ފީފާ ވޯލްޑް ކަޕު ތަށި ރާއްޖެ ގެނައުމަކީ ފުޓުބޯޅައިގައި ލިބޭނެ ކާމިޔާބީއެއް ކަމަށާއި، މިފަދަ ބޮޑެތި އިވެންޓްތަކަށް އިތުރު ފުރުސަތުތައްވެސް ލިބިގެންދާނެ ކަމެއް ކަމަށް ގައުމީ ޓީމަށް ކުރިން ކުޅެފައިވާ ޑިފެންޑަރު އަދި މިހާރު ވެލެންސިއާގެ ކޯޗު ސޮބާހު މުހައްމަދު (ސޮބާ) ބުނެފިއެވެ.
ކޮކާ ކޯލާ ފީފާ ވޯލްޑް ކަޕު ޓްރޮފީ ޓުއާގައި ވޯލްޑް ކަޕް ޓްރޮފީ މިއަދު ރާއްޖެ ގެނެސްފައި ވާއިރު މާދަމާ ބާއްވާ ޕަބްލިކް އިވެންޓުގައި ތަށްޓާއެކު ފޮޓޯ ނަގާލުމުގެ ފުރުސަތު ދިވެހިންނަށް ލިބިގެންދާނެއެވެ.
ވޯލްޑް ކަޕް ޓްރޮފީ ޓުއާއާ ގުޅިގެން ސަން ޓީވީއިން ކުރިއަށް ގެންދާ ކައުންޓްޑައުން ޝޯގައި ވާހަކަ ދައްކަމުން ސޮބާ ބުނީ ވޯލްޑް ކަޕު ތަށި ދިވެހި ފަސް ގަނޑަށް ގެނެވުމަކީ ފުޓުބޯޅައަށް ލޯބިކުރާ ޒުވާން ޖީލަށް ލިބޭ ވަރަށް މުހިއްމު ފުރުސަތެއް ކަމަށެވެ.
"ޒުވާން ޖީލަށް ލިބޭ ވަރަށް ބޮޑު ފުރުސަތަކަށް ވެގެންދާނެ. މިވެސް ފުޓުބޯޅައިގައި ލިބޭނެ ކާމިޔާބީއެއް. މިފަދަ ބޮޑެތި އެހެން އިވެންޓްތަކަށްވެސް މި އިވެންޓްގެ ސަބަބުން ރާއްޖެއަށް ފުރުސަތު ތަނަވަސް ވެގެންދާނެ. ރާއްޖެއަށް ކުރާ ގަދަރު ބޮޑުވެ، ބައިނަލްއަގުވާމީ މައިދާނެއްގައި ބަލައިގަންނާނެ މި ފަދަ އިވެންޓްތަކުން،" ސޮބާ ބުންޏެވެ.
ސޮބާ އިތުރަށްބުނީ ވޯލްޑް ކަޕު ހޯދުމަށް ރާއްޖެއަށް އަދި ތަސައްވަރުވެސް ނުކުރެވޭނެ ކަމެއް ކަމަށާއި، އެކަން ވާން އޮތީ ހަރުދަނާ އޮނިގަނޑެއްގެ ތެރެއިން މަސައްކަތްތަކެއް ކޮށްގެން ކަމަށެވެ. އެގޮތުން ތައުލީމީ ކޯޗުންނާއި ގިނަ އަދަދެއްގެ ހަރަދުތަކެއްވެސް ކޮށް، ބޮޑު ޕްލޭންތަކެއް އެކަމަށް ހަދަން ޖެހޭނެ ކަމަށްވެސް ސޮބާ ބުންޏެވެ.
ސޮބާ ބުނީ ވޯލްޑް ކަޕު ޓްރޮފީ ރާއްޖެ ގެނައުން ވެގެންދާނީ ވަރަށް ބޮޑު ފަހުރަކަށް ކަމަށާއި، މި އިވެންޓަކީ ކުދިބޮޑު އެންމެނަށް ގެނުވާނެ ބޮޑު އުފަލެއް ކަމަށެވެ. އެގޮތުން ދުނިޔޭގެ އެންމެ ޝަރަފުވެރި ޓްރޮފީއާއެކު ފޮޓޯ ނަގާލުންވެސް ވެގެންދާނީ ފުޓުބޯޅައަށް ލޯބިކުރާ ކޮންމެ މީހަކަށްވެސް ވަރަށް ބޮޑު އުފަލަކަށް ކަމަށްވެސް ސޮބާ ފާހަގަކުރިއެވެ.
ފީފާ ވޯލްޑް ކަޕު ޓްރޮފީ ޓުއާގައި ވޯލްޑް ކަޕުގެ ތަށި މިއަދު ހަވީރު ވަނީ ރާއްޖެ ގެނެސްފައެވެ. ތަށްޓާއެކު ހާއްސަ ލެޖެންޑެއްގެ ގޮތުގައި ރާއްޖެ އައީ ފްރާންސް ގައުމީ ޓީމަށް ކުޅެފައިވާ ކްރިސްޓިއަން ކްރެމްބޫއެވެ.