އިސްލާމްދީނަށް ފުރައްސާރަކުރާ މީހުންނަށް ފިޔަވަޅު އެޅުމަށް ރާއްޖޭގައި ހަރަކާތްތެރިވާ ދީނީ ޖަމްއިއްޔާއެއް ކަމަށްވާ ޖަމްއިއްޔަތުއް ސަލަފް އިން ގޮވާލައިފިއެވެ.
ސަލަފު ޖަމްއިއްޔާ އިން މިރޭ ކުރި ޓްވީޓެއްގައި ބުނީ އިސްލާމްދީނަށް ފުރައްސާރަކޮށް ފާޑުކިޔައި ދިވެހި ފަރުދުންނާއި މަދަނީ ޖަމްއިއްޔާތަކާއި، އަދި ފާޅުގައި އިސްލާމްދީނާއި ދެކޮޅަށް އަޑުއުފުލާ މީހުންނާމެދު ފިޔަވަޅު އެޅުމަށް ރާއްޖޭގެ ވަލިއްޔުލް އަމްރަށާއި ކަމާ ބެހޭ އެންމެހާ މުއައްސަސާތަކަށް އިލްތިމާސްކުރާ ކަމަށެވެ.
ސަލަފް އިން މިފަދަ ޓްވީޓެއް ކޮށްފައިމިވަނީ ޕޮލިސް އިންޓަގްރިޓީ ކޮމިޝަންގެ ކުރީގެ ރައީސާ، އަދި މޯލްޑިވިއަން ޑިމޮކްރަސީ ނެޓްވޯކް (އެމްޑީއެން)ގެ ރައީސާ ޝަހިންދާ އިސްމާއިލް އިސްލާމްދީން ނޫން އެހެން ދީންތަކަށް ފުރުސަތު ދިނުމަށް ހިތްވަރު ލިބޭފަދަ ވާހަކަތަކެއް ހިމެނޭ ޓްވީޓެއްކުރައްވާފައި ވަނިކޮށެވެ.
އެ ޓްވީޓާ ގުޅިގެން ދީނީ އިލްމުވެރިޔާ ޝައިޚް ހަސަން މޫސާ ފިކްރީ ކުރެއްވި ޓްވީޓެއްގައި ވިދާޅުވީ އިސްލާމްދީން ނޫން އެހެން ދީނަކަށް ރާއްޖޭގައި ފުރުސަތު ދިނުމަށް ވަކާލަތުކުރާ މީހުންނަށް، އެފަދަ ފިކުރުތަކުން އެއްކިބާވުމަށް ގޮވާލާ ކަމަށެވެ.
ރާއްޖޭގެ ފަސްގަނޑުން އިސްލާމްދީން ނޫން އެހެން ދީނަކަށް ފުރުސަތު ދީގެން ނުވާނެ ކަމަށްވެސް ޝައިޚް ފިކުރީ ވިދާޅުވެފައިވެއެވެ.
ޝަހިންދާގެ ޓްވީޓާ ގުޅިގެން އިސްލާމިކް މިނިސްޓްރީން ވަނީ އިސްލާމްދީން ނޫން ދީންތަކަށް ޖާގަ ހޯދުމަށް މަގުފަހިވާ ފަދަ ބޭކާރު ވާހަކަތައް މުޖުތަމައު ތެރެއަށް ނުފެތުރުމަށް އިލްތިމާސްކޮށްފައެވެ.