ކޮރަޕްޝަން މައްސަލައެއްގެ ތުހުމަތުގައި ހޯދަންޖެހޭ ބައެއް މައުލޫމާތު ހޯދުމަށްޓަކައި އެންޓި ކޮރަޕްޝަން ކޮމިޝަން (އޭސީސީ)ގެ ޓީމެއް ހޯމް މިނިސްޓްރީއަށް ވަދެއްޖެ އެވެ.
އޭސީސީގެ ތަހުގީގު ޓީމެއް ހޯމް މިނިސްޓްރީއަށް މިއަދު ހެނދުނު ވަދެފައި ވަނީ "މިނިވަން 50"އަށް ހޯމް މިނިސްޓްރީން ހިންގި ހަރަކާތެއްގައި ކޮރަޕްޝަން ހިމެނޭ ކަމަށް ތުހުމަތު ކުރެވޭތީ އެވެ.
އެ މައްސަލައާ ގުޅޭ ތަފްސީލެއް ހޯމް މިނިސްޓްރީން އަދި އޭސީސީއަކުން ވެސް ހާމައެއް ނުކުރެ އެވެ.
ހޯމް މިނިސްޓްރީގެ މީޑިއާ ކޯޑިނޭޓަރު ތަޒްމީލް އަބްދުއްސަމަދު ވިދާޅުވީ އެކަމާ ބެހޭ ގޮތުން ޕްރެސް ކޮންފަރެންސެއް ބާއްވާނެ ކަމަށެވެ.
ރާއްޖޭގެ މިނިވަންކަމަށް 50 އަހަރު ފުރުމުގެ ހަރަކާތްތައް 2015 ވަނަ އަހަރު ކުރިއަށް ގެންދިޔައީ ހޯމް މިނިސްޓްރީންގެ ދަށުން އުފެއްދި މިނިވަން 50ގެ އޮފީހުންނެވެ. އޭރު ހޯމް މިނިސްޓްރީ ހިންގެވުމާ ހަވާލުވެވަޑައިގެން ހުންނެވީ އުމަރު ނަސީރެވެ.
މިނިވަން 50ގެ ހަރަކާތްތަކަށް 150 މިލިއަން ރުފިޔާ ހަރަދު ކުރި އެވެ.