަށް މިހާރުވެސް ގިނަ ބަޔަކު ދަނީ ބުނަމުންނެވެ.
އިންޑިއާގެ ތެލަންގާނާ ސްޓޭޓްގެ ގާނޫނު ހަދާ މަޖިލީހުގައި ހިމެނޭ މުސްލިމު މެންބަރު އަކުބަރުއްދީން އޮވައިސީ ވިދާޅުވީ އިންޑިއާއިން ހައްޖު ސަބްސިޑީ ދެނީ ވޯޓް ހޯދުމުގެ ނިޔަތުގައި ކަމަށެވެ.
އިންޑިއާ ސަރުކާރުން މިހާރުވެސް ދަނީ އެގައުމުގެ ހިންދޫންގެ އެކި އަޅުކަންތައް އަދާކުރުމަށް ސަބްސިޑީތައް ދެމުންނެވެ.
ގުދުސަށް ޒިޔާރަތްކުރުމަށް ނައިޖީރިއާއިން މިހާރުވެސް ދަނީ އެގައުމުގެ ކްރިސްޓިއަނުންނަށް ސަބްސިޑީ ދެމުންނެވެ. މުސްލިމުންނެކޭ އެއްގޮތަށް ގުދުސަކީ ކްރިސްޓިއަނުންނާއި ޔަހޫދީންނަށްވެސް މުގައްދަސްތަނެކެވެ.