ޕްރާގް (07 ޖެނުއަރީ) ކުރިއަށްއޮތް އަހަރުތަކުގައި ޔޫރަޕިއަން ޔޫނިއަން (އީޔޫ)ގެ ބޯޑަރުތައް ރަނގަޅަށް ނުބެލެހެއްޓިއްޖެ ނަމަ، ދިހަ މިލިއަން ރެފިއުޖީން ޔޫރަޕަށް އެތެރެވުމުގެ ފުރުސަތު އެބައޮތް ކަމަށް ޗެކް ރިޕަބްލިކްގެ ރައީސް މިލޯސް ޒެމާން ވިދާޅުވެއްޖެއެވެ.
އެގައުމުގެ ޗެނަލަކަށް މިލޯސް ދެއްވި އިންޓަވިއުއެއްގައި ވިދާޅުވީ އީޔޫއަށް އެގައުމުތަކުގެ ބޯޑަރުތައް ބެލެހެއްޓުމުގެ ހިތްވަރު ނެތް ނަމަ އެފްރިކާއިން ދިހަ މިލިއަން ރެފިއުޖީން އެތެރެވެދާނެ ކަމަށެވެ.
މިލޯސް އިތުރަށް ވިދާޅުވީ އެގައުމަށް މުސްލިމުން އެތެރެވާ ނަމަ ޔޫރަޕްގެ ސަގާފަތަށް އޭގެ އަސަރުކުރާނެ ކަމަށެވެ.
"ޔޫރަޕަށް އެތެރެވާ ރެފިއުޖީންގެ ސަގާފަތާއި ޔޫރަޕްގެ ސަގާފަތަކާ ނުގުޅޭ. އެކަން ރެފިއުޖީންނަށް ވެސް އެނގޭ،" މިލޯސް ވިދާޅުވިއެވެ.
ޔޫރަޕަށް އެތެރެވާ ރެފިއުޖީންނަށް ހިމާޔަތް ދިނުމަށް ވުރެ އެމީހުންގެ ގައުމުތަކަށް އެހީވުމަށް ވެސް މިލޯސް ގޮވާލެއްވިއެވެ.
ޔޫރަޕަށް ރެފިއުޖީން އެތެރެވާލެއް ގިނަވުމުގެ ސަބަބުން ޔޫރަޕުގައި ރެފިއުޖީންނާ ދެކޮޅު ޝުއޫރުތައް ވެސް ވަރަށް ބޮޑަށް އުތުރިއަރަމުންދެއެވެ. ޗެކް ރިޕަބްލިކްގައި އެންމެ ފަހުން ބޭއްވި އިންތިހާބުގައި ވެސް ކަނާތު ފިޔައިގެ ރެފިއުޖީންނާ ދެކޮޅު ޕާޓީތައް ވަނީ ކުރި ހޯދައިފައެވެ.
ޗެކް ރިޕަބްލިކްގެ އިތުރުން ހަންގޭރީ، ޕޮލެންޑް އަދި ޕެރަގުއޭއިން ވެސް ވަނީ އެގައުމުތަކަށް އެތެރެވާ ރެފިއުޖީން ނެގުމަށް ދެކޮޅު ހަދައިފައެވެ. އެ މައްސަލައިގައި އީޔޫއާއި އެގައުމުތަކާ ދެމެދު އޮތް ގުޅުން ވަނީ ވަރަށް ބޮޑަށް ގޯސްވެފައެވެ. އަދި އެ މައްސަލަ ޔޫރަޕިއަން ކޯޓަށް ހުށަހަޅާނެ ކަމަށް ވެސް އެގައުމުތަކުން ވަނީ ބުނެފައެވެ.
އީޔޫގެ ގަވާއިދުތައް ބުނާގޮތުން އެ އިއްތިހާދުގެ މެމްބަރު ގައުމުތަކުން އެ އިއްތިހާދުން ކަނޑައަޅާފައިވާ ގާނޫނުތަކަށް ތަބާވާން ޖެހެއެވެ.