ގައުމީ ނެޓްބޯޅަ މުބާރަތުގައި ރޭ ކުޅުނު މެޗުން ލޮރެންޒޯ ސްޕޯޓްސް ކުލަބުގެ މައްޗަށް ރެޑްލައިން ކްލަބު ކުރި ހޯދައިފިއެވެ.
ޒުވާނުންގެ މަރުކަޒުގެ އެތެރެވެށީ ކޯޓުގައި ރޭ ކުޅުނު މެޗުގައި ރެޑްލައިނުން 63 ޕޮއިންޓް ހޯދި އިރު، ލޮރެންޒޯއަށް ހޯދުނީ 28 ޕޮއިންޓެވެ. ރޭގެ މެޗަކީ މުބާރާތުގެ ދެވަނަ މެޗެވެ. އަދި ގްރޫޕް ދޭއްގެ ފުރަތަމަ މެޗެވެ.
ރޭގެ މެޗުގެ މޮޅު ކުޅުންތެރިއަކަށް ހޮވިފައިވަނީ ރެޑްލައިންގެ އާމިނަތު ނައުރާއެވެ.
ގައުމީ ނެޓްބޯޅަ މުބާރާތުގައި މިއަހަރު ހަ ޓީމު ވާދަކުރާ އިރު، މުބާރާތް ކުރިއަށްދާނީ ދެ ގްރޫޕަކަށް ބަހާލައިގެންނެވެ. ސެމީ ފައިނަލަށް ދަތުރުކުރާނީ ކޮންމެ ގްރޫޕެއްގެ ވެސް އެންމެ ކުރި ހޯދާ ދެ ޓީމެވެ. ސެމީގެ ފުރަތަމަ މެޗުގައި ގްރޫޕް އެކެއްގެ އެއްވަނައާއި ގްރޫޕް ދޭއްގެ ދެވަނަ ބައްދަލުކުރާ އިރު، ސެމީގެ ދެވަނަ މެޗުގައި ބައްދަލުކުރާނީ ގްރޫޕް ދޭއްގެ އެއްވަނައާއި ގްރޫޕް އެކެއްގެ ދެވަނަ ޓީމެވެ.
މުބާރާތުގެ ގްރޫޕް އެކެއްގައި ހިމެނޭ ޓީމުތަކަކީ މަހިބަދޫ ސްޕޯޓްސް ކްލަބާއި، ވިޔަންސާ ސްޕޯޓްސް ކްލަބުގެ އިތުރުން ކްލަބު މެޓްރިކްސްއެވެ. ގްރޫޕް ދޭއްގައި ހިމެނެނީ ރެޑް ލައިން ކްލަބުގެ އިތުރުން ލޮރެންޒޯ ސްޕޯޓްސް ކްލަބު އަދި ރެޑް ލައިން ސިޓީއެވެ.
ގައުމީ ނެޓްބޯޅަ މުބާރާތުގެ މެޗެއް މިރޭވެސް ކުޅުމަށް ހަމަޖެހިފައިވެއެވެ. މިރޭ ކުޅޭ ގްރޫޕް އެކެއްގެ މެޗުގައި ބައްދަލުކުރާނީ ކްލަބު މެޓްރިކްސްއާއި މަހިބަދޫ ސްޕޯޓްސް ކްލަބެވެ. މަހިބަދޫން މުބާރާތުގެ ފުރަތަމަ މެޗު ކާމިޔާބުކޮށްފައިވާ އިރު، މެޓްރިކްސް އަދި މެޗެއް ކުޅެފައެއް ނުވެއެވެ.