ސްޓޭޓް ޓްރޭޑިން އޯގަނައިޒޭޝަން (އެސްޓީއޯ) އިން މި މަހުގެ ނުވަ ވަނަ ދުވަހު ފެށި ޗޮކްލެޓް ފެސްޓިވަލް ނިންމާލައި އެ ޕްރޮމޯޝަންގެ ނަސީބުވެރިން ރޭ ހޮވައިފި އެވެ.
އެސްޓީއޯ އިން ކުރިއަށް ގެންދިޔަ ޗޮކްލެޓް ފެސްޓިވަލްގެ ނަސީބުވެރިން ހޮވާފައި ވަނީ ރޭ އެސްޓީއޯ ސުޕަމާޓުގައި ބޭއްވި ހަފްލާއެއްގަ އެވެ.
މިމަހުގެ ނުވަ ވަނަ ދުވަހުން އިއްޔެގެ ނިޔަލަށް ކުރިއަށް ގެންދިޔަ އެ ފެސްޓިވަލުގައި ބައިވެރިވެފައި ވަނީ އެސްޓީއޯގެ ގާތް ފަސް ޕާޓްނަރުން ކަމުގައިވާ، ހެޕީ މާކެޓާއި، ވީބީ ބްރަދާސް އާއި ސްރީލަންކާގެ ސީންކޯ ކުންފުންޏާއި ގޯލްޑެން ލޭން އަދި ސިމްޑީ އިންނެވެ.
އެ ފެސްޓިވަލުގައި އެ ފަސް ޕާޓްނަރުން ރާއްޖެ އެތެރެކޮށް ވިއްކާ ޗޮކްލެޓުތައް ހެޔޮ އަގުގައި ވަނީ ވިއްކައިފަ އެވެ.
އެސްޓީއޯ ސުޕަމާޓުގެ ފަރާތުން ހަ ނަސީބުވެރިއަކަށް އިނާމު ހުށަހަޅާފައިވާ އިރު، ހެޕީ މާކެޓާއި ވީބީ އިން ވަނީ ރިސޯޓު ދަތުރެއް ދީފަ އެވެ. އަދި ގޯލްޑަން ލޭންގެ ފަރާތުން ވަނީ ގުރުއަތުން ހޮވުނު ފަރާތަށް ބެންކޮކް ދަތުރެއް ދީފަ އެވެ.
އެގޮތުން ހެޕީ މާކެޓުން ހުށަހެޅި، ރިސޯޓުގައި ދެ ރޭ ހޭދަކުރުމުގެ ފުރުސަތުގެ ނަސީބުވެރިއަކަށް ހޮވިފައި ވަނީ، އައިޝަތު މަލިކާ އެެވެ. އަދި ވީބީއިން ހުށަހަޅާފައިވާ ރިސޯޓު ދަތުރުގެ ނަސީބުވެރިއަކަށް ހޮވިފައި ވަނީ، މުހައްމަދު ރިޒާ އެވެ. އޭގެ އިތުރުން ބެންކޮކް ދަތުރުގެ ނަސީބުވެރިއަކަށް ހޮވިފައި ވަނީ، ކޫޕަން ނަމްބަރު 00589 އެވެ.
އެ ފެސްޓިވަލުގައި ބައިވެރިވި ފަރާތްތަކުން ވަނީ އެ ފެސްޓިވަލަކީ ކާމިޔާބު ފެސްޓިވަލެއްގެ ގޮތުގައި ސިފަކޮށްފަ އެވެ. އެ ގޮތުން އެ ފެސްޓިވަލްގެ ސަބަބުން ވިޔަފާރިއަށް ކުރިއެރުން ލިބުނު ކަމަށް އެ ފަރާތްތަކުން ފާހަގަ ކުރެއްވި އެވެ.
އެސްޓީއޯ އިން ބުނީ އަންނަ މަހު ކޭކް އެންޑް ވޭފާސް ފެސްޓިވަލެއް ބޭއްވުމަށް ތައްޔާރުވަމުންދާ ކަމަށެވެ.
އެސްޓީއޯ އިން ޗޮކްލެޓް ފެސްޓިވަލް ކުރިއަށް ގެންދާތާ މިއީ 10 ވަނަ އަހަރެވެ. މީގެ ކުރިން އެ ހަރަކާތް ކުރިއަށް ގެންގޮސްފައި ވަނީ، ޗޮކްލެޓް ވީކްގެ ނަމުގަ އެވެ.