ވޮޝިންޓަން (އޮކްޓޯބަރު 31): އެމެރިކާގެ ރައީސް ޑޮނަލްޑް ޓްރަމްޕްގެ ރިޔާސީ ކެމްޕެއިނާއި ރަޝިއާއާ އޮތް ގުޅުމާ ބެހޭ ގޮތުން އެފްބީއައިއިން ކުރިއަށްގެންދާ ތަހުގީގަށް އިތުރުފުޅު ހެއްދެވި ކަމަށް ޓްރަމްޕްގެ ކެމްޕެއިން އެޑްވައިޒަރެއް ކަމަށްވާ ޖޯޖް ޕަޕަޑުޕޮލޮސް އިއުތިރާފުވެއްޖެ އެވެ.
ކޯޓު ލިޔުންތަކުގައިވާ ގޮތުން މިދިޔަ ޖެނުއަރީ މަހު އެފްބީއައިގެ ސުވާލުތަކަށް ޖަވާބު ދެއްވަމުން ޕަޕަޑުޕޮލޮސް ވިދާޅުވި ގޮތުގައި އޭނާ ވަނީ މިދިޔަ އަހަރު ޓްރަމްޕްގެ ކެމްޕެއިނާ ގުޅުމުގެ ކުރިން ރަޝިއާއާ ގުޅުން ހުރި ދެ މީހަކާ ވާހަކަ ދައްކަވައިފަ އެވެ. ނަމަވެސް ފަހުން އޭނާ ވަނީ އެ ދެ މީހުންނާ ވާހަކަ ދެއްކެވީ ޓްރަމްޕްގެ ކެމްޕެއިނާ ގުޅުމަށް ފަހު ކަމަށް އެއްބަސްވެފަ އެވެ.
ޕަޕަޑުޕޮލޮސް ބައްދަލު ކުރެއްވި އެކަކަކީ ރަޝިއާގެ ސަރުކާރާ ގުޅުން ހުރި އެގައުމުގެ އަންހެނެކެވެ. އޭނާ މަސައްކަތް ކުރެއްވީ އެއަންހެން މީހާ މެދުވެރިކޮށް ޓްރަމްޕްގެ ކެމްޕެއިނާއި ރަޝިއާ ސަރުކާރުގެ އޮފިޝަލުންނާ ބައްދަލުވުމެއް ބާއްވަން ކަމަށް ޕަޕަޑުޕޮލޮސް ވަނީ ވިދާޅުވެފަ އެވެ.
އަދި އޭނާ ދެވަނައަށް ބައްދަލުކުރެއްވީ ރަޝިއާ ސަރުކާރުގެ އޮފިޝަލުންނާ ގުޅުން އޮތް އިނގިރޭސި ޕްރޮފެސަރަކާ އެވެ. އެޕްރޮފެސަރު ވަނީ ހިލަރީ ކްލިންޓަންގެ އީމެއިލްތަކެއް ރަޝިއާއަށް ލިބިފައިވާ ކަމަށް ބުނެފައި ކަމަށް ޕަޕަޑުޕޮލޮސް ވިދާޅުވި އެވެ.
ޓްރަމްޕްގެ ޕޮލިސީ އެޑްވައިޒަރެއްގެ ގޮތުގައި މަސައްކަތް ކުރެއްވި ޕަޕަޑުޕޮލޮސް ވަނީ ޓްރަމްޕްގެ ނެޝަނަލް ސެކިއުރިޓީ ޓީމުގައި ވެސް މަސައްކަތް ކުރައްވައިފަ އެވެ. ނަމަވެސް އޭނާ އެފްބީއައިއަށް އިތުރުފުޅު ހެއްދެވި ކަމަށް ބުނާ ރިޕޯޓުތަކާ ގުޅިގެން ވައިޓް ހައުސްއިން ވަނީ ޕަޕަޑުޕޮލޮސް ޓްރަމްޕްގެ ކެމްޕެއިނުގައި ރަސްމީ ގޮތެއްގައި މަސައްކަތްކޮށްފައި ނުވާ ކަމަށް ބުނެފަ އެވެ. (ބީބީސީ)