އިންޑިއާގެ ޓްރިވެންޑްރަމްގައި ހުންނަ ގެއެއްގެ ތެރޭގައި ދިވެއްސަކު މަރުވެފައި އޮއްވާ ފެނިއްޖެއެވެ.
ޓްރިވަންޑްރަމްގައި ހުންނަ ދިވެހިރާއްޖޭގެ ކޮންސިއުލޭޓްގެ ކޮންސުލް އަލީ އާދަމް ވިދާޅުވީ، މަރުވެފައި އޮއްވާ ފެނުނީ ސ. މަރަދޫއަށް އުފަން އުމުރުން 36 އަހަރުގެ، އިބްރާހިމް ޝަފީގު ކަމަށެވެ.
އިންޑިއާގައި ކިޔަވަމުންދާ ކުޑަ ދެ ކުދިންނާއި އާއިލާ ކައިރިއަށް މިދިޔަ މަހުގެ 15 ވަނަ ދުވަހު ގޮސް އުޅުނު އެ މީހާ މަރުވިކަން އެނގުނީ މިއަދު ހެނދުނު ނުހޭލައިގެން ބެލިއިރު ކަމަށެވެ. އަދި އޭނާ ހޮސްޕިޓަލަށް ގެންދިޔައީ މިއަދު ހެނދުނު ގާތްގަނޑަކަށް މެންދުރުފަހު 11:10 ހާއިރު ކަމަށް ކޮންސުލް ވިދާޅުވިއެވެ.
އާއިލާއާ ހަވާލާދީ ކޮންސިއުލޭޓުން ބުނީ، މަރުވި މީހާ ރޭ މެންދަމު ހާރު ކެއުމަށް ވެސް ހޭލާ އުޅުނެވެ. އަދި މީގެ ހަތަރު ދުވަސް ކުރިން ޗިކަން ޕޮކްސް ޖެހިގެން ހުން ގަދަވެގެން ޖީޖީ ހޮސްޕިޓަލަށް ގެންގޮސް ފަރުވާ ހޯދި ކަމަށްވެއެވެ.
ކޮންސުލް އަލީ އާދަމް ވިދާޅުވީ، މިއަދު ހެނދުނު މަރުވި އެ މީހާ އެންމެ ފުރަތަމަ ގެންދިޔައީ ޖީޖީ ހޮސްޕިޓަލަށް ކަމަށާއި ނަމަވެސް އެތަނުގެ މޯޗަރީ ފުރިފައި އޮތުމުން މޯބައިލް މޯޗަރީ އަކަށް ވަގުތީ ގޮތުން ލި ކަމަށެވެ.
ނަމަވެސް މިއަދަކީ އާދީއްތަ ދުވަހަށްވެފައި އިންޑިއާގެ ބައެއް އިދާރާތައް ބަންދުކޮށްފައި ހުރުމުން އެފަދަ މަރު ތަކުގައި ފުލުހުންނާއި އެހެނިހެން އިދާރާ ތަކުން ފުރިހަމަ ކުރަންޖެހޭ ކަންތައްތަކެއް ފުރިހަމަ ނުކުރެވުމުގެ ސަބަބުން ވަޅު ނުލެވުނު ކަމަށް ކޮންސުލް ވިދާޅުވިއެވެ.
އިންޑިއާގެ ގާނޫނު ބުނާގޮތުން، ހޮސްޕިޓަލްގައި ނޫން ގޮތަށް މަރުވެއްޖެނަމަ، އެމީހަކު މަރުވި ގޮތް ކަށަވަރު ކުރުމުގެ ގޮތުން ޕޯސްޓްމޯޓަމް ކޮންމެހެން ހަދަން ޖެހޭނެ އެވެ. އޭގެ ތެރޭގައި އެކްސިޑެންޓުތަކުގައި ވެސް މަރުވާ މީހުން ހިމެނެއެވެ.
ނަމަވެސް ހޮސްޕިޓަލުން ބައްޔަކަށް ގަވާއިދުން ފަރުވާ ހޯދާ މީހަކު ގޭގައި ހުއްޓާ މަރުވެއްޖެނަމަ، އޭނާ ފަރުވާ ހޯދަމުންދިޔަ ހޮސްޕިޓަލަށް ދައްކާ ޑޮކްޓަރުގެ ހުއްދަ ލިބުމުން އެ މީހަކު ވަޅު ލެވޭނެއެވެ.
ކޮންސުލް އަލީ އާދަމް ވިދާޅުވީ، މިއަދު ހަތަރެއް ޖެހިއިރު، ފުލުހުންގެ ހުއްދަ ލިބުމާއެކު މަރުވި މީހާގެ ހަށިގަނޑު މެޑިކަލް ކޮލެޖްގެ މޯޗަރީއަށް ލާފައިވާ ކަމަށެވެ. އަދި މާދަމާ އޯޓޮޕްސީ ހަދާ ވަޅުލަން ނިންމާފައިވާ ކަމަށް ވިދާޅުވިއެވެ.
މަރުވި މީހާގެ އާއިލާއަށް ކޮންސިއުލޭޓްގެ ފަރާތުން މިހާރު ވެސް ދަނީ އެހީތެރިކަން ފޯރު ކޮށްދެމުންނެވެ.