ރާއްޖޭގައި ފެތުރެމުންދާ އެޗްވަންއެންވަން އިންފުލުއެންޒާ ރޯގާއަށް އިއްޔެ ޓެސްޓު ކުރި މީހުންގެ ތެރެއިން އަށް މީހަކު އެރޯގާއަށް ޕޮޒިޓިވް ވެއްޖެ އެވެ،
ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން މިއަދު އާއްމު ކުރި ތަފާސް ހިސާބުތަކުން ދައްކާ ގޮތުން، އެޗްވަންއެންވަންއަށް ޝައްކު ކުރެވިގެން 26 މީހަކު ވަނީ ޓެސްޓުކޮށްފައެވެ.
މިއަހަރުގެ މިހާތަނަށް 437 މީހުން އެޗްވަންއެންވަން އަށް ޓެސްޓުކޮށްފައިވާއިރު، 155 މީހަކު ވަނީ ޕޮޒިޓިވް ވެފައެވެ. އޭގެ ތެރެއިން 32 މީހަކަށް ދަނީ ހޮސްޕިޓަލުގައި އެޑްމިޓްކޮށް ފަރުވާދެމުންނެވެ.
އާދީއްތަ ދުވަހާ އަޅައިބަލާއިރު، އަރިދަފުސް ރޯގާޖެހިގެން އިއްޔެ ޑޮކްޓަރަށް ދެއްކި މީހުންގެ އަދަދު ވަނީ ދަށަށް ގޮސްފައެވެ.
އެގޮތުން އާދީއްތަ ދުވަހު 1733 މީހަކު ރޯގާ ޖެހިގެން ވަނީ ފަރުވާ ހޯދައިފައެވެ. ނަމަވެސް އިއްޔެ އެ އަދަދު އުޅެނީ 1440ގައެވެ. އިއްޔެ ފަރުވާ ހޯދި މީހުންގެ ތެރެއިން 887 މީހުންނަކީ އަތޮޅުތެރެއިން ފަރުވާ ހޯދި މީހުންނެވެ.
އަތޮޅު ތެރެއަށް ބަލައިލާއިރު، އެންމެ ގިނަ ބަޔަކު ރޯގާ ޖެހިގެން ޑޮކްޓަރަށް ދައްކާފައިވަނީ، ލ. އަތޮޅާއި، ރ. އަތޮޅު އަދި ހދ. އަތޮޅުންނެވެ. އެގޮތުން ލ. އަތޮޅުން 95 މީހުން އަރިދަފުސް ރޯގާޖެހިގެން ޑޮކްޓަރަށް ދައްކާފައިވާ 92 މީހަކު ރ. އަތޮޅުން ޑޮކްޓަރަށް ދައްކާފައި ވެއެވެ. އަދި ހދ. އަތޮޅުން 76 މީހަކު ޑޮކްޓަރަށް ދައްކާފައިވެއެވެ.
އެޗްވަންއެންވަން ޖެހިގެން މިހާތަނަށް ރާއްޖެއިން ތިން މީހަކުވަނީ މަރުވެފައެވެ. އޭގެ ތެރޭގައި ހިމެނެނީ ދެ ދިވެހިންނާއި ބިދޭސީއެކެވެ.