އިނގިރޭސި ޕްރިމިއާ ލީގުގައި ރޭ އާސެނަލްއާ ދެކޮޅަށް ކުޅުނު މެޗުގައި ގިނަ ހުސް ފުރުސަތުތަކެއް ލިިބި ނާކާމިޔާބުކޮށްލި މޮރާޓާގެ މަސައްކަތާ މެދު ހިތްހަމަ ޖެހޭ ކަމަށާއި އޭނާގެ ނަސީބު ދެރައީ ކަމަށް ޗެލްސީގެ ކޯޗު އެންޓޯނިއޯ ކޮންޓޭ ބުނެފި އެވެ.
ރޭގެ "ލަންޑަން ޑާބީ" 2-2ގެ ނަތީޖާއަކުން އެއްވަރުވެގެން ނިމުނު އިރު، މޮރާޓާއަށް ވަނީ ގިނަ ހުސް ފުރުސަތުތަކެއް ލިބި ބޭކާރުވެފަ އެވެ. އޭގެ ސަބަބުން މީސް މީޑިއާގައި ޗެލްސީގެ ސަޕޯޓަރުންގެ ފަރާތުން މޮރާޓާއަށް ވަނީ ނުރުހުމުގެ ބަސްތައް އަމާޒު ވެފަ އެވެ.
މޮރާޓާގެ ދިފާއުގައި ވާހަކަ ދައްކަމުން މެޗަށް ފަހު ކޮންޓޭ ބުނީ މި ދުވަސް ކޮޅަކީ މޮރާޓާގެ ނަސީބު އެހީވެދޭ ދުވަސްކޮޅެއް ނޫން ކަމަށެވެ. އަދި މޮރާޓާ އަށް އޮތް ގޮތަކީ ދެން އަންނަ މެޗަކަށް ވެސް މަސައްކަތް ކުރުން ކަމަށެވެ.
"ފޯވާޑަކަށް ގޯލް ޖެހުމަކީ މުހިއްމު ކަމެއް، އެހެން ނަމަވެސް މި ދުވަސްކޮޅަކީ މޮރާޓާއަށް ނަސީބު އެހީވާ ދުވަސްކޮޅެއް ނޫން. އޭނާ އަށް ޖެހޭނީ އަންނަ މެޗުތަކަށް ވެސް މަސައްކަތް ކުރަން. މޮރާޓާގެ މަސައްކަތާ މެދު ހިތްހަމަ ޖެހޭ." ކޮންޓޭ ބުންޏެވެ.
ކޮންޓޭ އިތުރަށް ބުނީ ޗެލްސީ އަށް ރޭގެ މެޗުން މޮޅެއް ހައްގު ކަމަށެވެ. އެހެން ނަމަވެސް އާސެނަލް ފަދަ ވަރުގަދަ ޓީމަކާ އެކު ރަށުން ބޭރުގައި އެއްވަރު ކޮށްލެވުމަކީ ވެސް ރަނގަޅު ނަތީޖާއެއް ކަމަށް ވެސް ކޮންޓޭ ފާހަގަކުރި އެވެ.
"ގިނަ ފުރުސަތުތަކެއް ލިބި ބަލިވުމަކީ މާޔޫސްވާ ކަމެއް، އެހެން ނަމަވެސް އާސެނަލްއާ ދެކޮޅަށް ކުޅެ އެއްވަރުވުމަކީ ރަނގަޅު ނަތީޖާއެއް. ނަތީޖާ ގަބޫލުކުރަން ޖެހޭ، ޓީމު އެކައްޗެއް ގޮތަށް ބަލިވާނީވެސް، މޮޅުވާނީ ވެސް،" ކޮންޓޭ ބުންޏެވެ.
ރެއާލް މެޑްރިޑުން މި ސީޒަންގައި މޮރާޓާ ޗެލްސީ އަށް ބަދަލުވީ 58 މިލިއަން ޕައުންޑުގެ ޓުރާންސްފާ ފީ އަކަށެވެ. ސީޒަންގެ ކުރީ ކޮޅުގައި މޮޅު ކުޅުމެއް ދެއްކި މޮރާޓާއަށް އެންމެ ފަހުން ކުޅުނު ދެ މެޗުގައި ވެސް ގިނަ ފުރުސަތުތަކެއް ލިބި ގޯލް ޖެހިފައެއް ނުވެ އެވެ. އޭގެ ސަބަބުން ގިނަ ފާޑު ކިއުންތަކެއް މޮރާޓާ އަށް އަމާޒުވެފައިވީ ނަމަވެސް އޭނާ ވަނީ މިހާތަނަށް ޗެލްސީ ޖާޒީގައި ކުޅުނު 19 މެޗުގައި 10 ގޯލް ޖަހައިފަ އެވެ.