އާބާދީގެ ނިސްބަތުން އޭޝިއާ ސަރަހައްދުގައި އަނގައިގެ ކެންސަރު އެންމެ ގިނައީ ރާއްޖޭގައި ކަމަށް ދަތުގެ މަޝްހޫރު ޑޮކްޓަރު އަހުމަދު ސަލީމް ވިދާޅުވެއްޖެ އެވެ.
ޑރ. ސަލީމް އެހެން ވިދާޅުވީ މި ސަރަހައްދުގައި ހަދާފައިވާ ދިރާސާއަކާ ހަވާލާ ދެއްވައެވެ. ބުރާސްފަތި ދުވަހުން ފެށިގެން މިރޭ 10:00 އާހަމަށް ނޭޝަނަލް އާޓްގެލެރީގައި ކުރިއަށްދާ މޯލްޑިވްސް މެޑިކަލް އެންޑް ހެލްތް އެކްސްޕޯގައި އިންނަވައި 'ސަން' އާ ވާހަކަފުޅު ދައްކަވަމުން ސަލީމް ވިދާޅުވީ، އަނގައިގެ ކެންސަރު ރާއްޖޭގައި ގިނަވަނީ ދިވެހިންގެ ކެއުންބުއިމުގެ ވައްޓަފާޅި ހުންނަ ގޮތުން ކަމަށެވެ.
" ބައެއް ބޭފުޅުންނަށް ހީވެފައި އޮންނަނީ ދުފުމަކީ ސަގާފީ ކަމެކޭ. އެއީ ދިވެހިންގެ އާދަކާދަ ތެރޭގައި ހިމެނޭ ކަމެކޭ. މީހުން އެބަ ވިސްނާލަން ޖެހޭ އެކަމުގެ ސަބަބުން އަނގައިގެ ކެންސަރަށް މަގުފަހިވާކަން،" ޑރ ސަލީމް ވިދާޅުވި އެވެ.
ރާއްޖޭގައި ބާއްވާ ބައެއް ސަގާފީ ހަރަކާތްތަކުގައި ސަގާފީ ހެދުމުގައި މީހުން ދައްކުވައިދޭއިރު ދުފާ ތަބަށް ހިފައިގެން ދުފަން ތިބެ އެވެ. އެމަންޒަރު ޓީވީންވެސް ދައްކައި ހަދައެވެ.
ޑރ ސަލީމް ވިދާޅުވި ގޮތުން ދުފުމަކީ ދިވެހިން އާދަކާދައާ ސަގާފީ ކަމަށްކަމަށް ހަދާވަރަށް ވުރެ ސިއްހީގޮތުން ނުރައްކާތެރި ކަމާ ކުރިމަތިލާން ޖެހޭ ކަމެކެވެ.
އޭގެ އިތުރުން ދިވެހިންގެ ކެއިން ބުއިމުގެ އާދަކާދަތައް ހުންނަ ގޮތުން ކެންސަރަށް މަގުފަހިވާ ކަމަށް ސަލީމް ވިދާޅުވި އެވެ.
އަނގައިގެ ކެންސަރުގެ އަލާމާތްތަކުގެ ތެރޭގައި އަނގަތެރެ ދުޅަވުމާއި އަނގަތެރެ ފާރުވުމާއި ދަތްތައް ފޭބުމާއި ދުލުގައި ރިއްސުމާއި ހަފާއިރު އުނދަގޫވުން ފަދަ ކަންކަން ހިމެނެ އެވެ.