މެޗު ނިމެން ދަނިކޮށް މެޓް ހަމެލްސް ކާމިޔަބު ކޮށްދިން ލަނޑާ އެކު ޗެކް ރިޕަބްލިކްގެ މައްޗަށް ކުރި ހޯދައި ޗެމްޕިއަން ޖަރުމަން އަންނަ އަހަރުގެ ވޯލްޑް ކަޕަށް ކޮލިފައިވުމުގެ ފުރުސަތު ބޮޑުކޮށްފި އެވެ.
ރަށުން ބޭރުގައި ޖަރުމަން ކުޅުނު އެ މެޗުގެ ހަތަރު ވަނަ މިނެޓުގައި ޒުވާން ފޯވާޑު ޓިމޯ ވޯނާ ވަނީ ލަނޑެއް ޖަހައި އެ ޓީމަށް ކުރި ހޯދައިދީފަ އެވެ. އެއާ އެކު ޗެކުން ވަނީ ކުޅުން ރަނގަޅުކޮށް ނަތީޖާ ހަމަހަމަ ކުރުމަށް ހަމަލާތަކެއް އުފައްދައިފަ އެވެ.
އެގޮތުން ޗެކް ރިޕަބްލިކުގެ ލަޑިމިއާ ޑަރިޑާ ވަނީ މެޗުގެ 78 ވަނަ މިނެޓުގައި ލަނޑެއް ޖަހައި ނަތީޖާ ހަމަހަމަ ކޮށްފަ އެވެ. ނަމަވެސް 88 ވަނަ މިނެޓުގައި ތަޖުރިބާކާރު ޑިފެންޑަރު ހަމެލްސް ސެޓްޕީސްއަކުން ބޮލުން ގޯލެއް ވައްދާލައި ޖަރުމަން މޮޅުކޮށްދީފަ އެވެ.
މި މެޗާ އެކު ޖަރުމަން މި ވަނީ ވޯލްޑް ކަޕް ކޮލިފައިންގައި ބަލިނުވެ 30 މެޗު ހަމަކޮށްފަ އެވެ.
ކުޅުނު ހަތް މެޗުން ވެސް މޮޅުވެ ގްރޫޕް ސީގެ އެއް ވަނާގައި 21 ޕޮއިންޓާ އެކު އޮތީ ޖަރުމަނެވެ. ދެ ވަނައިގަ އޮތް ނޮދަން އަޔަލެންޑަށް ލިބިފައިވަނީ 16 ޕޮއިންޓެވެ. އެ ޓީމު ވަނީ ރޭ ސެން މެރީނޯ އަތުން 3-0 އިން މޮޅުވެފަ އެވެ. ތިން ވަނާގައި އޮތީ ނުވަ ޕޮއިންޓާ އެކު ޗެކް ރިޕަބްލިކެވެ.
ގްރޫޕުގައި ކޮންމެ ޓީމަކަށް ބާކީ އޮތީ ތިން މެޗު އޮތް އިރު، ވޯލްޑް ކަޕަށް އޮޓޮމެޓިކުން ކޮލިފައިވާނީ ގްރޫޕުގެ އެއް ވަނަ ޓީމަށެވެ. ދެ ވަނަ ޓީމަށް ޖެހޭނީ ޕްލޭއޮފް ކުޅޭށެވެ.