އެމްއެމްއޭއިން އިންތިޒާމުކޮށްގެން ބާއްވާ މޯލްޑިވްސް ފައިނޭންޝަލް އެކްސްޕޯ މިހަފްތާގެ ބުރާސްފަތި ދުވަހު ދަރުބާރުގޭގައި ބާއްވަން ހަމަޖައްސައިފިއެވެ.
އެމްއެމްއޭއިން ބުނި ގޮތުގައި އެ އެކްސްޕޯގެ މަގްސަދަކީ އާންމުންގެ މެދުގައި މާލީ އަދި އިގްތިސާދީ ކަންކަމާ ބެހޭގޮތުން ހޭލުންތެރިކަން އިތުރުކުރުމާއި، އާންމުންނާއި މާލީ އިދާރާތަކުގެ ގުޅުން އިތުރަށް ހަރުދަނާ ކުރުމަށް މަގުފަހިކުރުމެވެ.
އެ އެކްސްޕޯގައި ގެދޮރު ގަތުމަށާއި އަމިއްލަ ފަރާތްތަކުން ބިންތައް އިމާރާތް ކުރުމަށް ހުރި ފުރުސަތުތަކާއިި، މާލީ އިދާރާތަކުން އެކަމަށް ފައިނޭންސް ހޯދޭނެ ގޮތްތަކާ ބެހޭ މައުލޫމާތުވެސް ލިބިގެންދާނެއެވެ. އަދި އަދި މާލީ އިދާރާތަކުން ދޭ ހިދުމަތްތަކުގެ މައުުލޫމާތު ފޯރުކޮށްދިނުމުގެ އިތުރުން، ބައެއް ހިދުމަތްތަކުގެ އެޕްލިކޭޝަން ފޯމް ބަލައިގަތުމަށް ހަމަޖެހިފައިވާއިރު އެ އެކްސްޕޯގެ ތެރެއިން މާލީ އިދާރާތަކުން އަލަށް ތަޢާރަފްކުރާ ހިިދުމަތްތައް އިފްތިތާހުކުރުމަށްވެސް ވަނީ ހަމަޖައްސާފައެވެ.
ބުރާސްފަތި ދުވަހުން ފެށިގެން ހޮނިހިރު ދުވަހުގެ ނިޔަލަށް ބާއްވާ އެ އެކްސްޕޯގައި އިގްތިސާދާއި، މާލީ ކަންކަމާ ބެހޭ ގޮތުން މައުލޫމާތު ދިނުމަށާއި ހޭލުންތެރިކަން އިތުރު ކުރުމުގެ ގޮތުން އާންމުންނަށް ހުޅުވާލެވިގެން ތަފާތު ސެމިނާތަކެއްވެސް ކުރިއަށް ގެންދާނެ އެވެ.
ފައިނޭންޝަލް އެކްސްޕޯގައި ބައިވެރިވާ ސަރުކާރު ކުންފުނިތަކާއި މުވައްސަސާތައް:
- ހައުސިން ޑެވެލޮޕްމަންޓް ފައިނޭންސް ކޯޕަރޭޝަން (އެޗްޑީއެފްސީ)
- މޯލްޑިވްސް ފައިނޭންސް ލީސިން ކޮމްޕެނީ (އެމްއެފްއެލްސީ)
- ކެޕިޓަލް މާކެޓް ޑެވެލޮޕްމަންޓް އޮތޯރިޓީ (ސީއެމްޑީއޭ)
- މޯލްޑިވްސް ސްޓޮކް އެކްސްޗޭންޖް (އެމްއެސްއީ)
- މޯލްޑިވްސް ޕެންޝަން އެޑްމިނިސްޓްރޭޝަން އޮފީސް (އެމްޕީއޭއޯ)
- މިނިސްޓްރީ އޮފް އިކޮނޮމިކް ޑެވެލޮޕްމަންޓް
- މޯލްޑިވްސް އިންލޭންޑް ރެވެނިއު އޮތޯރިޓީ (މީރާ)
- ދިރާގު
- އުރީދޫ
މީގެ އިތުރުން ރިއަލް އެސްޓޭޓް ޑިވެލޮޕަރސް އާއި ކޮންޓްރެކްޓަރުން އަދި އާކިޓެކްޓުންނާއި އިންޓީރިއާރ ޑިޒައިނަރުންނާ އެކު ޖުމްލަ 30 އަށް ވުރެ ގިނަ އެގްޒިބިޓަރުން ބައިވެރިވާނެއެވެ.
މިއަހަރުގެ އެކްސްޕޯ ބޭއްވުމަށް ހަމަޖެހިފައިވަނީ އެސޯސިއޭޓް ޕާޓްނަރެއްގެ ގޮތުން ހައުސިން ޑެވެލޮޕްމަންޓް ކޯޕަރޭޝަން (އެޗްޑީސީ) އާ ގުޅިގެން، "ހައުސިން އެންޑް ފައިނޭންސް" ތީމުގެ ދަށުންނެވެ.