ރާއްޖޭގެ އެންމެ ދުވަސްވީ އެއް ސްކޫލް ކަމަށްވާ އީޕީއެސް ނުވަތަ މިހާރުގެ ބިލަބޮންގް ހައި އީޕީއެސް އިންޓަނޭޝަނަލް ސްކޫލަށް 50 އަހަރު ފުރޭ މުނާސަބަތާ ގުޅިގެން، ރަންޔޫބީލް ކުލަގަދަކޮށް ފާހަގަ ކުރުމުގެ ގޮތުން ގިނަ ހަރަކާތްތެކެއް ފެށުމަށް ތައްޔާރީތައް ވާން ފަށައިފިއެވެ.
އީޕީއެސްގެ ރަންޔޫބީލް ފާހަގަކުރުމާ ބެހޭ ގޮތުން މައުލޫމަތު ދިނުމަށް އިއްޔެ ހަވީރު ބޭއްވި ނިއުސްކޮންފަރެންސްގައި ވާހަަކަ ދައްކަވަމުން ރަންޔޫބީލް ފާހަގަ ކުރުމަށް އެ ސްކޫލުގެ މުސްކުޅި ދަރިވަރުން އެކުލަވާލި ވަގުތީ ކޮމެޓީގެ ޕީއާރު އަދި މީޑިއާ ކޯޑިނޭޓަރު މުހައްމަދު ސަލީމް ވިދާޅުވީ، އެ ސްކޫލްގެ 50 ވަނަ އަހަރީ ދުވަސް ފާހަގަ ކުރުމަށް ތަފާތު ގިނަ ހަރަކާތްތައް ކުރިއަށް ގެންދިޔުމަށް ނިންމައިފައިވާ ކަމަށެވެ.
އީޕީއެސްގެ އަހަރީ ދުވަހަކީ 21 ޖޫން އެވެ.
ސަލީމް ވިދާޅުވީ، ބިލަބޮންގް ހައި އީޕީއެސް އިންޓަނޭޝަނަލް ސްކޫލުގައި މިރޭ ބާއްވާ ޖަލްސާގައި ރަންޔޫބީލް ފާހަގަ ކުރުމުގެ ގޮތުން ތަފާތު ހަރަކާތްތައް ހިންގުމަށް މަޝްވަރާ ކުރާނެ ކަމަށެވެ.
އެގޮތުން އީޕީއެސް ސްކޫލުގެ ނަމުގައި ޖަމިއްޔާއަކާއި އަދި ފައުންޑޭޝަނެއް އުފައްދައި އަހަރީ ދުވަހު ގައުމީ ފެންވަރުގެ ޖަލްސާއެއް ބާއްވައި، ސްކޫލުގެ ފައުންޑަރުންނާއި ގިނަ ދުވަހު ސްކޫލަށް ހިދުމަތްކުރެއްވި ޓިީޗަރުންނާއި މުވައްޒަފުންގެެ އަގު ވަޒަން ކުރުމުގެ އިތުރުން ރަންޔޫބީލްގެ ހަނދާނީ ފޮތެއް ނެރުމާއި އަދި ސްކޫލުގެ ދަރިވަރުންނާއި ބެލެނިވެރިންނާއި މުދައްރިސުން ބައިވެރިވާ ޕެރޭޑެއް ބޭއްވުމަށް މަޝްވަރާކުރުމަށް މިރޭ ހަމަޖެހިފައިވާ ކަމަށް ސަލީމް ވިދާޅުވިއެވެ.
ރަންޔޫބީލް ފާހަގަ ކުރުމުގެ ގޮތުން ފޮޓޯ މައުރަޒަކާއި ފެޝަން ޝޯއެއް ބޭއްވުމާއި ލަވަ އަލްބަމެއް ނެރުމާއި، އީޕީއެސް ސްކޫލުގެ ހަޔާތުގެ މައްޗަށް ވީޑިއޯ ޑޮކިޔުމެންޓްރީއެއް އުފެއްދުގެ އިތުރުން، އީޕީއެސް ސްކޫލުގެ ނަންމަތީ ސްކޯލާޝިޕް ސްކީމްއަކާއި، ރަންޔޫބީލް ފާހަގަ ކުރުމަށް ހަނދާނީ ސުވެނިއާއެއް ހަދައި، ހެޔޮއެދޭ ފަންޑު ރެއިޒިންގެ ހަރަކާތްތައް ބޭއްވުމާއި، އީޕީއެސްގެ ހަނަދާނުގައި މޮނިޔުމެންޓެއް ބެހެއްޓުމާއި އަދި ކާނިވަލް ހަރަކާތްތައް ހިންގުމާ ބެހޭގޮތުން މަޝްވަރާކުރުމަށް ވެސް ހަމަޖެހިފައިވަ ކަމަށްވެ ސަލީމް ވިދާޅުވިއެވެ.
ސަލީމް ވިދާޅުވީ، ރަންޔޫބީލްގެ ހަރަކާތްތައް ފެށުމުގެ ގޮތުން މިރޭ 8:30ގައި އެ ސްކޫލުގައި ޖަލްސާއެއް ބޭއްވުމަށް ހަމޖެހިފައިވާ ކަމަށެވެ. އަދި އެ ޖަލްސާގައި ކޮމެޓީތައް އެކުލަވާލައި ކޯޑިނޭޓަރުން ކަނޑައަޅައި ރަންޔޫބީލް ހަރަކާތްތައް ކުރިއަށް ގެންދާނެގޮތްތައް ނިންމާނެ ކަމަށްވެސް ސަލީމް ވިދާޅުވިއެވެ.
އީޕީއެސް ސްކޫލަށް 50 އަހަރު ފުރޭއިރު، ކުރިއަށް އޮތް ތަނުގައިވެސް "އީޕީއެސް"ގެ ނަން ބޭނުންކުރުމަށް ކެމްޕޭނެއް ލޯންޗު ކުރުމަށް މަސައްކަތް ކުރަމުންދާ ކަމަށް ވަގުތީ އިންތިޒާމީ ކޮމެޓީގެ ސެކެޓްރީ މުހައްމަދު ވަޖީހު ވިދާޅުވިއެވެ.
" އީޕީއެސްގެ ނަމުގައި ކުރިން ހިނގަމުން އައި ސްކޫލް 2008 ވަަނަ އަހަރާ ހަމައަށް މިއޮތީ. އޭގެ ފަހުން އީޕީއެސް ބިލަބޮންގް ހައި އިންޓަނޭޝަނަލް ސްކޫލުގެ ނަމުގައި. މިއަހަރާ ހަމައަށް އެނަން ބޭނުންކުރެވޭނެ. ކުރިއަށް އޮތް ތާނގައި އަޅުގަނޑުމެން މަސައްކަތް މިކުރަނީ އެނަން ދިރުވޭތޯ،" ވަޖީހު ވިދާޅުވިއެވެ.
ވަގުތީ ކޯޑިނޭޓިން ކޮމެޓީގެ ވައިސް ޗެއާމަން ޝާއިރާ ސަލީމް ވިދާޅުވީ، މިރޭ އޮންނަ ޖަލްސާގައި ރަންޔޫބީލް ފާހަގަކުރުމުގެ ގޮތުން ލޯގޯއާއި ވެބްސައިޓް ވެސް އިފްތިތާހު ކުރުމަށް ހަމަޖެހިފައިވާ ކަމަށެވެ.
މިރޭ ބާއްވާ ބޮޑު ޖަލްސާގައި، އީޕީއެސް ސްކޫލްގެ ކުރީގެ ދަރިވަރުން ބައިވެރިވެވަޑައިގަތުމަށް ވަގުތީ އެޑްވައިޒަރީ ކޮމިޓީގެ ޗެއާމަން ޑރ. ޝަމީމް ވަނީ އިލްތިމާސް ކުރައްވައިފައެވެ.
އެކާވީސް ޖޫން 1968ގައި ހުޅުވުނު އީޕީއެސް ސްކޫލުން ވަނީ ރާއްޖޭގެ ވަރަށް ގިނަ ދަރިވަރުން ތައުލީމް ހާސިލްކޮށްފައެވެ. އޭގެ ތެރޭގައި ސަރުކާރުގެ މިހާރުގެ މުހިންމު މަގާމުތަކުގައި ތިއްބެވި ބޭފުޅުން ވެސް ހިމެނެއެވެ.