މިނިވަން 50 ގެ ހަރަކާތްތަކަށް 66 މިލިއަނަށްވުރެ ގިނަ ރުފިޔާ ހަރަދުކޮށްފައިވަނީ ފިނޭންސް މިނިސްޓްރީން ދޫކޮށްފައިވާ ހުއްދައާއި މާލިއްޔަތު ގާނޫނާ ޚިލާފަށް ކަމަށް ހޯމް މިނިސްޓްރީގެ އޮޑިޓް ރިޕޯޓުގައި ބުނެފި އެވެ.
އޮޑިޓް އޮފީހުން އާއްމު ކުރި ހޯމް މިނިސްޓްރީގެ 2015 ވަނަ އަހަރުގެ އޮޑިޓް ރިޕޯޓުގައި ބުނެފައިވަނީ، ކުލަގަދަކޮށް ރާއްޖޭގައި ފާހަގަކުރި މިނިވަން 50 ގެ ހަރަކާތްތަކަށް އިއުލާނުކޮށްގެން ހަރަދު ކުރަން ފިނޭންސް މިނިސްޓްރީން ހާއްސަ ހުއްދައެއް ދީފައިވާ ކަމަށެވެ. ނަމަވެސް، 63 މިލިއަން ރުފިޔާ މަސައްކަތް ކޮށްދޭނެ ފަރާތެއް ހޯދުމަށް އިއުލާނު ނުކޮށް ހަރަދުކޮށްފައިވާ ކަމަށް އެ ރިޕޯޓުގައިވެއެވެ.
އެގޮތުން މާލެ ސަރަހައްދު ދިއްލައި ޒީނަތްތެރިކުރުމަށް 9.3 މިލިއަން ރުފިޔާ ހަރަދުކޮށްފައިވެ އެވެ. އަދި ކުލަބޮކި ދިއްލުމަށް ބޭނުންވާ ޕެނަލް ހަރުކުރުމަށް 19 މިލިއަނަށްވުރެ ގިނަ ރުފިޔާ ހަރަދުކޮށްފައިވެ އެވެ. އޭގެ އިތުރުން ހެވިކަމުގެ ކުޅިވަރުގެ ދިއްލުންތަކަށާއި، އަޑަށް ބޭނުންވާ ތަކެތީގެ ކުއްޔަށާއި، އެތަކެތި ގަލޮޅު ދަނޑުގައި ހަރުކުުރުމަށް 18 މިލިއަނަށްވުރެ ގިނަ ރުފިޔާ ގާނޫނާ ޚިލާފަށް ކޮށްފައިވާ ކަމަށް ރިޕޯޓުގައި ފާހަގަކޮށްފައިވެ އެވެ.
އޭގެ އިތުރުންވެސް، މިއުޒިކް ޝޯއަށް 2.7 މިލިއަން ރުފިޔާ ޚަރަދުކޮށްފައިވެ އެވެ. އަދި އެ ހަރަކާތައް ޕީއެސްއެމްއިން ލައިވް ކުރުމަށް ބޭނުންވާ ތަކެތި ގަތުމަށް 5.2 މިލިއަން ރުފިޔާ ގަވާއިދާ ޚިލާފަށް ހަރަދުކޮށްފައިވާ ކަމަށް އޮޑިޓް ރިޕޯޓުގައި ފާހަގަކޮށްފައިވެ އެވެ.
އެ ރިޕޯޓުގައިވަނީ، އެ ހަރަދުތައް މާލިއްޔަތު ގަވާއިދާ ޚިލާފަށްކޮށްފައިވާތީ އެކަން އިތުރަަށް ބެލުމަށްޓަކައި ކަމާގުޅޭ އިދާރާތަކަށް ހުށަހެޅުމަށް ލަފާދީފައެވެ.