ކަނބަލުންނަކީ ފިރިހެނުންނާ ހަވާލު ކުރެވިފައިވާ އަމާނާތެއް ކަމަށާއި އެ ކަނބަލުންގެ ހައްގުތައް ރައްކާތެރިކުރުމަށް އިސްލާމްދީން ވަރަށް ބޮޑަށް ބާރުއަޅާކަމަށް މިއަދުގެ ހުކުރު ޚުތުބާގައި ބުނެފިއެވެ.
"އިސްލާމް ދީނުގައި އަންހެނުނަށް ދީފައިވާ ދައުރު" މި މައުލޫއަށް އިންސާފު ކުރަމުން ހުތުބާގައި ބުނެފައިވަނީ، އަންހެނުނަށް ދޭން ޖެހޭ ހައްގު މަގާމު ދެވިގެންދިޔައީ އިސްލާމްދީން ވުޖޫދަށް އައި ހިސާބުން ކަމަށާއި ދީން ބާރު އަޅަނީ އެ ކަނބަލުންގެ ހައްގުތައް ހިމާޔަތް ކުރުމަށް ކަމަށެވެ.
އަދި ހުތުބާގައި ބުނެފައިވަނީ ދަރިން ތަރުބިއްޔަތު ކުރުމުގައި އަންހެން އަދި ފިރިހެން ކުދިންގެ މެދުގައި ތަފާތު ނުކުރުމަށާއި ހުރިހާ ކުދިންނާ މެދު ވެސް އިންސާފުން ކަންކަން ކުރުމަށެވެ. އަދި ފިރިހެން ދަރިންނަށް އޯގާތެރިވާ ފަދައިން އަންހެން ދަރިންނަށްވެސް އޯގާތެރިވުމަށް ދީން ބާރު އަޅާކަމަށްވެސް ވަނީ ބުނެފައެވެ.
ހުތުބާގައި ބުނެފައިވަނީ، އަންހެން ދަރީންނަށް ވެސް ތައުލީމް އުނގެނުމުގެ ހުރިހާ ފުރުޞަތެއް ހޯދައިދޭން ޖެހޭ ކަމަށާއި އެ ދަރީންނަށް އަސާސީ ހުރިހާ ވަސީލަތެއް ފޯރުކޮށްދޭން ޖެހޭ ކަމަށެވެ. އަދި އަންހެން ދަރިއަކު ލިބި އެ ކުއްޖާއަށް ހެޔޮކޮށްހިތައި ތައުލީމް އުނގަންނައިދީ އަދި ހެޔޮގޮތުގައި ތަރުބިއްޔަތުކޮށްފި މީހަކަށް ދެ ހެޔޮކަން ލިބިގެން ދާނެ ކަމަށް ރަސޫލާ صلى الله عليه وسلم އަންގަވާފައިވާ ކަމަށެވެ.
ތައުލީމީ އަދި ގާބިލް ކަނބަލުންގެ މުހިއްމުކަން ތާރީހުން ހެކި ދައްކަމުން ހުތުބާގައި ބުނެފައިވަނީ ރަސޫލާގެ އަނބިކަނބަލުން އައިޝަތުގެފާނަކީވެސް އިލްމުވެރި ބޭކަނބަލެއް ކަމަށާއި އެކަމަނާއަކީ ހަދީޘް ރިވާކުރެއްވި ބޭކަނބަލެއް ކަމަށެވެ. އަދި އެކަމުން އަންހެން ދަރިންނަށް ތައުލީމް ދިނުމަށް އިސްލާމްދީން ބާރު އަޅާ މިންވަރު ދޭހަވެގެންދާކަމަށް ވަނީ ބުނެފައެވެ.
ހުތުބާގައު ބުނެފައިވަނީ ކައިވެންޏަކީ އަންހެން ކުއްޖަކަށް އެންމެ މުހިއްމު ކަން ކަމަށާއި ކައިވެނި ކުރުމުގައި އެ ކަނބަލުން ރުހޭ މީހަކާ ކައިވެނި ކުރުމުގެ ހައްގު ލިބިގެންވާކަމަށެވެ. އަދި އެ ކަނބަލުން ނުރުހޭ މީހަކާ މަޖުބޫރުން ކައިވެނި ކުރުވުން ހުއްދަވެގެން ނުވާ ކަމަށްވެސް ވަނީ ބުނެފައެވެ.
އަދި ކައިވެންޏަށް ފަހު އަންހެން މީހާއަކީ ފިރިމީހާގެ އަމާނާތެއް ކަމަށާއި އެ އަމާނަތަށް ރައްކާތެރިވާން ޖެހޭ ކަމަށްވެސް ވަނީ ބުނެފައެވެ. އެގޮތުން އެ ކަނބަލުން ވަރިކޮށްލައި ނިކަމަތެކޮށްލުން ދީން ނަހީ ކުރައްވާ ކަމަށްވެސް ވަނީ ބުނެފައެވެ. އަދި އިނދެ ވަރިކުރުމަކީ ކުޅިވަރެއްގެ ގޮތުގައި ނުހެދުމަށް ދީނުގައި އަންގަވާފައިވާ ކަމަށެވެ. މީގެ އިތުރުން އަންހެނުންނަށް އަނިޔާވެރި ނުވުމަށާއި އެކަނބަލުންގެ އެންމެހާ ހައްގުތަކަށް ފިރިމީހާ ރައްކާތެރިވުމަށްވެސް ހުތުބާގައިވަނީ ގޮވާލައިފައެވެ.
ހުތުބާގައި ބުނެފައިވަނީ ކަނބަލުންނަށް ހެޔޮކޮށް ހިތުމަށް ކީރިތި ރަސޫލާ صلى الله عليه وسلم ވަސިއްޔަތް ކުރެއްވި ކަމަށާއި ހައްޖަތުލް ވަދާއުގައި އެ ވަސީޔަތް ތަކުރާރު ކުރެއްވި ކަމަށެވެ. އަދި ކަނބަލުންނަށް އަމާނަތްތެރިވުމަށްވެސް އެކަލޭގެފާނު މި އުންމަތަށް ވަސިއްޔަތް ކުރެއްވި ކަމަށްވެސް ވަނީ ބުނެފައެވެ.