ފުލުހުންގެ މުއައްސަސާއަށް ނުފޫޒު ފޯރުވައިގެން ހާސިލް ކުރެވޭނެ އެއްވެސް ކަމެއް ނޯންނާނެ ކަމަށް ކުރީގެ ކޮމިޝަނަރު އޮފް ޕޮލިސް އަދި ހައުސިން މިނިސްޓްރީގެ ސްޓޭޓް މިނިސްޓަރު ހުސައިން ވަހީދު ވިދާޅުވެއްޖެ އެވެ.
ފުލުހުންގެ ތެރޭގައި އޮންނަ ޗެއިން އޮފް ކޮމާންޑް ގެއްލި، ފުލުހުންނަށް އޯޑަރުތައް ދިނުމަށް ކުރީގެ ސީޕީ ހުސައިން ވަހީދު އިސްވެ ހުންނަވައިގެން ކުރީގެ ޔޫއެން ބިލްޑިންގައި ފުލުހުންގެ ކޮމާންޑު ސެންޓަރެއް ހަދައިގެން މަސައްކަތް ކުރަމުންދާ ކަމަށް ދެކެވޭ ވާހަކަތަކާ ގުޅިގެން ހުސައިން "ސަން"އަށް ވިދާޅުވީ އެފަދަ އެއްވެސް ކަމެއް ކުރަން ޖެހޭ ސަބަބެއް އެނގިވަޑައިނުގަންނަވާ ކަމަށެވެ. އަދި ވިދާޅުވީ ފުލުހުންގެ މުއައްސަސާއަށް ނުފޫޒު ފޯރުވައިގެން ހާސިލު ކުރަން ޖެހޭ އެއްވެސް ކަމެއް ނޯންނާނެ ކަމަށެވެ.
"އެންމެ ފުރަތަމަ އެބަޖެހޭ ވިސްނަން ތިޔަ ކަހަލަ ވާހަކަތައް މީޑިއާގައި ދައްކަނީ ކިހާ ފެންވަރެއްގެ، ކޮން ބައެއް ހަރަދުކޮށްގެން ތިބޭ ބައެއްތޯ. އެފަދަ ކަމެއް ކޮށްގެން އަޅުގަނޑަށް ހާސިލު ވާނެ އެއްވެސް ކަމެއް ނެތް،" ހުސައިން ވިދާޅުވި އެވެ.
ހުސައިން ވިދާޅުވީ ފުލުހުންނަކީ ބޭރުގެ ނުފޫޒު ފޯރާ ވަރަށް ވުރެ ޕްރޮފެޝަނަލްކޮށް މަސައްކަތް ކުރަމުންދާ މުއައްސަސާއެއް ކަމަށާއި ސީޕީ އަހްމަދު އަރީފްގެ ބެލުމުގެ ދަށުން އެ މުއައްސަސާ ހިނގަމުން ދަނީ ވަރަށް ވަރުގަދައަށް ކަމަށެވެ.
"މިވަގުތު ފުލުހުންގެ އިސްވެރިންނަށް އެ ތިބީ މި ކަމަށް ވަރަށް ގާބިލް ބޭފުޅުން. އަދި އެ މުވައްސަސާގައި ހުރި ކޮންމެ ކުއްޖަކީ ވެސް ވަރަށް ސްމާޓް އަދި ކެރޭ ކުދިން. އެ ކުދިންނަށް އެނގޭނެ ގާނޫނާއި ގަވާއިދުގެ ތެރެއިން މަސައްކަތް ކުރަން،" ހުސައިން ވިދާޅުވި އެވެ.
އޭނާ ވިދާޅުވީ ސިޔާސީ މައިދާން ހަލަބޮލިވާ ކޮންމެ ދަނޑިވަޅެއްގައި ވެސް އެންމެ ފުރަތަމަ ހަމަލާތައް އަމާޒު ވަނީ ފުލުހުންގެ މުއައްސަސާއަށް ކަމަށާއި ސަބަބަކީ އެންމެ ބަދަހިކޮށް އަބަދުވެސް އޮންނަނީ އެ މުއައްސަސާ ކަމަށް ވާތީ ކަމަށެވެ. އަދި ވިދާޅުވީ އޭނާ ފުލުހުންނަށް ނުފޫޒު ފޯރުވާ ކަމަށް މީހުން ވާހަކަ ދެއްކި ނަމަވެސް މިވަގުތު ބުރަކޮށް އުޅުއްވަނީ ރައީސް އަބްދުﷲ ޔާމީންގެ ތަރައްގީގެ މަޝްރޫއުތައް ހަގީގަތަކަށް ހެދުމުގައި ކަމަށެވެ.
"މިހާރު ފުލުހުންނަކީ އަޅުގަނޑުގެ ބާރު ހިނގާ ބައެއް ނޫން. މިވަގުތު އަޅުގަނޑުގެ މަސްއޫލިއްޔަތަކީ ރައީސް ޔާމީން ކުރިއަށް ގެންދާވާ ތަރައްގީގެ މަޝްރުއުތަކުގެ ތެރެއިން ހައުސިން މިނިސްޓަރު ކުރައްވަމުން ގެންދަވާ މަސައްކަތައް އެއްބާރުލުން ދިނުން،" ހުސައިން ވިދާޅުވި އެވެ.
ހުސައިން ވިދާޅުވީ އޭނާއާ ފުލުހުންނާ މިހާރު ވެސް ގުޅުމެއް އޮތް ކަން ދައްކަން ހުއްޓުމެއްނެތި ބައެއް ފަރާތްތަކުން ސޯޝަލް މީޑީއާގައި މަސައްކަތް ކުރަނީ، ފުލުހުންގެ ތެރޭގައި އުޅުނު އިރު އޭނާ ކުރެއްވި މަސައްކަތްތައް ބަލައި ގަންނާތީ ކަމަށެވެ. އަދި އެފަދަ ތަފާތު ވާހަކަތައް ދައްކާނީ ހިދުމަތްތަކެއް ކޮށްފައި ތިބޭ މީހުންނާ ގުޅޭ ގޮތުން ކަމަށް ވެސް ވިދާޅުވި އެވެ.