މިހާރު ދަރުބާރުގޭގައި ކުރިޔަށްދާ މޯލްޑިވްސް ފައިނޭންޝަލް އެކްސްޕޯގެ ތީމަކީ ގެދޮރުވެރިކަމާއި މާލީ ދާއިރާއެވެ. މިއަހަރުގެ މައުޟޫއު އެންމެ ގުޅެނީ ސަރުކާރުން ޔޫތު ސިޓީއެއްގެ ގޮތުގައި ތަރައްގީކުރާ ހުޅުމާލެއާއެވެ.
ހުޅުމާލެއަކީ މިވަގުތު އެންމެ ގިނަ ހައުސިންގް މަޝްރޫއުތައް ކުރިޔަށްދާ ސިޓީއެވެ. ސަރުކާރާއި، އަމިއްލަ ފަރާތްތަކަކުންވެސް ގިނަ މަޝްރޫއުތަކެއް ކުރިޔަށް އެބަ ގެންދެއެވެ.
ފައިނޭންޝަލް އެކްސްޕޯ އެމްއެމްއޭއިން މިއަހަރު ބާއްވަނީ ހުޅުމާލެ ތަރައްގީކުރާ ހައުސިންގް ޑިވެލޮޕްމެންޓް ކޯޕަރޭޝަން (އެޗްޑީސީ)އާ ގުޅިގެންނެވެ.
އެޗްޑީސީގެ ޑިރެކްޓަރ އޮފް ފައިނޭންސް އަލީ ޝަރީފް ވިދާޅުވި ގޮތުގައި، ފައިނޭންޝަލް އެކްސްޕޯއަކީ ހުޅުމާލޭގައި ކުރިޔަށް ގެންދާ ހައުސިންގް އަދި ރިއަލް އެސްޓޭޓު ޕްރޮޖެކްޓުތަކާ ބެހޭ މައުލޫމާތު، އާންމުންނަށް ލިބޭނެ ވަރަށް ރަނގަޅު ޕްލެޓްފޯމެކެވެ.
ފައިންޝަލް އެކްސްޕޯގައި އެޗްޑީސީގެ ސްޓޯލާއި ހުޅުމާލޭގައި ހިނގާ މަޝްރޫއުތައް ދައްކައިދޭ ސްޓޯލްތައް ހުރި މާލަން --- ފޮޓޯ/ އެޗްޑީސީ
"އާންމުންނަށް އެވެއިލަބަލް ހައުސިންގް ޔުނިޓުތަކާއި، އެތަންތަނަށް ފައިނޭންސް ކުރެވޭނެ އޮޕްޝަންސް މިތަނުން ބަލައިލެވޭނެ. މީގެ އިތުރުން އެމީހަކާ އެންމެ ގުޅޭ، އެފޯޑަބަލް ހައުސިންގް ޔުނިޓުތައް ހޯޑައި، އެތަންތަނަށް ފައިނޭންސް ކުރެވޭނެ ގޮތްތައް ހޯދޭނެ،" އެޗްޑީސީގެ ޑިރެކްޓަރ އޮފް ފައިނޭންސް ވިދާޅުވިއެވެ.
ފައިނޭންޝަލް އެކްސްޕޯގައި، ހުޅުމާލޭގައި ރިއަލް އެސްޓޭޓު މަޝްރޫއުތައް ހިންގަމުންދާ އަމިއްލަ ކުންފުނިތަކުން ބައިވެރިވެއެވެ.
އަލީ ޝަރީފް ވިދާޅުވި ގޮތުގައި، ހުޅުމާލެ ކަހަލަ ސިޓީއެއް ތަރައްގީކުރަމުން އަންނަ އިރު އެތަނުގައި ހުންނަންޖެހޭ ޚިދުމަތްތަކާ ބެހޭގޮތުން، ކަމާ ގުޅޭ ފަރާތްތަކުގެ މެދުގައި މަޝްވަރާކުރެވި، ގޮންޖެހުންތައް ދެނެގަނެ އެކަންކަމުން އަރައިގަނެވޭނެ ގޮތްތައް ހޯދުން ފަދަ ކަންކަން އެކްސްޕޯގެ ތެރެއިން ކުރިޔަށް ދާނެއެވެ.
މީގެ އިތުރުން ހައުސިންގް މާކެޓުގައި ހުރި ޗެލެންޖުތަކާއި، މފަދަ މައުޟޫއުތަކަށް ޕެނަލް ޑިސްކަޝަންތަކާއި ސެމިނާތައްވެސް އެކްސްޕޯގައި ކުރިޔަށްދާނެކަމަށް އޭނާ ވިދާޅުވިއެވެ.
ޯމޯލްޑިވްސް ފައިނޭންޝަލް އެކްސްޕޯ މިރޭ ނިމޭ އިރު، ޝަރީފް ވިދާޅުވި ގޮތުގައި އެތަނަށް ކޮންމެ ދުވަހަކުވެސް ގިނަ އަދަދެއްގެ މީހުން ޒިޔާރަތްކޮށް، ހައުސިންގް ފުރުސަތުތަކުން ދަނީ މައުލޫމާތު ހޯދަމުންނެވެ.
"ރިއަލް އެސްޓޭޓު ކުންފުނިތަކުގެ ސްޓޯލުތަކަށް އައިސް މައުލޫމާތު ހޯދަމުން ދަނީ. އަދި ފައިނޭންޝަލް އިންސްޓިޓިއުޝަންތަކަށް ވެސް ގިނަ އަދަދެއްގެ މީހުން ޒިޔާރަތްކުރޭ،" އޭނާ ވިދާޅުވިއެވެ.
މި އެކްސްޕޯގައި ބައިވެރިވާ ފައިނޭންޝަލް އިންސްޓިޓިއުޝަންތަކުގެ ތެރޭގައި، ރާއްޖޭގައި ހަރަކާތްތެރިވާ ހުރިހާ ބޭންކަކާއި އިންޝުއަރަންސް ކުންފުނިތައް ހިމެނެއެވެ. އަދި ރާއްޖޭގެ ދެ ޓެލެކޮމް ކުންފުނި، ދިރާގާއި އުރީދޫގެ އިތުރުން މަރުކަޒީ ބޭންްކް އެމްއެމްއޭއާއި، ޕެންޝަން އޮފީހާއި އިކޮނޮމިކް މިނިސްޓްރީންވެސް ދަނީ އެކްސްޕޯގައި ސްޓޯލްތައް ހިންގައި، އާންމުންނަށް މައުލޫމާތު ފޯރުކޮށްދެމުންނެވެ.