މާލެއަށް ފޯރުކޮށްދޭ ކަރަންޓުގެ ހިދުމަތް އިތުރަށް ފުރިހަމަކޮށް ކަރަންޓު ކެނޑުމުގެ މައްސަލައަށް ހައްލެއް ހޯދުމަށް ސްޓޭޓް އިލެކްޓްރިކް ކޮމްޕެނީ (ސްޓެލްކޯ) އިން ގެނައި 8.9 މެގަވޯޓްގެ މާ ޖަނަރޭޓަރު ހަރުކޮށް، ކަރަންޓް ދޭން ފަށައިފި އެވެ.
ސަރުކާރުގެ މައި ކަރަންޓް ކުންފުނީގައި މިއަދު ބޭއްވި ކުޑަ ހަފްލާއެއްގައި އެ ޖަނަރޭޓަރު އޮޕަރޭޓް ކުރަން ފައްޓަވައި ދެއްވީ އެންވަޔަރަމަންޓް މިނިސްޓަރު ތާރިގް އިބްރާހިމް އެވެ.
ސްޓެލްކޯ އިން މައުލޫމާތުދޭ ގޮތުގައި، މާލޭގައި ބަހައްޓާފައިވާ 26 ޖަނަރޭޓަރުން މިވަގުތު 64 މެގަވޯޓުގެ ޖަނަރޭޓަރު ހިންގަމުންދާ އިރު އަލަށް މިއަދު އޮޕަރޭޓް ކުރަން ފެށި ޖަނަރޭޓަރާ އެކު ކެޕޭސިޓީ 72 މެގަވޯޓް އަށް އިތުރުވާނެ އެވެ.
ސްޓެލްކޯއަށް މިއަހަރުގެ ޖަނަވަރީ މަހު ގެނައި 8.9 މެގަވޯޓްގެ ޖަނަރޭޓަރު --- ސަން ފޮޓޯ/ ފަޔާޒު މޫސާ
ސްޓެލްކޯއަށް އަލަށް ގެނައި ޖަނަރޭޓަރު އޮޕަރޭޓް ކޮށްދެއްވުމަށް ފަހު ނޫސްވެރިންނަށް މައުލޫމާތު ދެއްވަމުން މިނިސްޓަރު ވިދާޅުވީ، މާލޭގައި އުސް އިމާރާތްތައް ހެދި ކަރަންޓް ބޭނުންކުރާ މިންވަރު އިތުރުވަމުންދާ ކަމަށާއި އަހަރެއްގެ މައްޗަށް 11 ޕަސެންޓުގެ އިތުރުވުމެއް އަންނަ ކަމަށެވެ.
އެހެންކަމުން 24 ގަޑިއިރުގެ ކަރަންޓުގެ ހިދުމަތް ޔަގީން ކޮށްދިނުމަށް ސަރުކާރުން ވެފައިވާ ވައުދުގެ ދަށުން ގިނަ މަސައްކަތްތަކެއް ކުރަމުން ގެންދާ ކަން ފާހަގަކުރައްވާ މިނިސްޓަރު ވިދާޅުވީ، މިއަދު ސްޓެލްކޯ އަށް ގެނެސް އޮޕަރޭޓް ކުރަން ފެށި ޖަނަރޭޓަރަކީ ވެސް އޭގެ ތެރެއިން ކުރެވުނު މަސައްކަތްކަތެއް ކަމަށެވެ.
ސްޓެލްކޯ އިން ބުނާ ގޮތުގައި، މިހާރު މާލޭގައި އެންމެ ގިނައިން ކަރަންޓް ބޭނުންކުރާ ވަގުތުތަކުގައި 55 މެގަވޯޓުގެ ކަރަންޓް ބޭނުންކުރެ އެވެ.
ސްޓެލްކޯގައި ހަރުކޮށް މިއަދު އޮޕަރޭޓްކުރަން ފެށި ޖަނަރޭޓަރަކީ ފިންލޭންޑްގެ ވަޓްސަލާ ކުންފުންޏާ ހަވާލުކޮށްގެން މިއަހަރުގެ ޖަނަވަރީ މަހުގެ ތެރޭގައި ރާއްޖެ ގެނައި ޖަނަރޭޓަރެކެވެ.
ޕްރިޕެއަރިން އައުޓާ އައިލެންޑް ފޮ ސަސްޓެއިނަބަލް އެނާޖީ ޑެވެލޮޕްމަންޓް (ޕޮއިސްޑް) ޕްރޮޖެކްޓްގެ ތެރެއިން އެ ޖަނަރޭޓަރު ގެނެސްފައި ވަނީ އޭޑީބީގެ ހިލޭ އެހީގެ ދަށުންނެވެ.
ޕޮއިސްޑް ޕްރޮޖެކްޓަކީ ރާއްޖޭން ބޭރުން އެތެރެކުރާ ތެލަށް ބަރޯސާވާ މިންވަރު ކުޑަކުރުމަށާއި ރާއްޖެ އިން ލިބެންހުރި އިއާދަކުރަނިވި ހަކަތައިގެ ވަސީލަތްތަކުގެ ބޭނުން ކުރުން އިތުރުކޮށް ހަކަތައިގެ އިސްރާފުކުޑަކުރުމަށް ސަރުކާރުން ގެންގުޅުއްވާ ސިޔާސަތުގެ ދަށުން ހިންގާ ޕްރޮޖެކްޓެކެވެ.