ބައިނަލްއަގްވާމީ މައިދާނުގައި ރާއްޖެ މަޝްހޫރުވެފައި އޮންނަނީ ރީތި ދޮންވެލީގެ ގޮނޑުދޮށްތަކާއި ކަނޑުއަޑީގެ ރީތި ބަގީޗާތަކުގެ ވާހަކައިންނެވެ. ރައްޔިތުންގެ ހިތްހެޔޮކަމާ، އެއްބައިވަންތަކަމުގެ ވާހަކައިންނެވެ. މި ކަންތައް ތަޖުރިބާކޮށްލުމަށް ކޮންމެ އަހަރަކުވެސް ދުނިޔޭގެ އެކި ކަންކޮޅުތަކުން މިލިއަނަކަށްވުރެ ގިނަ ފަތުރުވެރިން ރާއްޖެ ޒިޔާރަތްކުރެއެވެ. މި މީހުންގެ ތެރޭގައި ދުނިޔޭގެ ނަންހިނގާ މަޝްހޫރު ގިނަ ޝަހުސިއްޔަތުތައްެވެސް ހިމެނެއެވެ.
ނިމިގެން މިދާ 2017 ވަނަ އަހަރަކީވެސް ދުނިޔޭގެ މަޝްހޫރު ގިނަ ބަޔަކު ރާއްޖެ ޒިޔާރަތްކުރި އަހަރެކެވެ. އަހަރު ފެށުނުއިރުވެސް މަޝްހޫރު ގިނަ ބަޔަކުތިބީ ޗުއްޓީއަށް ރާއްޖެ އައިހެވެ. މި ދުވަސްވަރަކީ އަނެއްކާވެސް މަޝްހޫރު ގިނަ ބަޔަކު އާއަހަރުގެ ޗުއްޓީއަށް ރާއްޖެ އަންނަމުންދާ ދުވަސްވަރެކެވެ.
ދުނިޔޭގެ މަޝްހޫރު ގިނަ ބަޔަކު ރާއްޖެ އައުމަކީ ރާއްޖޭގެ ފަތުރުވެރިކަން މުޅި ދުނިޔެއަށް މަޝްހޫރުވެގެންދާ ކަމެކެވެ. އެފަދަ މީހެއްގެ ޓްވިޓާ ނޫނީ އިންސްޓަގްރާމުގައި ޝެއާކުރާ ފޮޓޯތައް އެތައް މިލިއަން ބަޔަކާ ހަމައަށް ފޯރައެވެ.
މި އަހަރު ރާއްޖެ ޒިޔާރަތްކުރި މަޝްހޫރު ބައެއް މީހުންނަށް ބަލާއިރު ލިސްޓުގެ އެއްވަނަ ދޭނީ ބިލިއަނަރު އަދި ދުނިޔޭގައި މިހާރު ހުރި އެންމެ މުއްސަނދި މީހާ، މައިކްރޯސޮފްޓުގެ ބާނީ ބިލް ގޭޓްސްއަށެވެ. ބިލް ގޭޓްސް ވަނީ މީގެ ކުރިންވެސް ރާއްޖެއަށް ޒިޔާރަތްކޮށްފައެވެ. މިއަހަރު ޗުއްޓީ ހޭދަކުރުމަށް ބިލްގޭޓްސް ރާއްޖެ އައިސްފައިވަނީ މި މަހުގެ 17 ވަނަ ދުވަހުއެވެ. އާއިލާ އާއެކު ބިލްގޭޓްސް ޗުއްޓީ ހޭދަކުރެއްވީ ނަލަދޫ ޕްރައިވެޓް އައިލެންޑްގައެވެ.
ދުނިޔޭގެ ނަންހިނގާ ބައެއް ފުޓްބޯޅަ ތަރިންވެސް މިހާރު ޗުއްޓީ ހޭދަކޮށްލުމަށް އަަންނަ މަންޒިލަކަށް ވެފައިވަނީ ރާއްޖެއެވެ. ރާއްޖޭގެ ފުޓްބޯޅަ ކުރި އަރުވައި ފުޓުބޯޅައިގެ ފޯރި ގެނައުމަށް މަޝްހޫރު ތަރިން ރާއްޖެ ގެނެސްގެން މަސައްކަތްކުރާކަން ވެސް ފާހަގަކުރެވެއެވެ. މިއަަރު ރާއްޖެ އައި މަޝްހޫރު ފުޓްބޯޅަ ތަރިންގެ ތެރޭގައި އައިވަރީ ކޯސްޓުގެ ތަރި ޑިޑިއަރ ޑްރޮގްބާ އާއި، އިޓަލީގެެ ފުޓްބޯޅަ ލެޖެންޑު ޖިއަންލޫކާ ޒަމްބްރޯޓާ، ބާސެލޯނާގެ ކުރީގެ ކެޕްޓަން ކާލްސް ޕުޔޯލް، މެންޗެސްޓާ ޔުނައިޓެޑްގެ ކުރީގެ ފޯވާޑް ޑްވައިކް ޔޯކް ފަދަ ކުޅުންތެރިން ފާހަގަކޮށްލެވެއެވެ.
ފުޓްބޯޅަ ތަރިންނާއި ދުނިޔޭގެ ބޮޑެތި މަހުޖަނުންގެ އިތުރުން ހޮލީވުޑް އާއި ބޮލީވުޑްގެ ތަރިންގެ މެދުގައިވެސް ރާއްޖެ އަކީ މަގުބޫލު މަންޒިލެކެވެ. ބޮލީވުޑްގެ ތަރި އަމީތާބު ބައްޗަންގެ އުފަންދުވަސް މިއަަހަރުވެސް ފާހަގަކޮށްފައިވަނީ ރާއްޖޭގައެވެ. މިއަހަރު ރާއްޖެ ޒިޔާރަތްކުރި ބޮލީވުޑް ފަންނާނުންގެ ތެރޭގައި ސޮނާކްޝީ ސިންހާ، ޕްރިޔަންކާ ޗޯޕްރާ، ސަލްމާން ޚާން އަދި ސާގަރިކާ ފަދަ ތަރިން ހިމެނެއެވެ. މީގެ އިތުރުން ބޮލީވުޑްގެ ތަރި އަދި އިންޑިއާގެ ކުރީގެ ރީތީގެ ރާނީ އުރުވަޝީ ރައުޓެލާ ވެސް ވަނީ މަޓާޓޯ އެވޯޑް ހަފްލާގައި ބައިވެރިވުމަށް ރާއްޖެ އައިސްފައެވެ.
ބޮލީވުޑްގެ ތަރިންގެ އިތުރުން އިންޑިއާގެ ޑްރާމާ ސިލްސިލާތަކުން ފާހަގަ ކުރެވޭ ބައެއް ފަންނާނުންވެސް މިއަހަރު ރާއްޖެ ޒިޔާރަތްކުރިއެވެ. އޭގެ ތެރޭގައި ކުމްކުމް ބާގްޔާގެ ތަރި ޝަބީރު އަދި ޖަމާއީ ރާޖާގެ ރޯޝްނީ ހިމެެނެއެވެ.
ހޮލީވުޑް ފަންނާނުންގެ ތެރެއިން މިއަހަރު ރާއްޖެ ޒިޔާރަތް ކުރި އެންމެ ފާހަގަ ކުރެވޭ ފަންނާނަކީ ލިއޮނާޑޯ ޑި ކެޕްރިއޯ އެވެ. އޭނާ ރާއްޖެ އައިސްފައިވަނީ ޖުލައިމަހުއެވެ. ޗުއްޓީ ނިންމާފައި އެނބުރި ފުރަން ތައްޔާރުވެފައިވަނިކޮށް ޖެޓަށް މައްސަލައެއް ދިމާވެ ލިއޮނާޑޯ އެއާޕޯޓުގައި ތާށިވެފައި ހުރި ކަމަށްވެސް އަޑު ފެތުރުނެއެވެ.
މީގެ އިތުރުން ރަޝިއާގެ ކުރީގެ ރީތީގެ ރާނީ ޓަޓްޔާނާ އާއި އިޓަލީގެ މަޝްހޫރު މޮޑެލެއް ކަމަށްވާ މަރިއާނޯ ޑި ވާޔޯ އަކީވެސް މިއަހަރު ރާއްޖެ ޒިޔާރަތްކުރި މަޝްހޫރު ފަންނާނުންގެ ލިސްޓުގައި ހިމެނޭ މީހުންނެވެ.
މިއީ މިއަހަރު ރާއްޖެ ޒިޔާރަތް ކުރި ފަންނާނުންގެ ތެރެއިން ފާހަގަކޮށްލެވޭ މީހުންނެވެ. އަހަރު ނިމިގެންދާއިރު އަދިވެސް މި ލިސްޓަށް ނަންތައް އިތުރުވުމަކީ އެކަށީގެންވާ ކަމެކެވެ. އަންނަ އަހަރުގެ ލިސްޓު އަދި މިއަށްވުރެ ދިގުވެސް ވެދާނެއެވެ.