އާއިލީ މައްސަލަތަކާއި ގެވެށި އަނިޔާގެ މައްސަލަތަކުގައި ހިލޭ ގާނޫނީ ލަފާ ފޯރުކޮށްދޭ "ފެމިލީ ލީގަލް ކްލިނިކް" ހިންގުމަށްޓަކައި ބޭނުންވާ ފައިސާ ހޯދުމަށްޓަކައި ކްރައުޑް ފަންޑިންގް ކެމްޕޭނެއް ފަށައިފިއެވެ.
ފެމިލީ ލީގަލް ކްލިނިކަކީ، އާއިލާއާ ބެހޭ ގާނޫނާއި ގެވެށި އަނިޔާ ހުއްޓުމާ ބެހޭ ގާނޫނުގެ ދަށުން ދިވެހި ރައްޔިތުންނަށް ބޭނުންވާ ގާނޫނީ ލަފާ އެއްވެސް އަގަކާ ނުލައި ފޯރުކޮށްދިނުމަށްޓަކައި 2014 ވަނަ އަހަރު އުފެއްދި ޖަމިއްޔާއެކެވެ.
އެ ކްލިނިކުގައި، 17 ގާނޫނީ ވަކީލެއް ހިލޭ ސާބަހަށް މަސައްކަތް ކުރައްވާ އިރު، އެ ވަކީލުންނަކީ ޖެންޑާ ބޭސްޑް ވަޔަލެންސް ހުއްޓުވުމާ ބެހޭ ޚާއްސަ ތަމްރީނުތަކަކާއި ކޮމިއުނިކޭޝަން ސްކިލް ލިބިފައިވާ ވަކީލުންނެވެ.
ފެމިލީ ލީގަލް ކްލިނިކުން މިހާތަނަށް 178 ފަރާތަކަށް، ޖުމްލަ 100 އަށް ވުރެ ގިނަ ގަޑި އިރު ޚިދުމަތް ކޮށްދީފައެވެ. އެ ކްލިނިކުގައި 119 ކްލަޔަންޓުން ރަޖިސްޓްރީ ކޮށްފައިވެއެވެ.
ފެމިލީ ލީގަލް ކްލިނިކުން ބުނީ، މައްސަލަތަކުގައި އިންސާފު ލިބިގަތުމަށް ހަމަހަމަ ފުރުސަތު ދިނުމުގެ ގޮތުން އެ ކްލިނިކުން ފޯރުކޮށްދޭ ހިލޭ ގާނޫނީ އެހީގެ ޚިދުމަތަކީ ހޯޕް ފޯރ ވިމެން އެންޖީއޯ، މިނިސްޓްރީ އޮފް ޖެންޑާ އެންޑް ފެމިލީ، މިނިސްޓްރީ އޮފް އެންވަޔަރަންމަންޓް އެންޑް އެނާޖީ އަދި އުރީދޫ މޯލްޑިވްސްއިން އެންޑޯޒްކޮށްފައިވާ ޚިދުމަތެއް ކަމަށެވެ.
ޚިދުމަތްތައް ފޯރުކޮށްދިނުމަށާއި ކްލިނިކު ހިންގުމަށް ބޭނުންވާ ޚަރަދުތައް ހޯދުމަށް ފެމިލީ ލީގަލް ކްލިނިކުން ހިންގާ ކްރައުޑްފަންޑިންގް ކެމްޕޭނުގެ ދަށުން، ފެމިލީ ލީގަލް ކްލިނިކގެ "ގޯ ފަންޑް މީ" ޕޭޖު މެދުވެރިކޮށް ފައިދާ ޑޮނޭޓު ކުރެވޭނެއެވެ.
ނުވަތަ އެ އެފްއެލްސީގެ ބޭންކް އެކައުންޓަށް ޑޮނޭޝަން ޓްރާންސްފާވެސް ކުރެވޭނެއެވެ.
އެކައުންޓް ނަމްބަރ: 1602005986
ބޭންކް: ކޮމާޝަލް ބޭންކް އޮފް މޯލްޑިވްސް
އެފްއެލްސީއިން ބުނީ، ފައިސާގެ އެހީތެރިކަން ފޯރުކޮށްދޭ ފަރާތްތަކަށް ދެފުށް ފެންނަ ގޮތަށް ކަންކަން ކުރުމަށްޓަކައި، ކްރައުޑްފަންޑިންގް މެދުވެރިކޮށް ލިބޭ ފައިސާތައް ޕަބްލިކްކޮށް އޮޑިޓު ކުރެވޭނެ ކަމަށެވެ. މި މަސައްކަތް ކުރާނީ ޕްރޫޑެންޓް ޗާޓާޑް އެކައުންޓިންގްއިންނެވެ.
ފެމިލީ ލީގަލް ކްލިނިކުގެ ކޯފައުންޑަރ ހައްވާ ޝަފީއާ ރިޒާ ވިދާޅުވީ، ގާނޫނީ އެހީ ނުލިބި ހުރި ގިނަ އާއިލާތަކަކުން ތަހައްމަލު ކުރަންޖެހިފައިވާ އުނދަގޫތަކުގެ އެތައް ވާހަކަތަކެއް އަޑު އިވިފައިވާ ކަމަށެވެ.
"ފެމިލީ ލީގަލް ކްލިނިކުން ގަބޫލުކުރަނީ، ގާނޫނީ އެހީތެރިކަމަކީ ހަމައެކަނި މަދު ބައެއްގެ އަތް ފޯރާ ފަށުގައިވާ ޚިދުމަތެއް ނޫން ކަމަށް. ކްރައުޑްފަންޑު ކުރުމަށް އަޅުގަނޑުމެން މި ކުރާ މަސައްކަތުން ބޭނުންވަނީ، ފައިސާ ހުރި ފަރާތްތަކުގެ އެހީ، ފައިސާއަށް ބޭނުންޖެހޭ ފަރާތްތަކަށް ފޯރުކޮށްދޭން ބާރު އެޅުން،" ޝަފީއާ ވިދާޅުވިއެވެ.
ރާއްޖޭގައި ހަތަރު ލައްކައިގެ އާބާދީގެ ތެރެއިން، ކޮންމެ ތިން އަންހެނަކުން އެކަކަށް އޭނާގެ ހަޔާތުގެ ކޮންމެވެސް ހިސާބެއްގައި، ކޮންމެވެސް ކަހަލަ ޖިސްމާނީ ނުވަތަ ޖިންސީ އަނިޔާއެއް ލިބިފައިވެއެވެ. ގިނަ ދިވެހީން، ޚާއްސަކޮށް އަންހެނުންނާއި، ނުކުޅެދުންތެރިކަން ހުންނަ މީހުންނާއި، އުމުރުން ދުވަސްވީ މީހުންގެ އިތުރުން އާމްދަނީ މަދުން ލިބޭ މީހުންނަށް ކުރިމަތިވާ މައްސަލަތަކުގައި ގާނޫނީ އެހީ ހޯދޭހާ ތަނަވަސްކަމެއް ނުހުރެއެވެ.
މީގެ އިތުރުން ރާއްޖޭގައި މަސައްކަތް ކުރާ ގާނޫނީ ވަކީލުންގެ 99 ޕަސަންޓު އުޅެނީ މާލޭގައެވެ. މާނައީ، ރާއްޖޭގެ އާބާދީގެ ދެބައި ކުޅަ ތިންބައި މީހުންނަށް ގާނޫނީ ވަކީލެއްގެ އެހީތެރިކަން ހޯދޭނެ ސީދާ ގޮތެއް ފަހިވެފައެއް ނުވެއެވެ.