ޕީސް ފައުންޑޭޝަނުން މިއަހަރުގެ ޖުލައި މަހު އިފްތިތާހު ކުރި ދަ ލެގަސީ އިވެންޓްގައި ބައިވެރިވެވަޑައިގެން ތަގުރީރު ކުރެއްވުމަށް ދުނިޔޭގެ މަޝްހޫރު ދީނީ އިލްމްވެރިޔާ މެލޭޝިއާގެ އައްޝައިޚް ހުސައިން ޔީ ރާއްޖެ ވަޑައިގަނެފިއެވެ.
ޔީ ރާއްޖެވަޑައިގަތުމުން އޭނާއަށް މަރުހަބާ ދެންނެވީ ޕީސް ފައުންޑޭޝަންގެ އިސްވެރިންނެވެ.
މިރޭ މާލެވަޑައިގެން ޔީ "ސަން" އަށް ވިދަޅުވީ ރާއްޖެއަށް އާދެވުމަކީ ލިބޭ އުފަލެއް ކަމަށާއި ދިވެހީންނަކީ އަބަދުވެސް ބައްދަލުކޮށްލާހިތްވާ ބައެއް ކަމަށެވެ.
ޔީ ވިދާޅުވީ އޭނާގެ މި ދަތުރުގައި ދިވެހީންނަށް މުހިންމު މައުލޫމާތުތަކެއް ފޯރުކޮށްދެވޭނެ ކަމަށް އުންމީދު ކުރައްވާ ކަމަށެވެ.
ޝައިހް ހުސައިން ޔީގެ ދަރުސް ޑިސެމްބަރު 28 އަދި 29 ގައި ބޭއްވުމަށް ނިންމާފައިވާ އިރު ޕަބްލިކް ޓޯކް އަދި ޒުވާނުންނަށް އަމާޒުކޮށްގެން ތަފާތު ދީނީ ވޯކްޝޮޕްތައް ވެސް ޝައިހްގެ ދަތުރުފުޅުގެ ތެރޭގައި ކުރިއަށް ގެންދަވާނެ ކަމަށް ޕީސް ފައުންޑޭޝަނުން ބުންޏެވެ.
ދަ ލެގަސީ ސިލްސިލާގެ ފުރަތަމަ ދަރުސް ޖުލައި މަހު ބޭއްވި އިރު، އެ ދަރުސްގައި ތަގްރީރު ކުރެއްވީ ޑރ. ބިލާލް ފިލިޕްސް އެވެ. އެ ދަރުސްގައި 12000 ވަރަކަށް މީހުން ބައިވެރިވި ކަމަށާއި ޝައިހް ހުސައިން ޔީގެ ދަރުހަށް ވެސް އެފަދަ ބޮޑު ތަރުހީބެއް ލިބޭނެ ކަމަށް އުންމީދު ކުރާ ކަމަށް ޕީސް ފައުންޑޭޝަނުން ބުންޏެވެ.