ވޮޝިންޓަން (އެޕްރީލް 1): އެމެރިކާގެ ޚާރިޖީ ވުޒާރާގެ ބަޖެޓް ކުޑަކުރުމަށް އެމެރިކާގެ ރައީސް ޑޮނަލްޑް ޓްރަމްޕް ނިންމެވި ނިންމެވުމަށް އެމެރިކާގެ ކުރީގެ ޚާރިޖީ ވަޒީރު އަދި ޓްރަމްޕާ ވާދަކުރެއްވި ރިޔާސީ ކެންޑިޑޭޓް ހިލަރީ ކްލިންޓަން ވަރަށް ބޮޑަށް ފާޑު ވިދާޅުވެއްޖެއެވެ.
އެމެރިކާގެ ޖޯޖް ޓައުން ޔުނިވަރސިޓީގެ ދަރިވަރުންނަށް ދެއްވި އޯޕަން ލެކްޗަރެއްގައި ހިލަރީ ވިދާޅުވީ ޚާރިޖީ ވުޒާރާގެ ބަޖެޓް ކުޑަކުރުމަކީ ދުނިޔޭގައި އެމެރިކާއަށް ކުރިމަތިވަމުންދާ ގޮންޖެހުންތަކާ ކުރިމަތިލުމުގެ ގާބިލްކަން އެމެރިކާގެ ކިބައިގައި ކުޑަވެގެންދާނެ ކަމެއް ކަމަށާއި މިކަމުގެ ސަބަބުން އެމެރިކާގެ ގައުމީ މަސްލަހަތަށް ނުރައްކާވެގެންދާނެ ކަމުގައެވެ.
ޓްރަމްޕް ވަނީ އެމެރިކާގެ ޚާރިޖީ ވުޒާރާގެ ބަޖެޓް 28 އިންސައްތަ އަށް ކުޑަކުރުމަށް ނިންމަވާފައެވެ. މިކަމުގެ ސަބަބުން އެމެރިކާގެ ޑިޕްލޮމޭޓުންގެ ދަތުރުތަކާއި ހަރަކާތްތައް މަދުވެގެން ދާނެއެވެ. އަދި ދުނިޔޭގެ ގައުމުތަކުގައިވާ އެމެރިކާގެ އެންބަސީތަކުގެ ޚަރަދުތައްވެސް ވަރަށް ބޮޑަށް ކުޑަވެގެން ދާނެއެވެ. ނަމަވެސް ޓްރަމްޕަށް ބަޖެޓް ކުޑަކުރެވޭނީ ކޮންގްރެސް ގެ ރުހުން ލިބިއްޖެ ހާލަތެއްގައެވެ.
ކޮންގްރެސްގެ ތާއީދު ނުލިބުމުންނާއި އެމެރިކާގެ ޝަރުއީ ދާއިރާގެ ދެކޮޅު ހެދުންތަކުގެ ސަބަބުން ޓްރަމްޕަށްވަނީ އޭނާގެ ސިޔާސަތުތައް ތަންފީޒު ކުރުމުގައި ބޮޑެތި ދަތިތަކަކާ ކުރިމަތިލާން ޖެހިފައެވެ. މުސްލިމުން އެމެރިކާއަށް ވަނުން މަނާކުރުމަށް ޓްރަމްޕް ނެރުއްވި ރިޔާސީ ދެ ގަރާރުވެސް އެމެރިކާގެ ޝަރުއީ ދާއިރާއިންވަނީ ބާތިލްކޮށްފައެވެ. އަދި އޮބާމާގެ ވެރިކަމުގައި ފާސްކޮށްފައިވާ އެމެރިކާގެ ސިއްހީ ރައްކާތެރިކަމާބެހޭ ޕްލޭން ބަދަލުކުރުމަށް ޓްރަމްޕް ކޮންގްރެސް އަށް ހުށަހެޅުއްވުމުން ކޮންގްރެސް އިންވަނީ އެކަމަށް ދެކޮޅު ހަދައިފައެވެ.
މީގެއިތުރުން ކޮންގްރެސްއިން ގެންދަނީ އެމެރިކާގެ ރިޔާސީ އިންތިޚާބަށް ރަޝިޔާއިން ނުފޫޒު ހިންގިކަމަށް ބެލެވޭ މައްސަލަ ތަހްގީގް ކުރުމަށްޓަކައި ޓްރަމްޕްގެ ސަރުކާރުގެ އިސް ފަރާތްތަކާ ސުވާލުކުރަމުންނެވެ. މިއީވެސް ޓްރަމްޕަށް ކުރިމަތިވެފައިވާ ބޮޑު ނުތަނަވަސް ކަމެކެވެ. ވެރިކަން ކުރެއްވުމުގައި ޓްރަމްޕަށް ކުރިމަތިވެފައިވާ އެންމެ ބޮޑު ގޮންޖެހުމަކީ އޭނާ ނިސްބަތްވެވަޑައިގަންނަވާ ރިޕަބްލިކަން ޕާޓީގެ ކޮންގްރެސް މެންބަރުންގެ ތާއީދުވެސް ލިބިވަޑައި ނުގަތުމެވެ.
މިއީ އެމެރިކާގެ އެހެން ރައީސުންނަށް ކުރިމަތިވެ ވަޑައިގެންނެވި މައްސަލައެއް ނޫނެވެ. ހިލަރީ ވަނީ ދުނިޔޭގެ ބޮޑެތި އެތަށް ގައުމެއް އެމެރިކާއާ ވާދަކުރަމުން ގެންދާ މިދަނޑިވަޅުގައ ޓްރަމްޕް އެމެރިކާގެ ޚާރިޖީ ސިޔާސަތު ބައްޓަން ކުރައްވާގޮތުން ކަންބޮޑުވެ ވަޑައިގަންނަވާކަން ހާމަކުރައްވާފައެވެ. (އޭއެފްޕީ)