އެކި ދާއިރާތަކުން އެއްވެސް މައްސަލައެއް ދިމާނުވެ، އެންމެ ފުރިހަމައަށް ހިދުމަތް ދީފައިވާ އެއާލައިނެއްގެ އެވޯޑް ގައުމީ އެއާލައިން މޯލްޑިވިއަން އަށް ލިބިއްޖެ އެވެ.
އެ އެވޯޑަކީ ކެނެޑާގެ އެއިރޯސްޕޭސް އަދި ޓްރާންސްޕޯޓޭޝަން ކުންފުންޏެއް ކަމުގައިވާ ބޮމްބާޑިއާ އިން ކޮންމެ އަހަރަކު އެއްފަހަރު ދެމުން އަންނަ އެވޯޑެކެވެ.
މޯލްޑިވިއަން އަށް އެ އެވޯޑް ލިބިފައި ވަނީ "އޯޝެނިއާ ކެޓަގަރީ" އިންނެވެ.
އެ އެވޯޑް މޯލްޑިވިއަން އަށް ލިބުނީ އިންޖީނުގެ މައްސަލަތައް ދިމާނުވެ ރަނގަޅަށް އޮޕަރޭޓްކޮށް ގަޑި ނުޖެހި ފުރުމުގައި ފުރިހަމަ ޕާފޮމެންސެއް ދައްކުވައިދީފައި ވާތީ އެވެ.
އެގޮތުން އެވޯޑް ދިނުމުގައި އިންޖީނުގެ ރިލަޔަބިލިޓީގެ 99 ޕަސެންޓް މާކްސް ލިބެން ޖެހެއެވެ.
މޯލްޑިވިއަން އިން ބުނީ ޑޭޝް 8 މޮޑެލްގެ އެއާކްރަފްޓްތައް ވެސް ގެންގުޅޭ ގިނަ ބަޔަކާ ވާދަކޮށް މިފަދަ އެވޮޑެއް ލިބުމަކީ ކާމިޔާބީއެއް ކަމަށެވެ.
މިއީ މޯލްޑިވިއަން އަށް މި އެވޯޑް ލިބުނު ފަސްވަނަ ފަހަރެވެ.