ސްވައިން ފްލޫ ޖެހުނު މާބަނޑު އަންހެން މީހާގެ ދަރިފުޅު އިތުރު ފަރުވާއަށް ރާއްޖެއިން ބޭރަށް ގެންދިއުމަށް ނިންމާފައިވާ ކަމަށް ކުއްޖާގެ އާއިލާއިން ބުނެފި އެވެ.
ސްވައިން ފްލޫ ޖެހިގެން ހާލު ސީރިއަސް ވުމުން އެ އަންހެންމީހާގެ ބަނޑަށް ހަ މަހުގައި ސިޒޭރިއަންއެއް ހަދައި ދަރިފުޅު ނަގައިފައި ވަނީ މިދިޔަ މަހުގެ ކުރީކޮޅު އެވެ.
ބައްޔަށް ފަރުވާދިނުމަށް ފަހު އަންހެން މީހާގެ ހާލު ރަނގަޅުވުމުން އޭނާ މިހާރު ވަނީ ހޮސްޕިޓަލުން ދޫކޮށްލާފައެވެ. ނަމަވެސް ދަރިފުޅު އަދިވެސް އޮތީ އައިޖީއެމްއެޗްގެ ނާސަރީގައެވެ.
ކުއްޖާގެ އާއިލާއިން ސަން އަށް މައުލޫމާތު ހިއްސާކުރި މީހަކު ބުނީ، އައިސީޔޫ އިން ނެރުނު ނަމަވެސް ކުއްޖާގެ ހާލު ސީރިއަސް ކަމަށެވެ. އެހެންކަމުން އަންނަ ހަފްތާގެ ކުރީކޮޅު އިންޑިއާއަށް ފުރަން ތައްޔާރުވަމުން އަންނަ ކަމަށް އޭނާ ބުންޏެވެ.
ސްވައިން ފްލޫ ޖެހިގެން އަންހެން މީހާ މާލެ ގެނައީ ހދ. ކުޅުދުއްފުށީ ރީޖަނަލް ހޮސްޕިޓަލުގައި ފަރުވާ ދިނުމަށް ފަހު އެވެ.
އާއިލާއިން ބުނިގޮތުގައި ރާއްޖެއިން ބޭރަށް ފަރުވާ ހޯދަން ދިއުމަށް މިހާރު ވަނީ އާސަންދައިގެ ކަންކަން ވެސް ހަމަޖެހިފައެވެ.
ރާއްޖޭގައި މިދިޔަ ދެ މަސްތެރޭގައި ބާރު ސްޕީޑެއްގައި ސްވައިން ފްލޫ ފެތުރުނު އިރު އެ ބަލި ޖެހިގެން މާބަނޑު މީހަކާ އެކު ހަ މީހަކު މަރުވި އެވެ. އަދި ރޯގާ އަށް 546 މީހަކު ޓެސްޓްކުރިއިރު 199 މީހަކު ވަނީ ޕޮޒިޓިވް ވެފައެވެ.