ރަމަޟާން މަސް ނިމުމަކާ ކުރިމަތިވަމުންދާ އިރު، މުސްލިމުން މިހާރު ކެތްތެރިކަމާ އެކު މަޑުކޮށްގެން ތިބީ ފިތުރު ޢީދަށެވެ. މިއަދަކީ ރަމަޟާން މަހުގެ 29 ވަނަ ދުވަހެވެ. ޝައްވާލް މަހުގެ ހަނދު މިރޭ ސާބިތުކުރާ އިރު، ހަނދު ނުފެނިއްޖެ ނަމަ ރަމަޟާން މަހުގެ 30 ރޯދަ ހަމަކޮށް، އެއާ ޖެހިގެން އަންނަ ދުވަހަކީ ޝައްވާލް މަހުގެ އެއްވަނަ ދުވަސް، ނުވަތަ ފިތުރު އީދެވެ. މިރޭ ހަނދު ފެނިއްޖެ ނަމަ މާދަމާއަކީ ޝައްވާލް މަހުގެ އެއްވަނަ ދުވަހެވެ.
ދުނިޔޭގެ އެކި ކަންކޮޅުތަކުގައި ރަމަޟާން މަސް ވަރަށް ތަފާތެވެ. އުތުރުގެ ގައުމުތަކުގައި ދުވާލު ދިގުވެ، 20 ގަޑިއިރާ ހަމައަށް އިރު އަރާފައި ހުންނާތީ އެހާ ވަގުތު މުސްލިމުން ރޯދައަށް ހުރެއެވެ. ހަމަ އެފަދައިން އީދު ދުވަހާ ގުޅިގެންވެސް ތަފާތުތަކެއް ކުރިމަތިވެއެވެ.
ފިތުރު އީދަކީ އިސްލާމް ދީނުގައި މުސްލިމުން އުފާ ފާޅުކުރުމަށް ކަނޑައަޅުއްވާފައިވާ ދެ ދުވަހުން ކުރެ އެއް ދުވަހެވެ. ދުނިޔޭގެ ހުރިހާ މުޖުތަމައެއްގައިވެސް އެއީ ޗުއްޓީ ދުވަހެކެވެ. އެހެން ނަމަވެސް ގައުމުތަކުން އީދާ ގުޅިގެން އެއް ދުވަހަށް ވުރެ ގިނައިން ދަނީ ޗުއްޓީ ދެމުންނެވެ.
މާދަމާއަކީ އީދު ދުވަސް ނަމަ، މި ހަފްތާ ބަންދާ އެކު ރާއްޖޭގައި ފިތުރު އީދު ޗުއްޓީގެ ގޮތުގައި ޖުމްލަ ނުވަ ދުވަސް ލިބިގެން ދާނެއެވެ. އެއީ ޖޫން 25 ވާ އާދީއްތަ ދުވަސް ފިތުރު އީދަށްވެ، އެއާ ޖެހިގެން އޮންނަ ދެ ދުވަސް އީދުގެ މުނާސަބަތުގައި ބަންދުކޮށް، އަދި އެ ހަފްތާގެ ހޮނިހިރު ދުވަހާ ހަމައަށް ބަންދު ދިގުކުރަން ސަރުކާރުން ނިންމުމުންނެވެ.
އެހެން ގައުމުތަކުގައިވެސް މިފަދައިން ދިގު ޗުއްޓީ ހަމަޖައްސާފައިވެއެވެ.
މިއަހަރު އީދު ޗުއްޓީ އެންމެ ދިގުކޮށް ލިބެނީ ސައުދީ އަރަބިއްޔާގައެވެ. އެގައުމުގައި ރަމަޟާން މަހުގެ ފަހު ދިހައިގެ ފެށުން، ރަމަޟާން މަހުގެ 21 ވީ ހުކުރު ދުވަހުން ފެށިގެން ވަނީ ރައްޔިތުންނަށް ޗުއްޓީ ދީފައެވެ.
އީދުގެ ކުރިން ނުވަ ދުވަސް ސައުދީގައި ބަންދު ކުރި އިރު، އީދަށް ފަހު 14 ދުވަސް ޗުއްޓީގެ ގޮތުގައި ދޭން ވަނީ ނިންމާފައެވެ. އެއީ ޖޫން 16 އިން ފެށިގެން ޖުލައި އަށަކާ ހަމައަށެވެ. ރަމަޟާން މަހު ދިން ނުވަ ދުވަހުގެ ބަންދާ ނުލައި، ހަމައެކަނި ފިތުރު އީދު ދުވަހުން ފެށިގެން ގުނާ ނަމަވެސް، ސައުދީގައި މި ދެނީ 15 ދުވަހުގެ ދިގު ޗުއްޓީއެކެވެ. މިދިޔަ އަހަރު އެގައުމުގައި ފިތުރު އީދަށް ކަނޑައެޅީ 11 ދުވަހުގެ ޗުއްޓީ މުއްދަތެކެވެ.
ސައުދީއިން ދާޚިލީ ގުޅުން ކަނޑާލާފައިވާ ޤަތަރުގައި އީދު ޗުއްޓީގެ ގޮތުގައި 11 ދުވަސް މިއަހަރު ދޭނެއެވެ. އެއީ މި ހަފްތާ ބަންދު ފެށުނު ދުވަސް ކަމުގައިވާ، އިއްޔެއިން ފެށިގެން ޖުލައި ތިންވަނަ ދުވަހާ ހަމައަށެވެ.
ރާއްޖެއެކޭ އެއްފަދައިން ޔޫއޭއީ، ކުވައިތު އަދި އޮމާނުގައި އީދު ޗުއްޓީއަށް މިފަހަރު ދެނީ ނުވަ ދުވަހެވެ. އެއީ 23 ޖޫނުން ފެށިގެން ޖުލައި އެކެއްގެ ނިޔަލަށެވެ. މިސްރުގައި އީދު ޗުއްޓީއަށް މިއަހަރު ދެނީ އިއްޔެއިން ފެށިގެން ޖޫން 27 ގެ ނިޔަލަށް، ޖުމްލަ ފަސް ދުވަހުގެ ޗުއްޓީއެކެވެ. އަދި މިއަހަރު ޕާކިސްތާނުގައި އީދު ޗުއްޓީއަށް ދެނީ ތިން ދުވަހުގެ ޗުއްޓީއެކެވެ.