ތ. ތިމަރަފުށީގައި ކަރަންޓުގެ މައްސަލަ ދިމާވެ ރައްޔިތުންނަށް ދަތިތަކަކާ ކުރިމަތިލާންޖެހިއްޖެއެވެ.
ތިމަރަފުށީ ކައުންސިލް މެމްބަރު އަހުމަދު އިހުސާން މިރޭ "ސަން" އަށް ވިދާޅުވީ، އެރަށުން ކަރަންޓު ކެނޑުނީ އިއްޔެ ހަވީރުގެ ވަގުތެއްގައި ކަމަށާއި ރަށުގެ ބޮޑު ބަޔަކަށް އަދިވެސް ކަރަންޓު ނުލިބޭ ކަމަށެވެ.
އޭނާ ވިދާޅުވީ ކަރަންޓު ލިބިފައި ވަނީ މަދު އަދަދެއްގެ ގެތަކަށް ކަމަށާއި ކަރަންޓުގެ މައްސަލަ ހައްލުކުރުމަށް އިންޖީނުގޭގައި މިހާރު ތިބި ޓެކްނީޝަނުން މަސައްކަތް ކުރަމުން އަންނަ ކަމަށެވެ. ނަމަވެސް އެރަށު އިންޖީނުގޭގައި މަސައްކަތްކުރާ އެންމެ ތަޖުރިބާކާރު ޓެކްނީޝަނުން އެހެން ރަށަކަށް ބަދަލުކޮށްފައި ވާތީ އެކަމުގެ ސަބަބުން މައްސަލަ ހައްލުކުރަން ދަތިތަކަކާ ކުރިމަތިވާ ކަމަށް އިހުސާން ވިދާޅުވިއެވެ.
"މިވަގުތު އިންޖީނުގޭގައި އުޅުއްވާ ބޭފުޅުން މަސައްކަތް ކުރަމުން އަންނަނީ ކަރަންޓުގެ މައްސަލަ ހައްލުކުރެވޭތޯ. ނަމަވެސް އިންޖީނުގޭގައި ހުރި އެންމެ މޮޅު ޓެކްނީޝަން ވަނީ ވަޒީފާއިން ވަކިކޮށްފައި،" އިހުސާން ވިދާޅުވިއެވެ.
އެރަށުގައި ހުރި ސަރުކާރުގެ ބައެއް މުއައްސަސާތަކަށް ވެސް ކަރަންޓުގެ މައްސަލަ ދިމާވެފައިވާ ކަމަށާއި ސިއްޙީ މަރުކަޒަށް ކަރަންޓުދީފައި ހުއްޓަސް ބައެއްފަހަރު ކަރަންޓު ކެނޑެމުންދާތީ އެތަނުގައި ޚިދުމަތްދިނުމަށް ދަތިތަކާ ކުރިމަތިވާ ކަމަށް ވެސް އޭނާ ވިދާޅުވިއެވެ.
ތިމަރަފުއްޓަކީ އާބާދީގައި 1800 ވަރަކަށް މީހުން ދިރިއުޅޭ ރަށެކެވެ.
މިކަމާ ގުޅޭގޮތުން ފެނަކަ ކޯޕަރޭޝަންގެ ބަހެއް އަދި ވަނީ ލިބޭގޮތް ނުވެފައެވެ.