މިއާންޒް އިންޓަރނޭޝަނަލް ކޮލެޖް (މައި ކޮލެޖް)ގެ 987 ދަރިވަރަކު ދަސްވެނިވެއްޖެއެވެ.
ރާއްޖޭގެ 16 ރަށެއްގައި ޖުމްލަ 17 ކެމްޕަސް މެދުވެރިކޮށް މައި ކޮލެޖުން ހިންގި 23 ކޯހުގެ ދަރިވަރުންނަށް ދަސްވެނިވި ކަމުގެ ހަނދާނީ ލިޔުން ހަވާލުކުރީ މިދިޔަ ހޮނިހިރު ދުވަހުގެ ރޭ ދަރުބާރުގޭގައި ބޭއްވި ހާއްސަ ރަސްމިއްޔާތެއްގައެވެ.
ރަސްމިއްޔާތު ޝަރަފުކޮށްދެއްވައި ވާހަކަފުޅު ދައްކަވަމުން ކުރީގެ ރައީސް ޑރ. މުޙައްމަދު ވަހީދު ހަސަން ވިދާޅުވީ، މައި ކޮލެޖަކީ ވަރަށް ކާމިޔާބު ކޮލެޖެއް ކަމަށާއި ކޮލެޖްގެ މުސްތަގްބަލް ވަރަށް އުޖާލާކަމަށެވެ.
"އަޅުގަނޑުގެ ވަރަށް ބޮޑު އުފަލެއް މި ކޮލެޖް ކާމިޔާބުވާ ތަން ދުށުމަކީ. ކޮލެޖަށް ލިބޭ ފަހުރެއް އެއީ ކޮލެޖްގެ ރެކްޓަރަކަށް އާމާލް ހުންނެވުން. އެކަމަނާ އަކީ ހިންގުންތެރި ގާބިލް އަންހެނެއް. މި ފަދަ ކާމިޔާބީތައް މި ލިބެނީ ސަރުކާރުގެ ވެސް އެހީތެރި ކަމެއް ދޭތީ،" ރައީސް ވަހީދު ވިދާޅުވިއެވެ.
" ލުއި ލޯނުގެ ހިދުމަތް ހަމަޖައްސައިފައިވާތީ އެކަމަށް ފަސޭހަވެގެން ދަނީ. ކޮންމެ ކުއްޖަކުވެސް ވާންވާނީ ހިއްވަރާއެކީ ކެރިގެން ކުރިއަށްދާނެ ފަދަ ކުއްޖަކަށް. ގައުމުގެ ގިނަ ދަރިންތަކަކަށް މަތީ ތައުލީމު ލިބުމަކީ ގައުމަށް ލިބޭނެ ވަރަށް ބޮޑު ނިއުމަތެއް. ކޮންމެ ކުއްޖަކުވެސް ވާންވާނީ އަހްލާގް ރަނގަޅު ކެތްތެރި ކުދިބަޔަކަށް."
ބެލެނިވެރިންނަކީ އަބަދުވެސް ދަރިވަރުންގެ ކާމިޔާބީގެ ފަހަތުގައިވާ އެންމެ ބޮޑު ސިއްރު ކަމަށާއި އެ މީހުންގެ އެހީތެރިކަމާ ނުލާ ދަރިވަރުން ކާމިޔާބު ދަރިވަރަކަށް ނުވާނެކަމަށްވެސް ކުރީގެ ރައީސް ވަޙީދު ވިދާޅުވިއެވެ.
މައި ކޮލެޖުން ބުނީ އެ ކޮލެޖްގައި މިއަހަރު ޖުމްލަ 1700 ދަރިވަރުން މަތީ ތަޢުލީމު ހާސިލްކުރަމުންދާ ކަމަށާއި އަދި މިއަހަރު އަލަށް މާސްޓަރސް އިން އެޑިއުކޭޝަން ކޯސް ސ. ހިތަދޫ، ހދ. ކުޅުދުއްފުށި އަދި ގއ. ވިލިގިލީގައި ވަނީ ފެށިފައިކަމަށެވެ. އެއާއެކު ދިވެހި ބޭސްވެރިކަން ދަސްކޮށްދޭ ކޯހެއްވެސް މިއަހަރު ފަށައިގެން ކުރިއަށްދާ ކަމަށް ވެސް އެ ކޮލެޖުން ބުންޏެވެ.