ޕްރާގް (ޖެނުއަރީ 17): ޗެކް ރިޕަބްލިކްގެ ބޮޑުވަޒީރު އަންދްރޭ ބާބިޝްއަށް އިތުބާރު ނެތް ކަމަށް އެގައުމުގެ ގާނޫނު ހަދާ މަޖިލީހުން ފާސްކޮށްފިއެވެ.
މިދިޔަ އޮކްޓޯބަރު މަހު ވެރިކަމަށް ވަޑައިގެންނެވި ބާބިޝްއާ ދެކޮޅަށް މަޖިލީހުގައި ނެގި ވޯޓުގައި 117 މެމްބަރުން ވަނީ ބޮޑުވަޒީރަށް އިތުބާރު ނެތް ކަަމަށް ވޯޓު ދެއްވައިފައެވެ. ބާބިޝްގެ ސަރުކާރަށް ތާއިދުކޮށް ވޯޓު ދެއްވީ އެންމެ 78 މެމްބަރުންނެވެ.
އެ ވޯޓާއެކު ބޮޑުވަޒީރު ބާބިޝް އާއި އޭނާގެ ކެބިނެޓް މިއަދު އިސްތިއުފާ ދެއްވާނެ ކަމަށް ސަރުކާރުގެ ތަރުޖަމާނު ވިދާޅުވިއެވެ. ނަމަވެސް އެގައުމުގެ އިދިކޮޅު ޕާޓީތަކާ ވާހަކަ ދައްކައިގެން އާ ސަރުކާރެއް ގާއިމު ކުރެވެންދެން ބާބިޝް ވެރިކަމުގައި ހުންނަވާނެއެވެ.
ބާބިޝް ވެރިކަމަށް ވަޑައިގެންނެވުމުގެ ކުރިން އޭނާގެ މައްޗަށް ވަނީ އޮޅުވާލައިގެން ފައިސާ ހޯއްދެވި ކަމުގެ ތުހުމަތުތައް ފެންމަތިވެފައެވެ. އޭނާގެ މައްޗަށްކޮށްފައި ވަނީ ކުދި ވިޔަފާރިތަކަށްދޭ 2.45 މިލިއަން ޑޮލަރުގެ ސަބްސިޑީއެއް ނެންގެވުމަށްޓަކައި އޭނާގެ ކުންފުންޏެއްގެ ވެރިފަރާތާ ބެހޭ ގޮތުން އޮޅުވާލުމުގެ ތުހުމަތެވެ.
ނަމަވެސް ޗެކް ރިޕަބްލިކްގައި ދެވަނައަށް އެންމެ މުއްސަނދި މީހާ ކަމަށްވާ ބާބިޝް ވަނީ އޭނާގެ މައްޗަށްކޮށްފައިވާ ތުހުމަތުތައް ދޮގު ކުރައްވައިފައެވެ. އަދި އެއީ އޭނާ ސިޔާސި މައިދާނުން ދުރުކުރުމަށް ފަތުރާ ވާހަކަތަކެއް ކަމަށް ވިދާޅުވެފައެވެ. (އަލްޖަޒީރާ)