ނިމި ދިޔަ ދިވެހި ޕްރިމިއާ ލީގުގައި އއ. މާޅޮސް އަށް ކުޅުނު އަހުމަދު އާރިފް (އާރީ) އަންނަ ސީޒަންގައި ޓީސީ ސްޕޯޓްސް ކްލަބަށް ކުޅުމަށް އެއްބަސްވެއްޖެ އެވެ.
މިނިވަން ޗެމްޕިއަންޝިޕް އަދި ދިވެހި ޕްރިމިއާ ލީގުގައި ވެސް މާޅޮސްގެ ފޯވާޑު ލައިންގައި މޮޅު ކުޅުމެއް ދައްކާފައިވާ އާރިފް ޓީސީ އަށް ސޮއިކުރިކަން އެޓީމުން ވަނީ ސަން އަށް ކަށަވަރުކޮށްދީފަ އެވެ.
މިދިޔަ އަހަރުގެ ދިވެހި ޕްރިމިއާ ލީގު ފެށުނު އިރު އާރީ ހުރީ އަނިޔާގަ އެވެ. ނަމަވެސް، އޭނާ ވަނީ އަނިޔާ އިން ރަނގަޅުވެ ލީގުގެ ދެވަނަ ބުރުގައި ފާހަގަކޮށްލެވޭ ކުޅުމެއް ދައްކައިފަ އެވެ. ލީގުގައި ތިން ގޯލް ޖަހައި އަދި ގޯލް ޖެހުމަށް އެހީތެރިވެދީފަ އެވެ. އަދި އާރީ ވަނީ މުހިއްމު މެޗުތަކުގައި ގޯލް ޖަހައިފަ އެވެ.
ދުވެލި ބާރު ކުޅުންތެރިއެއްގެ ގޮތުގައި ފާހަގަ ކުރެވޭ، އާރީ، ލީގު ޗެމްޕިއަން ނިއުރޭޑިއަންޓް ކޮޅަށް ޖެހި ރީތި ގޯލް ވަނީ މޯލްޑިވްސް ފުޓްބޯލް އެވޯޑްސްގެ "ޖޫލީ އެވޯޑް" އަށް ވެސް ވާދަކޮށްފަ އެވެ.
އާރީ ޓީސީ އަށް ސޮއި ކޮށްފައި ވަނީ މިއަދުގެ ވަގުތެއްގަ އެވެ. ޓީސީގެ ކޯޗު މުޙައްމަދު ނިޒާމް (ނިޒާމްބެ) އާރީގެ ޓްރާންސްފާއާ ގުޅިގެން ބުނެފައި ވަނީ، އާރީއަކީ ވޭތުވެ ދިޔަ ސީޒަންގައި މާޅޮސްއާ އެކު މޮޅު ކުޅުމެއް ދައްކާފައިވާ ކުޅުންތެރިއެއް ކަމަށާއި ޓީސީއަށް ވެސް އާރީގެ ފަރާތުން ފައިދާތަކެއް ކުރާނެ ކަމަށެވެ.
އަހުމަދު އާރިފް ޓީސީއަށް ސޮއި ކުރަނީ --- ފޮޓޯ: އާރިފް ފޭސްބުކް ޕޭޖު
"އާރީއަކީ މިދިޔަ ސީޒަންގައި ވަރަށް ރަނގަޅަށް ޕާފޯމް ކުރި ކުޅިންތެރިއެއް، މުސްތަގުބަލު އޮތް ކުޅުންތެރިއެއް، ދެން (އާރީއަށް) ފުރުސަތު ދިނުމުގެ ގޮތުންނާއި ޓީސީއަށް ވެސް އޭނާގެ ފަރާތުން ފައިދާތަކެއް ކުރާނެ ކަމަށް ބެލެވޭތީ އާރީ ޓީމަށް ގެނައީ." ނިޒާމްބެ ސަން އަށް ވާހަކަ ދައްކަމުން ބުންޏެވެ.
އަންނަ ސީޒަންގައި އޭއެފްސީ ކަޕު ކުޅުމަށް ތައްޔާރުވަމުން އަންނަ ޓީސީގެ ކޯޗު، ނިޒާމްބެ ބުނީ އިތުރު ދިވެހި ކުޅުންތެރިއެއް ދެން މި ސީޒަންގައި ޓީމަށް ނުނަގާނެ ކަމަށާއި ބިދޭސީ ހަތަރު ކުޅުންތެރިންނާ އެކު މިހާރު ސްކޮޑު ފައިނަލް ކުރުމުގެ މަސައްކަތް ކުރަމުންދާ ކަމަށެވެ.
ޓީސީ އިން އަންނަ ސީޒަނަށް ތައްޔާރުވުމުގެ ގޮތުން ދިވެހި ޕްރިމިއާ ލީގުގައި ށ. މިލަންދޫ އިން ވިދާލި އިޝާން އިބުރާހީމް (ސައްޓު) ވެސް ޓީމަށް ގެނެސްފައިވާ އިރު، އެ ޓީމުގެ އަރިމަތިން ކުރިއަށް ކުޅޭ މުހިއްމު ކުޅުންތެރިޔާ ނާއިޒް ހަސަން (ދާދު) ވަނީ ޓުރާންސްފާގެ ބާޒާރުގައި މާޒިޔާ ސުޕޯޓްސް އެންޑް ރެކްރިއޭޝަނަށް ބަދަލުވެފަ އެވެ.
އޭއެފްސީ ކަޕުގެ ގުރޫޕް ސުޓޭޖުން ޖާގަ ހޯދުމަށް، ޕްރިލިމިނަރީ ކޮލިފިކޭޝަން ބުރުގައި ޓީސީ ވާދަކުރަން ޖެހޭނީ ބަނގުލަދޭޝްގެ ސައިފް ސްޕޯޓިންގް ކުލަބާ އެވެ. އެ ދެ ޓީމު ވާދަކުރާ މެޗުގެ ފުރަތަމަ ލެގު އޮންނާނީ މި މަހުގެ 23 ވަނަ ދުވަހު އެވެ. ދެ ވަނަ ލެގު އޮންނާނީ މިމަހުގެ 30 ވަނަ ދުވަހު އެވެ.
ސީޒަނަށް ތައްޔާރުވުމުގެ ގޮތުން ޓީސީގެ ފަރިތަކުރުންތައް އިއްޔެ ވަނީ ފަށައިފަ އެވެ.