މިޔަންމާގެ ހަރުކަށި ބުޑިސްޓުންނާއި އެ ގައުމުގެ ސިފައިންގެ ދުއްތުރާތަކުން ސަލާމަތްވުމަށް އެކި ގައުމުތަކަށް ހިޖުރަކުރި ރޮހިންގާ މުސްލިމުންނަށް އެހީވުމަށް އާބާދީގެ ނިސްބަތުން އެންމެ ބޮޑަށް އެހީތެރިކަން ފޯރުކޮށްދިން އެއް ގައުމަކީ ދިވެހިރާއްޖެ ކަމަށް ރާއްޖޭގެ ރެޑް ކްރެސެންޓް ޖަމިއްޔާއިން ބުނެފިއެވެ.
ދިވެހި ރެޑް ކްރެސެންޓް ޖަމަުއްޔާއިން ބުނީ، އެ ޖަމިއްޔާ މެދުވެރިކޮށް އެކަނިވެސް 7.6 މިލިއަން ރުފިޔާގެ ފައިސާގެ އެހީ ފޯރުކޮށްދީފައިވާ ކަމަށެވެ. އަދި މުޅި ދިވެހި ރާއްޖެއިން ގާތްގަނޑަކަށް ބައި މިލިއަން ޑޮލަރުގެ އެހީ ފޯރުކޮށްދެވިފައިވާނެ ކަމަށް ލަފާކުރެވޭ ކަމަށެވެ.
އެންމެ ގިނަ އަދަދަކަށް ރޮހިންގާ މުސްލިމުން މިވަގުތު ކޭމްޕްކޮށްގެން ތިބި ބަންގްލަދޭޝްގެ ކޮކްސް ބާޒާރަށް ރެޑް ކްރެސެންޓުގެ ވަފުދެއް މިދިޔަ ހަފްތާގައި ޒިޔާރަތްކޮށްފައިވާ އިރު، އެ ވަފުދުގައި ހިމެނޭ އެ ޖަމިއްޔާގެ ޖެނެރަލް ސެކެރެޓަރީ އައިޝަތު ނޫރާ މުހައްމަދު ވިދާޅުވެފައިވަނީ އާބާދީގެ ނިސްބަތުން ދިވެހިންގެ ފަރާތުން ބޮޑު އެހީތެރިކަމެއް ފޯރުކޮށްދީފައިވާ ކަމަށް ބައިނަލްއަގުވާމީ އެހީދޭ ޖަމުއްޔާތަކުންވެސް ފާހަގަކޮށްފައިވާ ކަމަށެވެ.
ނޫރާ ވިދާޅުވީ، އެ އެހީތެރިކަމަކީ އެކި ގޮތްގޮތުން ދިވެހި ރައްޔިތުން އެއްކޮށްފައިވާ ފައިސާ ކަމަށާއި އޭގެ ތެރޭގައި ތަފާތު ހަރަކާތްތަކުންނާއި އަދި ޓެލެތޯންތަކުން އެއްކޮށްފައިވާ ފައިސާވެސް ހިމެނޭ ކަމަށެވެ. އެ ހުރިހާ ފައިސާއެއް މިހާރުވަނީ ބަންގަލަދޭޝްގައި ހަރަކާތްތެރިވަމުންދާ ރެޑް ކްރޮސް އަދި ރެޑް ކްރެސެންޓް ޖަމާއަތާ ހަވާލުކޮށްފައެވެ.
މިޔަންމާގައި ހާލުގައި ޖެހިފައިވާ ރޮހިންގާ މުސްލިމުންނަށް އެހީތެރިކަން ފޯރުކޮށްދިނުމަށް ދުނިޔޭގެ އެކި ކަންކޮޅުތަކުން މަސައްކަތް ކުރަމުންދާ އިރު، މިހާތަނަށް ހަތަރު ލައްކައަށްވުރެ ގިނަ މީހުންނަށް ދިރިއުޅެވޭވަރަށް އިންސާނީ އެހީ ފޯރުކޮށްދެވިފައިވާ ކަމަށް އެހީފޯރުކޮށްދޭ ޖަމިއްޔާތަކުން ވަނީ ލަފާކޮށްފައެވެ.