ދެމަފިރިންގެ ގުޅުމުގައި އެންމެ މުހިއްމު އެއް ކަމަކީ އެކަކު އަނެކަކަށް އިތުބާރު ކުރުމާއެކު އަމިއްލަ އެދުން އިސްނުކުރުމެވެ. ތިމާގެ އަމިއްލަ އެދުންތަކަށް ވުރެ އަނބިމީހާ ނުވަތަ ފިރިމީހާގެ އެދުންތައް އިސްކުރުމެވެ. ޚާއްސަކޮށް ފިރިމީހާ، އަނބިމީހާގެ ފަރާތުން ބޭނުންވާ ކަންތައް ފުރިހަމަ ކޮށްދިނުމަކީ ކައިވެނި ބާއްޖަވެރިކުރުމަށް އެންމެ މުހިއްމު އެއްކަންތަކެވެ.
ވިސްނަންވީ އެންމެ މުހިއްމު ކަމަކީ ދެ މީހެއްގެ "ޓޭސްޓް" އަކީ ތަފާތުވާނެ އެއްޗެއްކަމެވެ. ނަމަވެސް ފިރިމީހާ ބޭނުންވާ މިކަންތައް އަނބިމީހާއަށް އެނގުމަކީ އުފާވެރި ދިރިއުޅުމަކަށް މުހިއްމު ކަމެކެވެ.
ފިރިމީހާގެ ހޮބީތައް:
ހުސްވަގުތުގައި ފިރިމީހާ އެންމެ ކުރަން ބޭނުންވަނީ ކޮންކަމެއްތޯ އަނބިމީހާ އަށް އެނގުމަކީ މުހިއްމު ކަމެކެވެ. ދެމީހުން އެކުގައި މިފަދަ ކަމެއް ކުރަން ހޭދަކުރުމަކީ ދެމަފިރިންގެ ގުޅުން ވަރުގަދަވާނެ ކަމެކެވެ.
ފިރިމީހާގެ މަސައްކަތް ބަލައިގަތުން:
ފިރިމީހާ ކުރާ މަސައްކަތް، ޚާއްސަކޮށް ދިރިއުޅުމަށް ކުރާ މަސައްކަތް ބަލައިގަނެ، އެކަމަށް އަނބިމީހާގެ ސަޕޯޓް ދިނުމަކީ ފިރިމީހާއަށް ލިބޭނެ ހިއްވަރެކެވެ. ދެމީހުންގެ ދިރިއުޅުމަށްޓަކައި ފިރިމީހާ ބުރަކޮށް މަސައްކަތް ކުރާ އިރު އަނބިމީހާ އެކަން ދަނެ، ފިރިމީހާގެ މަސައްކަތްތަކަށް އެޕްރިޝިއޭޓް ކުރަންވާނެއެވެ. ކާމިޔާބު ފިރިހެނެއްގެ ފަހަތުގައި އަބަދުވެސް އޭނާއަށް ސަޕޯޓްދޭ އަންހެނަކު ހުރެޔޭ މީހުން ބުނޭ ނޫންހެއްޔެވެ.؟
ގޭތެރޭގައި އުޅޭއިރު ދެމީހުން ބަހާލައިގެން މަސައްކަތް ކުރުން:
އަނބިމީހާ އާއެކު ވަގުތު ހޭދަކުރުމަށް ފިރިމީހާ ވެސް ބޭނުންވާނެއެވެ. މިގޮތަށް ދެމީހުންނަށް އެކުގައި ވަގުތުހޭދަކޮށްލާ އެންޖޯއީ ކޮށްލެވޭނެ އެއް ކަމަކީ ގޭތެރޭގެ މަސައްކަތްތައް ދެމީހުން އެކުގައި ކޮށްލުމެވެ. މިސާލަކަށް ކައްކަން އުޅޭ ވަގުތު އަނބިމީހާއަށް އަތް ގާތްކޮށްލަދީ ހެދުން، ގޭތެރެ ފޮޅާ ސާފުކުރާއިރު އެހީތެރިވެދިނުމަކީ ފިރިމީހާ ކޮށްދޭން ބޭނުންވާނެ ކަންކަމެވެ. މި މަސައްކަތްތައް ކުރުމަށް ފިރިމީހާއަށް ފުރުސަތުދޭންވާނެއެވެ.
ފިރިމީހާގެ ކުރިމަތީ ރީތިވެލައިގެން ހުރުން:
ގޭތެރޭ އުޅޭއިރު "ފެންނުވަރައި" "ހަޑިކޮށް" ހުރުމުގެ ބަދަލުގައި ފިރިމީހާ ގޭގައި އުޅޭ ވަގުތު ރީތިވެލައިގެން ހުރުމަކީ ފިރިމީހާ ހިތްހަމަޖެހި، އުފާވާނެކަމެކެވެ. ޚާާއްސަކޮށް ދެމީހުން އެކުގައި ގޭގައި ހޭދަކުރާ ވަގުތުގައިވެސް އަނބިމީހާ ރީތިވެގެން ހުރުމަކީ ފިރިމީހާ ބޭނުންވާނެ ކަމެކެވެ. އަނބިމީހާ ރީތި ވާންވީ ބޭރަށް ދާ ވަގުތުގައި އެކަންޏެއް ނޫނެވެ. ދެމީހުން ގޭގައި ހޭދަކުރާ ވަގުތުވެސް ފިރިމީހާއަށް ޓަކައި އަނބިމީހާ ޒީނަތްތެރިވާންވާނެއެވެ.