ގައުމީ ނެޓްބޯޅަ މުބާރާތުގެ ޗެމްޕިއަންކަން މަހިބަދޫ ސްޕޯޓްސް ކްލަބުން ހޯދައިފިއެވެ.
މަހިބަދޫ ސްޕޯޓްސް ކްލަބުން މުބާރާތުގެ ޗެމްޕިއަންކަން ހޯދީ ޒުވާނުންގެ މަރުކަޒުގެ އެތެރެވެށީ ކޯޓުގައި ރޭ ކުޅުނު ފައިނަލް މެޗުގައި 44 ޕޮއިންޓް 39 ޕޮއިންޓުން ރެޑްލައިން ކްލަބު ބަލިކޮށްގެންނެވެ.
ފައިނަލް މެޗުގެ މޮޅު ކުޅުންތެރިއަކަށް ހޮވިފައިވަނީ މުބާރާތުގެ ހުރިހާ މެޗެއްގައިވެސް މަހިބަދޫ ސްޕޯޓްސް ކްލަބަށް މޮޅު ކުޅުމެއް ދެއްކި އީމާ އަބްދުލް ސައްތާރެވެ.
ފައިނަލް މެޗަށްފަހު ޗެމްޕިއަން ޓީމަށް ޓްރޮފީ، އަދި މުބާރާތުގެ ޑްރީމް ޓީމަށްވެސްވަނީ ޓްރޮފީ ދީފައެވެ. މުބާރާތުގެ ޑްރީމް ޓީމުގައި ހިމެނިފައިވަނީ މަހިބަދޫ ސްޕޯޓްސް ކްލަބުގެ ތިން ކުޅުންތެރިން އަދި ރަނަރަޕް ޓީމު، ރެޑްލައިން ކްލަބުގެ ހަތަރު ކުޅުންތެރިންނެވެ.
މުބާރާތުގެ ޑްރީމް ޓީމު
އީމާ އަބްދުލް ސައްތާރު - މަހިބަދޫ ސްޕޯޓްސް ކްލަބު
ހަމްނާ އަބްދުލް ރަހުމާން - މަހިބަދޫ ސްޕޯޓްސް ކްލަބު
އައިމިނަތު ރަބާބް - މަހިިބަދޫ ސްޕޯޓްސް ކްލަބު
ލަޔާން އަލީ ރަޝީދު - ރެޑްލައިން ކްލަބު
އައިޝަތު ނައުރާ - ރެޑްލައިން ކްލަބު
ކުމަރި ސިލްވާ - ރެޑްލައިން ކްލަބު
އައިޝަތު އަނާން އަނިލް - ރެޑްލައިން ކްލަބު
ގައުމީ ނެޓްބޯޅަ މުބާރާތުގައި މިއަހަރު ހަ ޓީމު ވާދަކޮށްފައިވާ އިރު، މުބާރާތް ކުރިއަށް ގެންދިޔައީ ދެ ގްރޫޕަކަށް ބަހާލައިގެންނެވެ. ސެމީ ފައިނަލަށް ދަތުރުކުރީ ކޮންމެ ގްރޫޕެއްގެ ވެސް އެންމެ ކުރި ހޯދި ދެ ޓީމެވެ.
ސެމީގެ ފުރަތަމަ މެޗުގައި ގްރޫޕް އެކެއްގެ އެއްވަނަ މަހިބަދޫ ސްޕޯޓްސް ކްލަބާއި ގްރޫޕް ދޭއްގެ ދެވަނަ ރެޑްލައިން ސިޓީ ބައްދަލުކުރިއިރު، ސެމީގެ ދެވަނަ މެޗުގައި ބައްދަލުކުރީ ގްރޫޕް ދޭއްގެ އެއްވަނަ ރެޑްލައިން ކްލަބާއި ގްރޫޕް އެކެއްގެ ދެވަނަ ވިޔަންސާ ސްޕޯޓްސް ކްލަބެވެ.