ކަނޑުގައި ދުއްވާ އުޅަނދުފަހަރުގެ އިންޝުއަރަންސަކީ އިހްތިޔާރީ ކަމެއް ގޮތަށް ހަމަޖައްސައި އެކަން އިއުލާނުކޮށްފި އެވެ.
އެކަން އަންގާފައި ވަނީ މިއަދު މެންދުރުފަހު އިކޮނޮމިކް މިނިސްޓްރީގައި ބޭއްވި ނޫސްވެރިންގެ ބައްދަލުވުމެއްގައެވެ. މިގޮތަށް ނިންމުމުން ކުރިއަށް އޮތްތާނގައި ކަނޑުގައި ދުއްވާ އުޅަނދުފަހަރު އިންޝުއާ ކުރާނީ އިންޝުއަރަންސް ބޭނުންވާ ފަރާތްތަކުންނެވެ.
މި ނިންމުމާ ގުޅޭގޮތުން މިއަދުގެ ނޫސްވެރިންގެ ބައްދަލުވުމުގައި ޓްރާންސްޕޯޓް އޮތޯރިޓީގެ ޗެއާމަން މަހުދީ އިމާދު ވިދާޅުވީ، އިންޝުއާ ކުރަން މަޖުބޫރު ކަމެއްގެ ގޮތުގައި ނިންމާފައި އޮތް އޮތުމުގެ ސަބަބުން އާންމުންނަށް އުނދަގޫތަކެއް ވާކަމަށް، ކަމާބެހޭ ފަރާތްތަކުން ކުރި ދިރާސާއިން ހާމަވާ ކަމަށެވެ. އެހެންކަމުން މި ނިންމުމަކީ އެކަމަށް ލުޔެއް ގެނައުމަށް ނިންމި ނިންމުމެއް ކަމަށް ވިދާޅުވި އެވެ.
"އަޅުގަނޑުމެންގެ ސަރުކާރުގެ ސިޔާސަތުގައި ރައްޔިތުންނަށް ވީހާވެސް ފަސޭހަވާނެ ގޮތްގޮތަށް ގަވާއިދުތައް ވެސް މިހަދަނީ. އެގޮތުން އަޅުގަނޑުމެން ނިންމި ނިންމުމެއް މިއީ. މިއަދުން ފެށިގެން ކަނޑު އުޅަނދުފަހަރުގެ އިންޝުއަރަންސަކީ އިހުތިޔާރީ ކަމެއް،" ޓްރާންސްޕޯޓް އޮތޯރިޓީގެ ޗެއާމަން މަހުދީ ވިދާޅުވި އެވެ.
މަހުދީ ވިދާޅުވީ، އެގޮތަށް ނިންމި އިރު، އޭގައި ވަކި ކެޓަގަރީއެއްގެ އުޅަނދުތަކެއް ނުހިމެނޭނެ ކަމަށެވެ. އެގޮތުން އެންމެ ކުދި އުޅަނދުތަކުން ފެށިގެން އެންމެ ބޮޑެތި އުޅަނދުތަކަށް ދަންދެން އިންޝުއާ ކުރުމަކީ އިހްތިޔާރީ ކަމެއް ކަމަށާއި އޭގައި ކުންފުނިތަކާއި ސަރުކާރުގެ އުޅަނދުތައް ވެސް ހިމެނޭނެ ކަމަށެވެ.