ރައީސުލްޖުމްހޫރިއްޔާގެ އަނބިކަނބަލުން ފާތިމަތު އިބްރާހިމް ދީދީގެ އިސްނެންގެވުމުގެ މަތިން ބޭއްވި "ހީވާގި ކަނބަލުން" މައުރަޒު ރޭ ނިމިއްޖެ އެވެ.
މިދިޔަ ބުރާސްފަތި ދުވަހު، ބޮޑު ޖަލްސާއަކާ އެކު ފެށި މައުރަޒު ހަތަރު ދުވަހަށް ދަރުބާރުގޭގައި ކުރިޔަށް ގެންދިޔަ އިރު، އަންހެނުންގެ ފަންނުވެރިކަމާއި މަސައްކަތްތެރިކަން ފެންނަ އެކިއެކި އުފެއްދުންތަކާއި ޚިދުމަތްތައް އެ މައުރަޒުގެ ތެރެއިން ވަނީ ދައްކާލައިފަ އެވެ.
މީގެ އިތުރުން މައުރަޒުގައި ބަހައްޓާފައި ހުރި ކާނާ، ފޭރާން އަދި އެހެނިހެން އުފެއްދުންތައް ގަތުމުގެ ފުރުސަތު ވެސް އޮތް އިރު، ގިނަ ބަޔަކު އެތަކެތި ގަތްކަން ފާހަގަކުރެވެ އެވެ.
"ހީވާގި ކަނބަލުން" މައުރަޒުގެ ތެރެއިން -- ސަން ފޮޓޯ: މުހައްމަދު އަފްރާހު
އެނގިފައިވާ ގޮތުގައި 500 އަށް ވުރެ ގިނަ ފަރާތުން ހީވާގި ކަނބަލުންގައި ބައިވެރިވެފައިވެ އެވެ.
މައުރަޒު އިންތިޒާމުކުރުމުގައި ހަރަކާތްތެރިވި ހަސަން ޣައްސާން "ސަން" އަށް މިއަދު ވިދާޅުވި ގޮތުގައި، ރޭ ނިމިގެން ދިޔަ ހީވާގި ކަނބަލުން އެކްސްޕޯއަކީ ވަރަށް ވެސް ކާމިޔާބު މައުރަޒެކެވެ.
"ވަރަށް ކާމިޔާބު. ވަރަށް ގިނަ ބަޔަކު ޒިޔާރަތް ކުރި. އަޅުގަނޑުމެންނަށް އެތަން ނުބެލެހެއްޓޭ ވަރަށް މީހުން ޒިޔާރަތް ކުރި،" އޭނާ ވިދާޅުވި އެވެ.
އޭނާ ވިދާޅުވީ، އެއް ދުވަހުން އަނެއް ދުވަހަށް މައުރަޒަށް ޒިޔާރަތްކުރި މީހުންގެ އަދަދު ވެސް ދިޔައީ އިތުރުވަމުން ކަމަށެވެ. ސަބަބެއްގެ ގޮތުގައި ޣައްސާން ވިދާޅުވީ، މައުރަޒުގައި ހުރި ތަކެތީގެ ސަބަބުން މީހުން ޝައުގުވެރިވުމެވެ.
"ހީވާގި ކަނބަލުން" މައުރަޒުގެ ތެރެއިން -- ސަން ފޮޓޯ: މުހައްމަދު އަފްރާހު
"މިސާލަކަށް، އެތަނުގައި ހުރި އަންހެނުން ލިޔެލާ ޖަހައިގެން ހަދާފައިވާ ތަކެތި. މީހުންނަށް މާ ބޮޑަކަށް ނޭނގޭ ކުރިންނެއް، މިފަދަ މަސައްކަތް ކުރާ އަންހެނުން އުޅޭކަމެއް. މައުރަޒުގައި ހުރި ތަކެތި ފެނިފައި، ޒިޔާރަތް ކުރާ މީހުންގެ ފަރާތުން އެހެން މީހުންނަށް ވެސް މި ޚަބަރުތައް ލިބި، އެއް ދުވަހުން އަނެއް ދުވަހަށް ވުރެ ގިނަ މީހުން ޒިޔާރަތް ކުރި،" ޣައްސާން ވިދާޅުވި އެވެ.
ހީވާގި ކަނބަލުން މައުރަޒު ކުރިޔަށް ދިޔަ ބައެއް ރޭތަކުގައި މިއުޒިކާއި މުނިފޫހިފިލުވުމުގެ ހަރަކާތްތައް ވެސް ކުރިޔަށް ގެންދިޔަ އެވެ.
27 ފެބްރުއަރީ 2017: ހީވާގި ކަނބަލުން އެކްސްޕޯ ނިންމުމުގެ ގޮތުން ކުރިޔަށްދިއަ މިއުޒިކް ޝޯ---ސަން ފޮޓޯ/ މުހައްމަދު އަފްރާހް
މީގެ އިތުރުން، މައުރަޒަށް ޒިޔާރަތްކުރި ފަރާތްތަކުގެ މެދުގައި ގުރުއަތު ނަގައި، ނަސީބުވެރި ތިން ފަރާތަކަށް ވަނީ އަގުހުރި ތިން އިނާމު ދީފަ އެވެ.
ތިންވަނަ އިނާމަކަށް ބެޓެރީ ސައިކަލެއް ދިން އިރު، ދެވަނަ އިނާމަކަށް ދީފައި ވަނީ ބެންގްކޮކް ދެކޮޅު ޓިކެޓެވެ. އަދި އެއް ވަނަ އިނާމަކަށް ދީފައި ވަނީ ދުބާއީ ދެކޮޅު ޓިކެޓެވެ.