ނިމިދިޔަ ދިވެހި ޕްރިމިއާ ލީގުގައި މާޒިޔާ ސްޕޯޓްސް އެންޑް ރެކްރިއޭޝަން ކްލަބުން ފެނިގެންދިޔަ އިސްމާއީލް އީސަ (މެސީ) 2019 ވަނަ އަހަރުގެ ނިޔަލަށް އެ ކްލަބުގައި މަޑުކުރާގޮތަށް އެއްބަސްވުން އައުކޮށްފިއެވެ.
މާޒިޔާގައި މެސީ މަޑުކުރިކަން އެ ކްލަބުން ކަށަވަރުކޮށްދީފައިވާ އިރު، މެސީއަކީ ރާއްޖޭގެ ލީގުން ފެންނަ އެންމެ އުފެއްދުންތެރި އެއް މިޑްފީލްޑަރެވެ. އަދި ދިވެހިރާއްޖޭގެ ގައުމީ ޓީމަށްވެސް އޭނާއަކީ މުހިންމު ކުޅުންތެރިއެކެވެ.
ވިކްޓަރީ ސްޕޯޓްސް ކުލަބުން ފުރަތަމަ ޑިވިޝަންގެ ފުޓުބޯޅައަށް ތައާރަފު ވެގެންދިޔަ މެސީ ވަނީ 2011 ވަނަ އަހަރު ވީބީ އައްޑޫ އެފްސީގެ ޖާޒީގައިވެސް ފެނިފައެވެ. އެއަށްފަހު 2012 އިން ފެށިގެން 2013ގެ ނިޔަލަށް މާޒިޔާ ޖާޒީގައި މެސީ ފެނިފައިވާ އިރު، ޖެހިގެން އައި ސީޒަނުގައި އޭނާ ވަނީ ނިއުރޭޑިއަންޓް ސްޕޯޓްސް ކްލަބަށް ރަނގަޅު ކުޅުމެއް ދައްކައިފައެވެ.
ދެހާސް ސާދަވަނަ އަހަރު އަނެއްކާވެސް މާޒިޔާ ޖާޒީގައި މެސީ ފެނިފައިވާ އިރު، 2015 ވަނަ އަހަރު އޭނާ ވަނީ ކްލަބު އީގަލްސްގައި ވިދާލައިފައެވެ. 2016 ވަނަ އަހަރު އަލުން މާޒިޔާއަށް ކުޅުމަށްފަހު، ވޭތުވެދިޔަ ސީޒަންގައި މެސީ ފުރަތަމަ ފެނިގެންދިޔައީ އޭނާގެ ކެރިޔަރު ފެށި ވިކްޓަރީންނެވެ. މާލޭ ލީގުގެ ގަދަ ހަތަރެއްގެ ޖާގައެއް ވިކްޓަރީއަށް ނުލިބި ދިވެހި ޕްރިިމިއާ ލީގުގެ ޖާގަ ގެއްލުމާއެކު މެސީ ވަނީ މާޒިޔާއަށް ބަދަލުވެފައެވެ.
ވޭތުވެދިޔަ ފަސްވަރަކަށް އަހަރުގެ ތެރޭގައި މެސީ ވެފައިވަނީ ރާއްޖޭގެ ގައުމީ ޓީމަށްވެސް މުހިންމު ކުޅުންތެރިޔަކަށެވެ. އެގޮތުން މެސީ ފާހަގަކޮށްލެވެނީ ގައުމީ ޓީމުގެ ފުރަތަމަ 11 އިން އާންމުކޮށް ޖާގަ ހޯދަމުންދާ ކުޅުންތެރިއެއްގެ ގޮތުގައެވެ.
މިދިޔަ ދެ ސީޒަންގައިވެސް މާޒިޔާގެ މެދުތެރެއިން މުހިންމު ކުޅުމެއް ދެއްކި މުހައްމަދު އުމައިރު އަންނަ ސީޒަންގައި ނިއުއަށް ކުޅުމަށް އެއްބަސްވެފައިވާ އިރު، މެސީ މަޑުކުރުން ވެގެންދާނީ މާޒިޔާގެ ސަޕޯޓަރުންނަށް ވަރަށް ބޮޑު ހިތްވަރަކަށެވެ.
ކުރިއަށް އޮތް ސީޒަނަށް މާޒިޔާއިން ވަރުގަދައަށް ތައްޔާރުވަމުންދާ އިރު، އެޓީމުން ވަނީ ބޮޑެތި ޓްރާންސްފާތަކެއް ކޮށްފައެވެ. އެގޮތުން ވޭތުވެދިޔަ ސީޒަންގައި ކްލަބު ގްރީން ސްޓްރީޓްސްއިން ފެނިގެންދިޔަ މުހައްމަދު ނިޒާމް (ނިޒާމްބެ)ގެ އިތުރުން ޓީސީގެ ތަރި ނާއިޒް ހަސަން (ދާދު) ވެސް އަންނަ ސީޒަންގައި ފެންނާނީ މާޒިޔާއިންނެވެ. މީގެ އިތުރުންވެސް އީގަލްސްގެ ފަހަތުން މިދިޔަ ސީޒަންގައި ފެނިގެންދިޔަ ޑިފެންޑަރު މުޖުތާޒް މުހައްމަދު (މުޖޭ) ވެސް ފެނިގެންދާނީ އެންމެ ފަހުގެ މާލޭ ލީގު ޗެމްޕިއަން މާޒިޔާއިންނެވެ.
މާޒިޔާއިން މިދިޔަ ސީޒަން ނިންމާލީ މާލޭ ލީގުގެ ޗެމްޕިއަނުންގެ ގޮތުގައެވެ. އަދި ދިވެހި ޕްރިމިއާ ލީގުގެ ތިންވަނަ ޓީމުގެ ގޮތުގައެވެ. މީގެ އިތުރުންވެސް މިދިޔަ އަހަރު އޭއެފްސީ ކަޕުގައިވެސް މާޒިޔާ ވަނީ ރަނގަޅު ކުޅުމެއް ދައްކައިފައެވެ.