ސިއްހީ ހާލު ދެރަވެގެން ރޭ އައިޖީއެމްއެޗްގައި އެނދުމަތިކޮށް، ފަރުވާ ދިނުމަށްފަހު އދ. މާމިގިލީ ކޯޓުގެ ކުރީގެ އިސް މެޖިސްޓްރޭޓް އަހްމަދު ނިހާން އަނބުރާ ޖަލަށް ގެންގޮސްފިއެވެ.
މޯލްޑިވްސް ކަރެކްޝަނަލް ސާވިސްގެ އިންފޮމޭޝަން އޮފިޝަރު އަހްމަދު ލުގުމާން 'ސަން' އަށް ވިދާޅުވީ، ބައެއް ޓެސްޓްތައް ހެދުމަށް އައިޖީއެމްއެޗުގައި އެޑްމިޓްކުރުމަށްފަހު ނިހާން އަނބުރާ ޖަލަށް ގެންގޮސްފައިވަނީ މިއަދު ހެނދުނު 7:30 ހާއިރު ކަމަށެވެ. އަދި ޖަލަށް ގެންދިޔައިރު އޭނާގެ ހާލު ރަނގަޅު ކަމަށް ވެސް ލުގްމާން ވިދާޅުވިއެވެ.
ނިހާން 17 އަހަރަށް ޖަލަށްލުމަށް ހުކުމްކޮށްފައިވަނީ ގާނޫނާ ޚިލާފަށް ރައީސް އަބްދުﷲ ޔާމީން އަބްދުލް ގައްޔޫމް ހައްޔަރުކުރަން އުޅުނުކަން ސާބިތުވުމުންނެވެ. އެ މައްސަލާގައި ނިހާންގެ މައްޗަށް އުފުލާފައިވަނީ ޓެރަރިޒަމްގެ އަމަލެއް ކުރަން އުޅުމާއި ބައިވެރިވުމުގެ ދައުވާއެވެ.
އެ މައްސަލާގައި ކުރީގެ ޕްރޮސިކިއުޓާ ޖެނެރަލް މުހުތާޒު މުހުސިނަށް ވެސް ވަނީ ހަމަ 17 އަހަރުގެ ހުކުމެއް ކޮށްފައެވެ.