ޕީސް ފައުންޑޭޝަނުން މިއަހަރުގެ ޖުލައި މަހު އިފްތިތާހުކުރި ދަ ލެގަސީ ދަރުހުގައި ބައިވެރިވެވަޑައިގެން ތަގުރީރު ކުރެއްވުމަށް މިހާރު ރާއްޖެ ވަޑައިގެން އުޅުއްވާ ދުނިޔޭގެ މަޝްހޫރު ދީނީ އިލްމްވެރިޔާ މެލޭޝިއާގެ އައްޝައިޚް ހުސައިން ޔީ ތަފާތު ގޮތަކަަށް މިރޭ އޮންނަ ދަރުހުގައި ބައިވެރިވުމަށް ދިވެހިންނަށް ދައުވަތު ދެއްވައިފިއެވެ.
ހާއްސަ ވީޑިއޯ މެސެޖެއް މެދުވެރިކޮށް އެ ދަރުހަށް ޝެއިހް ޔީ ދައުވަތު ދެއްވި އިރު އޭނާ ހުންނެވީ މަސް މާރުކޭޓުގައި ދެ އަތުން ކަޅުބިލަ މަސްތަކެއް ހިފަހައްޓާލައިގެންނެވެ.
"މިހުރީ ރާއްޖޭގެ މަސް މާރުކޭޓުގައި. ހުރިހާ ބޭފުޅުންވެސް މިރޭ އިސްލާމީ މަރުކަޒުގައި އޮންނަ ހާއްސަ ދަރުހުގައި ބައިވެރިވާން އަންނާތި،" ޝެއިހް އެ ވީޑިއޯގައި ވިދާޅުވެއެވެ.
ޕީސް ފައުންޑޭޝަނުން ބުނީ، ޝެއިހް ޔީ ދެއްވާ ހާއްސަ ދަރުސް އޮންނާނީ މިރޭ 8:45 ގައި އިސްލާމީ މަރުކަޒު ސަރަހައްދުގައެވެ. މައުޟޫއަކަށް ހަމަޖައްސާފައިވަނީ އިސްލާމީ ދުނިޔޭގައި މިހާރު ހިނގަމުންދާ ކަންތައްތަކާ ގުޅޭ ގޮތުންނެވެ.
ޝެއިހް ޔީގެ ދަރުހެއް މިރޭ ބާއްވަން ހަމަޖެހިފައިވާ އިރު މާދަމާރޭވެސް އެބޭފުޅާގެ ހާއްސަ ދަރުހެއް އޮންނާނެއެވެ. އަދި ޒުވާނުންނަށް އަމާޒުކޮށްގެން ތަފާތު ދީނީ ވޯކްޝޮޕްތައް ވެސް ޝައިހްގެ ދަތުރުފުޅުގެ ތެރޭގައި ކުރިއަށްގެންދަވާނެ ކަމަށް ޕީސް ފައުންޑޭޝަނުން ބުންޏެވެ.
ދަ ލެގަސީ ސިލްސިލާގެ ފުރަތަމަ ދަރުސް ޖުލައި މަހު ބޭއްވި އިރު، އެ ދަރުސްގައި ތަގްރީރު ކުރެއްވީ ޑރ. ބިލާލް ފިލިޕްސްއެވެ. އެ ދަރުސްގައި 12000 ވަރަކަށް މީހުން ބައިވެރިވި ކަމަށާއި ޝައިހް ހުސައިން ޔީގެ ދަރުހަށް ވެސް އެފަދަ ބޮޑު ތަރުހީބެއް ލިބޭނެ ކަމަށް އުންމީދުކުރާ ކަމަށް ޕީސް ފައުންޑޭޝަނުން ބުންޏެވެ.