އަށް ރަށެއްގައި ކުނި މެނޭޖުކުރާ ނިޒާމްތައް ގާއިމުކުރުމުގެ މަސައްކަތް ފަސް ކުންފުންޏަކާ ހަވާލުކޮށްފި އެވެ.
އެ ރަށްތަކަކީ ހދ. ނޮޅިވަރަންފަރު، ހއ. ހޯރަފުށި، ނ. މާފަރު، ގއ. ކަނޑުހުޅުދޫ، ގއ. ދާންދޫ، ވ. ފުލިދޫ، ގއ. ކޮލަމާފުށި އަދި ގދ. ތިނަދޫ އެވެ.
މިއަދު އެންވަޔަރަންމަންޓް މިނިސްޓްރީގައި ބޭއްވި ރަސްމިއްޔާތުގައި ވާހަކަފުޅު ދައްކަވަމުން ޑެޕިއުޓީ މިނިސްޓަރު އަލީ އާމިރު ވިދާޅުވީ ރައީސް އަބްދުﷲ ޔާމީން އަބްދުލްގައްޔޫމްގެ ސިޔާސަތުގައި ސާފު ރާއްޖޭގެ މަޝްރޫއަކީ ވަރަށް އިސްކަމެއްދީގެން ރައީސް ބައްލަވަމުން ގެންދާ މަޝްރޫއެއް ކަމަށެވެ.
"މިކަމަކީ ރައީސްގެ ބެއްލެވުމުގެ ދަށުން ހިނގާ ކަންތައްތައް. ފަސް ރަށެއްގައި ކުނި ކޮށި ގާއިމުކުރެވިގެންދާނެ. އެއް ރަށެއްގައި ކުނިކޮށި އަޕްގްރޭޑް ކުރިވިގެންދާނެ. އަދި ދެ ރަށެއްގައި ކުނި އަންދާ މެޝިން ގާއިމު ކުރެވިގެންދާނެ. މި މަޝްރޫއުތަކަކީ ސަރުކާރުގެ ޕަބްލިކް ސާވިސް އިންވެސްޓްމަންޓް ޕްރޮގްރާމް (ޕީއެސްއައިޕީ) އިން ހަމަޖައްސައިފައިވާ ބަޖެޓުން ހިނގާ މަޝްރޫއުތައް. މި އަހަރަކީ ސަރުކާރުން ރާއްޖޭގައި ކުނި މެނޭޖުކުރުމަށް އެންމެ ގިނަ މަޝްރޫއުތަކަށް އެންމެ ބޮޑު ހަރަދު ދީގެން ހޭދަކުރެވިގެންދާ އަހަރު،" ޑެޕިއުޓީ މިނިސްޓަރު ވިދާޅުވި އެވެ.
ހދ. ނޮޅިވަރަންފަރު އަދި ގއ. ކަނޑުހުޅުދޫގެ ކުނި މެނޭޖުކުރާ މަރުކަޒު ގާއިމު ކުރުމަށް ހަވާލުކޮށްފައި ވަނީ އައިއެސްއެފް ކޮމްޕެނީ ޕްރައިވެޓް ލިމިޓެޑާ އެވެ.
އެންވަޔަރަންމަންޓް މިނިސްޓްރީ އިން ބުނީ ނޮޅިވަރަންފަރުގެ މަޝްރޫއު ފުރިހަމަ ކުރުމަށް 1.07 މިލިއަން ރުފިޔާ ހަރަދުވާ ކަމަށާއި ކަނޑުހުޅުދޫގެ މަޝްރޫއު ފުރިހަމަކުރުމަށް ހޭދަވަނީ 1.4 މިލިއަން ރުފިޔާ ކަމަށެވެ.
އެ ދެ ރަށުގެ މަސައްކަތް ނިންމުމަށް ހަވާލުކޮށްފައި ވަނީ 90 ދުވަހުގެ ތެރޭގައި މަސައްކަތް ނިންމާ ގޮތަށް ކަމަށް މިނިސްޓްރީ އިން ބުންޏެވެ.
ހއ. ހޯރަފުށީގައި ކުނި މެނޭޖުކުރާ މަރުކަޒެއް ގާއިމްކުރުމަށް ހަވާލުކޮށްފައި ވަނީ އަޒްރޯވާ ޕްރައިވެޓް ލިމިޓެޑާ އެވެ. އެ މަރުކަޒު ގާއިމުކުރުމަށް 953،763.27 ރުފިޔާ ހޭދަވާ އިރު މި މަސައްކަތް 90 ދުވަހުގެ ތެރޭގައި ނިންމަން ޖެހެއެވެ.
މީގެ އިތުރުން ގއ. ދާންދޫގެ ކުނި މެނޭޖުކުރުމުގެ މަޝްރޫއާއި ގއ. ކޮލަމާފުށީގެ ކުނި މެނޭޖުކުރުމުގެ މަޝްރޫއުވެސް އެ ކުންފުންޏާ ހަވާލުކުރިއެވެ.
މިނިސްޓްރީގެ ފަރާތުން އެއްބަސްވުމުގައި ސޮއިކުރައްވާފައިވަނީ ޑެޕިއުޓީ މިނިސްޓަރެވެ. ކުންފުނީގެ ފަރާތުން ސޮއިކުރައްވާފައިވަނީ އެ ކުންފުނީގެ މެނޭޖިންގް ޑިރެކްޓަރު އަހުމަދު އަމީނެވެ.
ދާންދޫގައި ކުރިއަށް ގެންދާ މަޝްރޫއު ފުރިހަމަކުރުމަށް 821،772.15 ރުފިޔާ ހޭދަވާއިރު ކޮލަމާފުށީގެ މަސައްކަތް ނިންމުމަށް 1،1314،592.88 ރުފިޔާ ހޭދަވެގެންދާކަމަށް އެންވަޔަރަންމަންޓް މިނިސްޓްރީއިން ބުންޏެވެ. މަސައްކަތް ނިންމުމަށް ވަނީ ކޮންމެ ރަށަކަށް 95 ދުވަހުގެ މުއްދަތެއް ދީފައެވެ.
ނ. މާފަރު އަދި ވ. ފުލިދޫގެ ކުނި މެނޭޖުކުރުމަށް ހަވާލުކޮށްފައިވަނީ ނިއު ހިޔާ މޯލްޑިވްސްއާ އެވެ. ކުންފުނީގެ ފަރާތުން ސޮއިކުރައްވާފައިވަނީ ޑައިރެކްޓަރު ހުސައިން ސިމާއު އެވެ.
ފުލިދޫގެ މަޝްރޫއު ނިންމުމަށް 1،056،106.86 ރުފިޔާ ހޭދަވާއިރު މާފަރުގެ މަޝްރޫއު ނިންމުމަށް 1،059،513 ރުފިޔާ ހޭދަވާނެކަމަށް އެންވަޔަރަންމެންޓް މިނިސްޓްރީ އިން ބުންޏެވެ. މާފަރުގެ މަސައްކަތައް 90 ދުވަސް ދީފައިވާއިރު ފުލިދޫގެ މަސައްކަތް ނިންމުމަށް ވަނީ 75 ދުވަސް ދީފައެވެ.
ގދ. ތިނަދޫގެ ކުނި މެނޭޖުކުރުމަށް ނޫމަސް ކޮންސްޓްރަކްޝަނާ ހަވާލުކޮށްފައިވާއިރު އެ ކޮންސްޓްރަކްޝަންގެ ފަރާތުން އެއްބަސްވުމުގައި ސޮއިކުރެއްވީ ކުންފުނީގެ އެސިސްޓަންޓް ޑިރެކްޓަރު އަހުމަދު ޒާހިރެވެ. އެ ރަށުގެ މަސައްކަތައް 1،171،893.47 ރުފިޔާ ހޭދަވާއިރު މަޝްރޫއު ނިންމުމަށް ވަނި 55 ދުވަހުގެ މުއްދަތެއް މިނިސްޓްރީއިން ވަނީ ކަނޑައަޅައިފައެވެ.