އަމިއްލަ އަށް ދީނީ އިލްމުވެރިންނަށް ވެގެން އުޅޭ ބަޔަކު ދިވެހި ދައުލަތުގެ މައްޗަށް ގަދަވެގަނެފާނެ ކަމަށް ކުރީގެ ރައީސް މުހައްމަދު ނަޝީދު ވިދާޅުވެެއްޖެއެވެ.
ރައީސް ނަޝީދު މިއަދު ކުރެއްވި ޓްވީޓެއްގައި ވިދާޅުވެފައިވަނީ އަމިއްލަ އަށް "ޝެއިޚުންނަށް ވެގެން އުޅޭ ބަޔަކު" ސިވިލް ސޮސައިޓީގެ ދިފާއުގައި ވާހަކަ ދައްކަމުންދާ މީހުންނަށް ހަމަލާތަކެއް ދެމުން އަންނަ ކަމަށާއި އެއީ ދިވެހި ދައުލަތުގެ ތެރެއިން އެހެން ދައުލަތެއް އުފެދިފައިވާ ކަމުގެ ހެއްކެއް ކަމަށެވެ.
އޭގެ ސަބަބުން ދިވެހި ދައުލަތުގެ މައްޗަށް އެ ދައުލަތް ގަދަވެގަނެފާނެ ކަމުގެ ބިރުވެސް އެބައޮތް ކަމަށް ނަޝީދު ވަނީ ވިދާޅުވެފައެވެ.
ނަޝީދު މިމޭރުމުން ޓްވީޓެއް ކުރައްވާފައިވާއިރު ޕޮލިސް އިންޓަގްރިޓީ ކޮމިޝަންގެ ކުރީގެ ރައީސާ، އަދި މޯލްޑިވިއަން ޑިމޮކްރަސީ ނެޓްވޯކް (އެމްޑީއެން)ގެ ރައީސާ ޝަހިންދާ އިސްމާއިލް ވަނީ އިސްލާމްދީން ނޫން އެހެން ދީންތަކަށް ފުރުސަތު ދިނުމަށް ހިތްވަރު ލިބޭފަދަ ވާހަކަތަކެއް ހިމެނޭ ޓްވީޓެއް ކުރައްވާފައެވެ.
އެ ޓްވީޓާ ދެކޮޅަށް ގިނަ ދީނީ އިލްމުވެރިން ވާހަކަ ދައްކަވަމުންދާއިރު، އިސްލާމްދީން ނޫން ދީންތަކަށް ޖާގަ ހޯދުމަށް މަގުފަހިވާ ފަދަ ބޭކާރު ވާހަކަތައް މުޖުތަމައު ތެރެއަށް ނުފެތުރުމަށް އިސްލާމިކް މިނިސްޓްރީން ވަނީ އިލްތިމާސްކޮށްފައެވެ.