ގަޑިއެއްހާ އިރަކަށް މާލެއިން ކަރަންޓު ކެނޑިފައިވާއިރު، މައްސަލަ ހައްލުކޮށް ބޮޑު ބަޔަކަށް ކަރަންޓު ދީފައިވާ ކަމަށް ސްޓެލްކޯ އިން ބުނެފި އެވެ.
މިރޭ 11:15 ހާއިރު މާފަންނާއި ހެންވޭރުން ވެސް ވަނީ ކަރަންޓު ކެނޑިފަ އެވެ. ސްޓެލްކޯގެ އޮފިޝަލަކު ވިދާޅުވީ، ކަރަންޓު ކެނޑެން ދިމާވީ، ސަބްސްޓޭޝަނަކުން ކޭބަލަކަށް ދިމާވި މައްސަލައަކާ ގުޅިގެން ބޮޑު ދެ ޖެނެރޭޓަރެއް ނިވުވުން ކަމަށެވެ. އޭނާ ވިދާޅުވީ، އަދިވެސް ކުޑަ ސަރަހައްދަކަށް ކަރަންޓު ނުދެވޭ ކަމަށާއި، އެ ސަރަހައްދު ތަކަށް ކަރަންޓު ދިނުމަށް ކުޑަ ވަގުތުކޮޅެއް ނަގާނެ ކަމަށެވެ.
"ވަރަށް ބޮޑު ސަރަހައްދުތަކަށް ކަރަންޓު ދީފިން މިހާރު. އެކަމަކު އަދި ކުޑަ ސަރަހައްދެއް އެބައުޅޭ ކަރަންޓު ނުދެވި. އެ ސަރަހައްދަށް ކަރަންޓު ދިނުމަށް ކުޑަ ވަގުތު ކޮޅެއް ނަގާނެ އަދި،" އޭނާ ވިދާޅުވި އެވެ.